هل الناس محظوظة هي اللي بيجيلها فرص؟

أغلبنا قولنا على حد إنه محظوظ عشان فرصة جاتله في حياته خلتها أحسن بشكل ما سواء الفرصة كانت فلوس أو منصب أو شريك أو أي نوع من أنواع الفرص والمكاسب اللي بتحصلنا في حياتنا، وأوقات تانية بنفضل نفكر ليل ونهار في فرص ممكن تجيلنا تغيرلنا حياتنا إحنا كمان وندعي ونصلي عشان فرص مناسبة تقع في طريقنا ونبقى محظوظين زي الناس اللي جالهم فرص.. بس هل فعلا الناس المحظوظة بس هي اللي بيجيلها فرص ولا كلنا عندنا فرص والشخص المحظوظ ده هو شخص ذكي بس وقدر يستغل الفرصة ويمسك فيها لدرجة إنه استفاد منها وغيرتله حياته؟

في الأول أصلا إنك تقدر تتعرف على الفرصة وتدرها دي حاجة مهمة جدا عشان نجاحك وإنك تكبر في الحياة، ولو لاحظت وبصيت على الناس الناجحة هتلاقي إن نادر جدا لما بيكون عندهم مهارة ما أو موهبة لكن أغلب الوفت نجاحهم بيكون بسبب إنهم قدروا يتعرفوا على فرصة واستغلوها، ونجاحهم ده على فكرة مابيكونش بسبب إنهم قاعدين ومستنين الفرصة المناسبة عشان تنزل في حجرهم وهما قاعدين ده بيبقى نتيجة سعي. 

ولو كنت فعلا عايز تنجح وتوصل للي بتحلم بيه لازم يبقى عندك استعداد إنك تجري ورا حلمك ده وتعمل كل اللي عليك وتفهم إن الفرص اللي أنت محتاجها مابتجيش على طبق من دهب بالعكس دي ممكن نيدي على هيئة مشكلة.. عشان كده تعالى نقولك إزاي تتعرف على الفرص وإزاي تقدر تصفي المشكلة وتطلع منها بالحاجة اللي توصلك لهدفك وإزاي تقدر تدرك الفرص وتستغلها زي ما قال موقع “medium” في أحد مقالاتة: 

1- خليك فضولي:

خلي عندك فضول وانفتاح على العالم اللي حواليك، لإن غالبًا الفرص بتيجي من أماكن مش متوقعة، عشان كده جرب عادي وخلي عندك أفكار جديدة، وحدد أنت عايز إيه وحاول ترسم أهدافك في عقلك لإن ده هيساعدك تعرف الطرق بتاعته لما يجي في طريقك.

2- اسبق أنت: 

ماتستناش الفرص هي اللي تدق بابك وابدأ أنت ودور على امكانيات جديدة واكتشف مجالات مختفلة وشارك في أنشطة شبه اهتمامتك أكتر 

3- ماتخفش من التحديات:

في بعض الأوفات الفرص بتيجي متنكرة على شكل تحديات، فماتخافش من الخروج من الـ Comfort zone بتاعتك وواجه المشاكل عادي، عشان هتتعلم من المشاكل دي دروس كويس واحتمال تلاقي فيها فرص مش متوقعة.

4- تأقلم:

خليك إيجابي وحاول تتكيف مع الظروف اللي بتتغير وخليك مرن كمان في أسلوبك، لإن العقلية الإيجابية بتساعد الشخص إنه يكتشف مسارات بديلة وبتساعده كمان يحول المحن دي لفرص.

5- اتعلم من الفشل:

الفشل عمومًا جزء من الحياة، وساعات بيبقى نقطة انطلاق للنجاح، فحب الفشل عادي واعتبره فرصة إنك تتعلم وحاول تحلل غلطاتك اللي حصلت واستخدمها عشان تطلع منها الدروس المستفادة عشان تتحسن وتنضج أكتر.

وخليك عارف إنك سهل جدا تحس بالإحباط وإنك تحس إن مفيش فرص ممكن تحسن حياتك خصوصا لما الأمور مابتكونش ماشية زي ما أنت مخطط ليها، لكن خليك فاكر إن حتى في الأوقات الصعبة بيبقى فيه فرص ممكن تستغلها.. عشان كده لما الأمور واخدة وقت طويل عشان تحقق أهدافك فماتقعدش تشتكي وتندب حاول بس تستغل الظروف وتستفد منها وتوجها ناحية تحقيق أحلامك.

وفي النهاية افتكر دايما إن الفرص أغلب الوقت بتبقى مستخبية ومحدش بيشوفها وإنك ممكن تتعلم تدور عليها وتحاول تتأقلم وتتعلم من فشلك وتتعرف عليها وتستغلها.