نصايح هتساعدك تزق أول يوم شغل بعد الإجازة

كتبت/ علياء عبد الغفار

بلا شك كلنا لقينا نفسنا في الإجازة وقعدة البيت والأنتخة، بس ده لا يمنع إن الحياة يوم ليك ويوم عليك وزي ما إمبارح كان إجازة للأسف النهاردة هيبقى شغل.. وطبعا عارفين إن مش سهل عليك تسيب .. السرير وتنزل تشتغل.. فـ جبنالك شوية “Tips and Tricks” ممكن تساعدك ِشوية في تتقبل فكرة الشغل تاني:

1- اشتري لبس جديد وجهز “Outfits” مختلفة للأسبوع كله وده هيحمسك لكل يوم شغل أو فكر إنك هتلبس طقم العيد لأول مرة في الشغل

2- اعتبر دي بداية صفحة جديدة مع الشغل واعمل شوبينج في المكتبة هاتلك مثلا “Notebook” جديدة و “To Do List” وأقلام ملونة وابدأ اكتب الحاجات اللي عليك بروقان وعلى نضافة 

3- خد معاك علبة فيها كحك وبسكوت وخد الماج المفضل عشان الشاي بلبن وانقل “Vibes” العيد  بتاعة البيت للشغل

4- فكر إنك لازم توازن بين علاقاتك في الحياة وزي ما قضيت وقت لذيذ مع عيلتك أنت دلوقتي رايح تحقق المعادلة وتقضي وقت مع زمايلك وصحابك

5- خليك فاكر إن أسبوع الشغل بدأ متأخر وكلها يومين وهنلاقي نفسنا دخلنا في إجازة الويك اند تاني

6- افتكر إننا أخر الشهر وكلها يومين وهتقبض فـ ده يحفزك تزود “التارجت” بتاعك عشان ينزلك مكافآت مع المرتب

7- اقرأ مقالات عن أهمية الشغل في حياة الإنسان وتخيل لو مش موجود حياتك هتكون مملة وتعيسة إزاي! أو حتى من غير ما تقرأ فكر أنت لو مابتشتغلش حياتك هتبقى عاملة إزاي!

8- غير في شكل مكتبك بشوية ديكور بسيطة زي زرع مثلا أو أي أكسيسورايز

9-  نام من ٦-٨ ساعات قبل أول يوم شغل بعد الإجازة عشان ده اليوم اللي هيحدد موودك باقي الأسبوع فـ ماينفعش تتقفل من الأول كده.. أو حاول يعني 

10- حضر بلاي ليست جديدة ومختلفة عشان لو سمعت نفس البلاي ليست القديمة ممكن ترجعك لذكريات تقفل يومك

11- اكتب في ورقة آخر إنجازاتك في الشغل لحد قبل العيد وده هيفكرك قد إيه أنت بتحب شغلك فتتحفز تشتغل وتزود ليست الإنجازات دي