نادي جلوكال الفني:مراجعة سريعة لـ فيلم “yes man” هتخليك تعيد تفكيرك في انطوائيتك
لو حاسس إنك بقيت منطفي وانطوائي في آخر فترة في حياتك وعلى طول من الشغل للبيت ومابتحبش تعمل أي أكتيفيتي بعد الشغل حتى مع صحابك يبقى دي علامة إنك لازم تشوف فيلم “yes man” وفي المراجعة دي هنقولك ليه!
الفيلم كوميدي ومن نوعية أفلام الـ feeling good من بطولة “جيم كاري” و”زوي ديشانيل” وواخد تقييم 6.8/10 على الـ IMDB.. الفيلم بيحكي عن حياة “كارل” وهو موظف شخصيته انطوائية بيرفض أي طلب أو عرض بيتقاله من صحابه ومن اللي حواليه إنه يروح أي مكان أو يعمل حاجة جديدة.. لكن في يوم بيحضر محاضرة تحفيزية بتقوم على مبدأ واحد إنك تقول “نعم” لكل حاجة بتطلب منك وفعلًا بيمضي عقد إنه يقول “نعم” على أي حاجة تطلب منه لمدة سنة كاملة!
ومش عايزين نحرق الفيلم بس العقد ده وفكرة إنه يقبل كل حاجة بيغير حياته للأحسن في حاجات كتير لأنه بيخليه يشوف تجارب جديدة ويعرف ناس أكتر وبيعرف إن الدنيا أكبر بكتير من مجرد القعدة في البيت من غير ماتعمل حاجة واللي كان مسببله اكتئاب من غير ما ياخد باله..
بس زي أي حاجة بيكتشف برضه مع الوقت إنك تقبل أي حاجة برضه مش دايمًا هو الصح لأنه بيخليك تغير من نفسك وهويتك في أوقات تانية كمان بتوصل إنك تيجي على نفسك!
الفيلم هتلاقي فيه مواقف كتير بتضحك من غير استظراف ده لو بتحب كوميديا الموقف فـ “جيم كاري” من أفضل الممثلين الكوميديين في الحتة دي ولو شوفتله “the mask” وأنت صغير غالبًا هيبقى واحد من المفضلين عندك ولو مشفتوش أتفضل شوفه بالمرة قبل ماتشوف “yes man” عشان هتبقى ليلة كوميدية بإمتياز!
