مين هو المسحراتي وإزاي صوته بقى جزء أساسي من رمضان؟

زي أي إنسان عادي.. بيشتغل في رمضان.. بتقعد بعد الفطار تاكل الكنافة بتاعتك وتتفرج على مسلسلك المفضل اللي بنسبة 99.9% هتنام في نصه عشان صاحي من بدري.

هتبوظ عليك النومة الحلوة دي أصوات أطفال.. ميكس بنات على ولاد في أعمار مختلفة.. بيتخانقوا مين اسمه يتقال الأول من المسحراتي.

هو هيبقى الراجل مشكورًا صحاك.. بس مش من صوت الطبلة.. من صوت العيال الصغيرة.

تعالى بقى نقولك إيه قصة الراجل والطبلة اللي معاه دول:

المسحراتي زي مانت عارف.. هو طقس من طقوس رمضان.. حاجة بتميز رمضان عن باقي أيام السنة.

لكن المسحراتي بدايته مش زي ما إحنا بنشوفه دلوقتي.. ولا كان بيقول نفس الكلام.

في روايات كتير اتفقت إن المهنة دي من أيام العصر النبوي.. لأن الصحابيين “بلال بن رباح” و”عبدالله بن أم مكتوم” كانوا بيأذنوا للسحور.. كان الصحابي “بلال” بيأذن الأول عشان الناس تتسحر وبعده الصحابي “عبد الله” بيأذن لصلاة الفجر.

لكن في العصر الأموي.. كانت البداية الرسمية للمهنة دي..وكان أول مسحراتي نعرفه هو” عتبة بن إسحاق” واللي كان والي مصر سنة 238 هجريًا.. كان بيخرج بنفسه من مدينة العسكر لحد جامع عمرو بن العاص وينادي ويقول”يا عباد الله تسحروا.. فإن في السحور بركة”.

ومن بعدها بدأ المسحراتي يستخدم الشعر في كلامه وهو بيصحي الناس تتسحر في العصر العباسي.

وأكبر مثال على كده.. في مصر كان شيخ طائفة المسحراتية “ابن نقطة” بينشد أبيات مخصصة للسحور عشان السلطان الناصر بن قلاوون.

وفي العصر الفاطمي.. كان في أوامر من الحاكم بأمر الله للناس بالنوم بدري.. والجنود هيلفوا على بيوتهم يصحوهم..
والروقان ده كانت بداية استخدام “الطبلة” الصغيرة والعصاية اللي بيمسكها دلوقتي.

لحد ما وصلنا لشكل المسحراتي اللي نعرفه.. بلبسه وطبلته وهزاره مع الناس و”اصحى يا نايم وحد الدايم”.

هو إحنا آه مابقيناش نصحى على صوت الطبلة عشان بنفضل سهرانين.. بس لسة المسحراتي جزء من تراثنا الشعبي اللي بنحبه.

فالحق بقى روح قوله على إسمك عشان ينده عليك.