مين هم الهنود الحمر أصحاب الأرض الأصليين

انتشرت في الأيام الأخيرة فيديوهات للسكان الأصليين للأمريكيتين اللي بيتم تعريفهم ب”الهنود الحمر” أثناء ما كانوا بيدعموا القضية الفلسطينية في المظاهرات وبدأ الناس على السوشيال ميديا يشبهوهم ببعض أو يقولوا “أصحاب الأرض يتشابهون دائما” علشان كده هنقولك في الموضوع ده إيه هي قصة الهنود الحمر

الهنود الحمر أو السكان الأصليين أو “الهنود الأمريكان”  تطلق على السكان الأصليين للأمريكيتين اللي كانوا عايشين في أمريكا من آلاف السنين قبل عصر كريستوفر كولمبس لما اكتشف أمريكا وبعدها تم الاستعمار الأوروبي ليها في القرن الـ 15 واتسموا  بالهنود لأن كريستوفر كولومبس أعتقد أنه وصل لجزر الهند الشرقية لما اكتشف العالم الجديد ولما شاف إن أهالي المنطقة بتميل بشرتهم للون الأحمر أطلقوا عليهم لقب الهنود الحمر ولكن بعض المؤرخين قالوا إن تسميتهم بالاسم ده للتفرقة بينهم وبين الهنود الآسيويين.

في كتير من المؤرخين اتكلموا عن الجرايم اللي  ارتكبها كولومبوس في الهنود الحمر وأعادوا النظر في فكرة تصنيفه بطل اكتشف الأمريكتين وده بسبب اعتماده أسلوب غير إنساني في التعامل  مع السكان الأصليين واستخدام العنف والعبودية من خلال استعباد السكان الأصليين

وكان بيجبر أي شخص بيزيد عمره عن  14 سنة على جمع الدهب له أو التعذيب وده خلى عشرات الآلاف من السكان الأصليين ينتحروا عشان يتخلصوا من حياة العبودية ده غير إنه كمان كان بيروج لاستعبادهم  وبعت الآلاف منهم إسبانيا علشان يكونوا عبيد

مش بس كده وكمان كان بيمارس التنصير الإجباري ورجال كولومبوس اللي كانوا معاه كانوا بيعملوا جرائم خطف واغتصاب.. والنتيجة اللي حصلت بعد كده بعد ما تم تعذيب السكان الأصليين هي انتشار أمراض وأوبئة جديدة على أجسامهم أدت لوفاة عدد كبير منهم

زي شعب التيانو اللي أتعرض للإبادة  وماتبقاش منه غير مئات من الأشخاص بعد ما كانوا حوالي نص مليون شخص و ده حصل خلال 60 سنة بس من وجود كولومبوس على الجزيرة

وخلال قرن من الغزو الأوروبي للأمريكتين تناقص عدد السكان الأصليين بنسبة قدرت ما بين نصف إلى ثلثين السكان الأصليين في شرق أمريكا الشمالية

و الجدري كمان اتسبب في موت 90% من السكان الأصليين في مستعمرة خليج “ماساتشوستس” و اتسبب انتقال الفيروس في انقراض الأمريكيين الأصليين في بلايموث.

وفي سبعينيات القرن الـ 18 قضى الجدري على حوالي 30% من الأمريكيين الأصليين الساكنين في الساحل الغربي للولايات المتحدة

وفي النصف الثاني من القرن الـ 19 لعب الأمريكان دور أساسي في مذبحة هنود أمريكا الشمالية من خلال الهجرة القسرية والحروب اللي اتسببت في تدمير مدنهم وتم تنفيذ المذابح بشكل رئيسي من قبل القوى الاستعمارية الأوروبية  عشان يسيطروا على أجزاء مختلفة من القارة الأمريكية ويحصلوا على كل الهنود الأمريكيين الأصليين

واستمرت الحروب الأمريكية والهجوم على الهنود الحمر لحد سنة 1900 واللي اتقتل فيها حوالي 100 مليون من السكان الأصليين

علشان كده العالم بيشوف تشابه بين الفلسطينيين والسكان الأصليين في مجموعة حاجات إن الاتنين تم تشريدهم من أرضهم ووطنهم بشكل متكرر وقسري وتم معاملتهم بظلم وتمييز

 ولكن الاتنين مازالوا متمسكين بأرضهم وهويتهم الثقافية مهما حاول الغرب يغيروا ده..