هدافين أمم إفريقيا | صلاح وماني بيطارده “العميد” وإيتو

كأس أمم إفريقيا عمرها ما كانت بطولة عادية بتتعدّي وخلاص دي دايمًا كانت مسرح مفتوح لنجوم كبار صنعوا تاريخهم بأهداف في لحظات فارقة.. ولحظات غيرت مسار بطولات وخلّت أسماء أصحابها تعيش في ذاكرة الجماهير لسنين طويلة.. وسباق الهدافين في “الكان” مش مجرد أرقام ده سباق للمجد وكل هدف بيتسجل بيبقى له تاريخ خصوصًا لما ييجي في مباراة كبيرة أو وقت صعب

لما نيجي نبص على تاريخ الهدافين في كأس أمم إفريقيا هنلاقي إن الكاميروني صامويل إيتو لسه واقف لوحده على القمة برصيد 18 جول.. رقم تاريخي بيخلّيه واحد من أعظم لاعبي القارة على الإطلاق
وإيتو سجّل أهدافه في أكتر من نسخة وكان دايمًا حاضر في اللحظات الكبيرة وعشان كده رقمه لحد دلوقتي صعب المنال
يجي بعد منه على طول الإيفواري لوران بوكو بـ 14 جول وهو واحد من أوائل نجوم الكان ثم النيجيري الراحل رشيدي يكيني بـ13 جول واللي اسمه مرتبط دايمًا بأحد أشهر احتفالات الأهداف في تاريخ البطولة
وفي المركز الرابع إفريقيًا ييجي اللاعب المصري حسن الشاذلي بـ 12 جول ورقم فضل ثابت لسنين طويلة متحدّي أجيال كاملة من المهاجمين ومعلن إن الوصول ليه مش سهل.
القائمة دي كمان بتضم نجوم تقيلة زي ديدييه دروجبا بـ11 هدف والأسطورة الزامبية كالوشا بواليا صاحب الـ10 أهداف وكل واحد فيهم له حكاية مختلفة مع البطولة

بصمة مصرية

مصر كان ليها دايمًا حضور قوي في سباق الهدافين مش بس بعدد الأهداف لكن بقيمتها وتوقيتها وأهداف اتسجلت في نهائيات وأهداف كانت سبب في ألقاب وأهداف لسه الجماهير فاكرها لحد النهارده
ويتصدر حسن الشاذلي قائمة الهدافين المصريين في تاريخ أمم إفريقيا بـ 12 هدف ولسه محافظ على رقمه القياسي رغم مرور السنين وبعده ييجي حسام حسن المدير الفني الحالي للفراعنة والملقب بالـ”العميد” بـ 11 جول وهو واحد من أكتر اللاعبين اللي عاصروا البطولة وسجلوا فيها في أوقات مختلفة ويجي بعد كدة أحمد حسن لاعب الأهلي ومنتخب مصر السابق بـ 8 أهداف وأخيرًا المحترف محمد صلاح قائد المنتخب الحالي بـ 7 أهداف واللي بيمثل الجيل الجديد في سباق التاريخ

صلاح قدّام التاريخ

محمد صلاح داخل نسخة المغرب وهو عارف إن البطولة دي مش مجرد مشاركة جديدة لكنها فرصة حقيقية يقرّب بيها من كتابة اسمه بحروف دهب.. هدف واحد بس هيخلّيه يعادل رقم أحمد حسن الملقب برضه بـ”عميد لاعبي العالم” وينفرد بالمركز الثالث في قائمة هدافي مصر تاريخيًا في أمم إفريقيا
ولو صلاح قدر يسجل 3 أهداف هيبقى على بُعد خطوة واحدة من معادلة رقم حسام حسن وساعتها يبدأ التحدي الحقيقي: الاقتراب من رقم حسن الشاذلي الأسطوري اللي لسه صامد ومحدش قدر يهزه لحد دلوقتي.. وكمان أول هدف لصلاح في نسخة المغرب هيخليه يعادل أسطورتين إفريقيتين في ترتيب الهدافين القاريين وهما المالي سيدو كيتا والغاني أسامواه جيان برصيد 8 أهداف لكل واحد وده يزود قيمة كل هدف يسجله نجم ليفربول السابق

منافسة مولعة

الطريق قدّام صلاح مش سهل خصوصًا إنه داخل خامس بطولة ليه في كأس الأمم والمنافسة المرة دي مشتعلة على رأس المنافسين ييجي السنغالي ساديو ماني “صديق الأمس ومنافس اليوم” واللي عنده 9 أهداف وعايز يقرب أكتر من القمة ويثبت إنه واحد من أساطير القارة
كمان فيه علامات استفهام حوالين مشاركة وتأثير أسماء تقيلة زي فينسنت أبو بكر مهاجم الكاميرون صاحب الـ9 أجوال وأندريه أيو قائد غانا بـ10 أهداف بالإضافة للجزائري رياض محرز اللي داخل السباق بـ 6 أهداف ولسه عنده طموح كبير إنه يزود رصيده ويقرب من الكبار

التاريخ مستني

نسخة أمم إفريقيا في المغرب مش بس بطولة جديدة في الرزنامة دي محطة مهمة في تاريخ نجوم كبار وكل هدف ممكن يغيّر ترتيب وكل مباراة ممكن تفتح باب للتاريخ والسؤال اللي الكل مستنيه: هل ينجح محمد صلاح في تقليص الفارق مع أساطير إفريقيا؟ ولا يكون لساديو ماني أو اسم تاني رأي مختلف ويخطف الأضواء؟