نادي جلوكال الفني:مراجعة سريعة لمسلسل “TED Lasso” لو عايز تشوف شخصيات إنسانية حقيقية!
ساعات بنبقى عايزين نتفرج على مسلسل كوميدي بس في نفس الوقت مكتوب كويس وفي قصة مش بس حاجة تضحكنا.. ومن المسلسلات في رأيي اللي قدرت تعمل ده الفترة الأخيرة كان مسلسل “TED LASSO” اللي اتصور واتعرض أول جزء منه سنة 2020 تحديدًا وقت الكورونا ووقتها خد تفاعل كبير واهتمام من العالم كله وكسب حوالي 7 جوايز emmys سنتها.. بس ياترى ليه المسلسل استحق كل ده؟.. في المراجعة دي هنقولك سر نجاحه..
المسلسل واخد تقييم 8.8/10 على IMDB وده تقييم كبير بالنسبة لمسلسل كوميدي والمسلسل مصنف من نوع الكوميديا والدراما ودى من أحلى الحاجات فيه أنك هتشوف مشاعر حقيقية بس وأنت مبسوط!.. المسلسل بيحكي عن الكوتش “تيد لاسو” والكوتش “بيرد” اللي كانوا بيدربوا american football ولكن جالهم عقد يدربوا فريق كرة قدم إنجليزي اسمه “Richmond” وبنشوف خلال المسلسل التحديات اللي بتواجهم عشان يقدروا يتعلموا لعبة جديدة مدربوهاش قبل كده وغير ده تحدي إنهم يحاولوا ياخدوا على المكان الجديد.. ده غير كمان شخصية كل لاعب المميزة اللي ليها جانب طيب وجانب شرير لإنهم ببساطة بني آدمين!
لما تشوف الـ trailer بتاع المسلسل بتكون فاكر إنه هيتكلم عن الكورة بس ولكن لما تتفرج عليه هتعرف أنه بعيد تماما عن الكورة ومش ده اهتمامه الأساسي لكن أكتر هو تشابك العلاقات الإنسانية وتطور كل شخصية سواء شخصية “تيد لاسو” نفسه من مروره بتجربة انفصال لمحاولة إنه يتخطى ماضيه الصعب والتروما اللي عنده اللي ببساطة بتمثل ناس كتير بيحاولوا يعيشوا حياتهم رغم كل الحاجات اللي مروا فيها بالماضي.. ده غير شخصية “ريبيكا” مديرة النادي اللي بتتعرض لطلاق من خيانة وبعدها طلاق من جوزها وبتحاول تضره بإنها تأذي النادي لكن مع الوقت بنعرف دوافعها الحقيقية وتحولات شخصيتها..
ومن ألطف الشخصيات في المسلسل “روي كينت”و”جيمي تارت” اللي في الاول مابتبقاش عارف تحبهم ولا تكررهم لكن الأكيد إنك مع آخر أحداث المسلسل في كل جزء بتبدأ تشوف كل شخصية بشكل تاني لما بتعرف تاريخها وإيه اللي وصلها لتصرفاتها دي!
وخلال المسلسل هتلاقيه قدر يعرض مختلف أنواع العلاقات الحب.. الكره.. الصداقة.. الانفصال.. الأبوة.. كل شىء بتفكر فيه ومعظم القضايا المهمة اللي ممكن تكون شغلت بالك او فكرت فيها قبل كده هتلاقي المسلسل اتكلم عنها بشكل سلس خاصة في أول جزئين
ولو أنت بتزهق بسرعة وعايز سبب يشجعك أكتر تدخل تتفرج حالًا المسلسل كل جزء فيه 10 حلقات أو 12 حلقة تقريبًا ومدة كل حلقة تلت ساعة يعني بينجز على طول فممكن تخلص السيزون وأنت قاعد لو زهقان يلا روح اتفرج مستني إيه!.
