نصايح للناس اللي بتذاكر وبتمتحن في رمضان 

رمضان بقاله سنين بيجي في الصيف وحتى لما بدأ يجي في الربيع الجو برضه بقى حر، وبقالنا سنيين برضه بنمتحن أو بنذاكر في الصيام، يمكن الامتحانات نفسها مابتكنش صعبة زي المذاكرة وإحنا عطشانيين وجعانين، لكن طبعا ماينفعش تتدلع في المذاكرة عشان الحر والصيام لإن أكيد فيه حلول للموضوع ده، الموضوع ده موجه لإخواتنا  اللي هيمتحنوا أو مضطرين يذاكروا في رمضان:

1- حاول تشغل تكييف أو مراوح وتحافظ على درجة برودة جسمك أكبر وقت عشان ماتعرقش وجسمك يفقد مياه، فحاول تقفل الشبابيك والستاير أطول وقت عشان الحرارة ماتدخلش البيت إلا لو كان درجة الحرارة كويسة برا.

2- حط خطة أو جدول للمذاكرة عن طريق إنك تخلص تاسكات معينة في وقت معين، ماتسبش الموضوع عايم.

3- خليك بعيد عن المطبخ وبرامج الطبخ وريحة الأكل، ابعد عن الإغراءات اللي ممكن تسببلك الجوع أو العطش، ولو نزلت حاول تفضل في مكان مقفول عشان تبعد عن الشمس.

4- ذاكر بعد شروق الشمس على طول أو بعد السحور لإن ده الوقت اللي هتبقى شبعان فيه وذهنك هيكون في أصفى أوقاته ده غير إن الجو في الوقت ده بيبقى أبرد وفيه هوا ومفيش دوشة، وكمان لو خلصت مذاكرتك في الوقت ده هتحسن نفسك أهدى ومش مضغوط.

5- لو قسمت وقتك عن وحددت كم معين في وقت معين، هتركز في الوقت أكتر وهتشتت تركيزك اللي في الجوع والعطش.

7- حاول تحافظ على طاقتك أكتر، يعني بلاش تتكلم كتير وإنت صايم مثلا، ودور على مكان هادي تذاكر فيه.

8- فكر في إنك تاخد دش في الأوقات الحر في اليوم، خصوصا لو راح من برا بعد امتحان أو درس وطبعا حاول على قد ما تقدر ماتدخلش المياه في بوقك عشان ماتفطرش.

9- حاول في الوقت اللي هتتعب فيه اللي هو غالبا قبل المغرب بساعتين تلاته تنام شوية عشان تستغل الوقت في النوم وتعوض المذاكرة بعد الفطار، لإن ده كمان هيساعدك تعدي الوقت أسرع.

10- طبعا بعد الفطار ياريت تشرب كميات من المياه ومشروبات كافية تكفيك لليوم اللي بعدها لإن المياه بتساعد على التركيز.