هل السكر الدايت ممكن يتخنك؟

دراسة اتعملت في كلية “كيك” للطب بجامعة جنوب كاليفورنيا على “السكرالوز” واللي هو واحد من أشهر بدائل السكر عشان يعرفوا تأثيره على الدماغ والشهية لقوا نتايج غريبة وجديدة

الدراسة اتعملت على 75 شخص من الجنسين بحالات صحية وأوزان مختلفة واللي كان بيحصل هو إنهم بيصوروا الدماغ بالرنين المغناطيسي وبيسألوا المشاركين عن مستوى جوعهم قبل ما يشربوهم مياه أو عصير متحلي بالسكرالوز اللي هو سكر خالي من السعرات الحرارية.. وبعد ما يشربوا يشوفوا اشارات الدماغ تاني بالرنين المعناطيسي ويقيسوا مستوى الجوع تاني

الغريب في الموضوع انهم لقوا ان الاشارات دي بعد الشرب بتنشط منطقة “تحت المهاد” (Subthalamic nucleus) واللي هي بتلعب دور رئيسي في تنظيم الجوع في الدماغ.. يعني ايه الكلام ده؟

يعني شرب المياه او العصير بالسكرالوز كان بينشط الاحساس بالجوع.. ولقوا ان النتايج دي بتحصل بشكل أكبر عند المشاركين اللي بيعانوا من السمنة!

الملاحظة التانية إن بعد شرب السكرالوز بيحصل نشاط في “القشرة الحزامية الأمامية” (Anterior cingulate cortex) ودي الجزء المسئول عن اتخاذ القرارت.. وهنا الباحثين ربطوا بين النشاط ده وبين زيادة الرغبة في اتخاذ قرار الأكل بعد نشاط منطقة الجوع (منطقة ما تحت المهاد)

وهنا “ألانا بيج” مديرة معهد أبحاث السكري والسمنة واللي كانت بتشتغل على التجربة دي بتقول ” إن الجسم بيستخدم الهرمونات دي عشان يبلغ الدماغ بإستهلاك السعرات الحرارية.. ولما مش بيلاقي سعرات كافية بعد تحفيزه بالسكرالوز بيبدأ يزود الرغبة في الأكل.. وده بيحصل أكتر عن المصابين بالسمنة”

كمان التأثيرات دي مش متساوية بين الجنسين.. الدراسة لقت إن التأثير بيكون زيادة عند الستات مقارنة بالرجالة

لو توهت تعالى أقولك ببساطة.. الجسم بعد ما بيتحفز بسبب السكرالوز وبيفتكر إن في طاقة دخلت له وهيبدأ يستخدمها بيلاقي إن مفيش.. فبيبتدي يزود الاحساس بالجوع وبالتالي بيأثر على قرارك في الأكل

وعشان كل ده الدراسة بتوجهنا إننا ناخد بالنا من استهلاكنا من المحليات الخالية من السعرات الحرارية.. لإن رغم انها مافيهاش فعلًا سعرات تزود وزننا بس بتخلينا بشكل غير مباشر نحتاج لسعرات أكتر وإحنا مش واخدين بالنا.