نادي جلوكال الفني: مراجعة سريعة لفيلم من أيقونات التسعينيات 10 Things I Hate About You
بما إننا في الويك إند بنبقى نفسنا نعيش الحلم بتاع الراحة الأسبوعية من الشغل والفرهدة وهو إننا نأنتخ على الكنبة وناكل فشار وسناكس ونتفرج على فيلم رايق ماينكدش علينا.. قررنا الأسبوع ده نعملكوا مراجعة سريعة لواحد من كلاسيكيات أفلام الرومانتيك كوميدي في فترة التسعينيات وهو فيلم 10things I Hate About You
الفيلم اتعمل سنة 1999 يعني دلوقتي هيكون مر عليه 25 سنة! ورغم ده لسه في معجبين كتير بالفيلم ومابيحسوش إنه قديم.. كمان الفيلم واخد تقييم 7.4/10 على الـ IMDB وده يعتبر تقييم عالي بالنسبة لنوعية الأفلام دي.. والفيلم من بطولة “جوليا ستايلز” والجوكر “هيث ليدجر” ولو ماشفتلوش حاجة لايت قبل كده هيكون الفيلم فرصة حلوة إنك تتفرج عليه في genre جديدة خاصة إنك مش هتصدق إنه نفس الشخص اللي بيمثل الجوكر!.
الفيلم قصته حوالين الأختين “كيت” و”بيانكا” اللي باباهم برفض إن الأخت الصغيرة “بيانكا” إنها ترتبط قبل ما أختها الكبيرة “كيت” ترتبط هي كمان.. عشان كده”كاميرون” اللي معجب بالأخت الصغيرة “بيانكا” بيقرر إنه يدفع فلوس للباد بوي اللي في المدرسة “باتريك” عشان يحاول يخلي كيت تحبه وبكده يقدر يرتبط بأختها الصغيرة.. فياترى إيه اللي هيحصل.. اتفرج بنفسك مش هنحرق عليك بقى!
من الآخر لو حابب تشوف فيلم خفيف ورومانسي بس في نفس الوقت تضحك شوية على المواقف اللي بتحصل من غير مط هتتبسط بالفيلم وكمان ممكن تتفرج عليه مع عيلتك عادي!.
ولو بتحب الأفلام الميوزيكال فالفيلم مش ميوزيكال بس هيديك الإحساس ده في أوقات كتيرة من ضمنهم أغنية I love you baby اللي عملها “هيث ليدجر” بأداء مميز لسه الناس اللي بتحب الفيلم بتتكلم عنه أو بتعيد نشره لحد دلوقتي.
ولو أنت شخص sensitive وبتحب الشعر والرومانسية هتحب آوي المشهد ده من الفيلم لما “كيت”كتبت القصيدة دي لـ “باتريك”!
مش هنتكلم عن الإخراج والمونتاج والتصوير والكلام السينمائي آوي لإننا في الآخر غرضنا إننا نرشحلك حاجة تتبسط بيها وتفكك شوية الأسبوع ده.. فالفيلم هيخليك تـ feel good وده المهم بس استنونا في مراجعات تانية كل أسبوع هيكون فيها أفلام منوعة من genres مختلفة عشان تناسب كل الأذواق.
