هل زمن المدربين التاريخيين انتهى؟
السؤال ده بقى بيتردد كتير في الوسط الكروي هل زمن المدربين التاريخيين زي بيب جوارديولا ويورجن كلوب انتهى؟ ولا ده مجرد مرحلة طبيعية في كرة القدم؟ الحقيقة مش سهلة والموضوع أكبر من مجرد مدرب بيخرج من التدريب أو جيل بيخلص.
أكتر من 10 سنين في جيل من المدربين غيروا مفاهيم كرة القدم وقدموا لينا منافسة جميلة قعدنا نسنتناها كل اسبوع وكل موسم.
الجيل ده مش عادي
بيب جوارديولا من ساعة ما راح مانشستر سيتي سنة 2016 عمل ثورة كاملة في طريقة اللعب وكسب مع الفريق أكتر من 6 بطولات دوري إنجليزي ودوري أبطال وحقق أرقام قياسية زي أول فريق يوصل لـ100 نقطة في موسم واحد ده غير إنه غيّر شكل الكرة نفسها من “تيكي تاكا” لمرونة تكتيكية رهيبة.
وفي الناحية التانية كلوب عمل نفس التأثير تقريبًا بس بأسلوب مختلف الضغط العالي أو الـ“gegenpressing” اللي خلّى ليفربول واحد من أخطر الفرق في أوروبا لسنين طويلة
يعني إحنا بنتكلم عن جيل مش بس ناجح.. ده جيل مؤثر في اللعبة كلها.
وغيرهم من المدربين اللي كلنا اتربينا على تغيرهم للكرة زي أنطونيو كونتي.. كارلو أنشيلوتي وجوزيه مورينيو واضح أنهم في سنينهم الأخيرة لمسيرة كبيرة.
لكن بعد كده الأمور بدأت تتغير.. كلوب قرر يسيب التدريب بعد تجربة طويلة وصرّح إنه فقد حياته الطبيعية بسبب الضغط وقال إنه مش متخيل يرجع للتدريب تاني وجوارديولا لسه مع مانشستر سيتي لكن التقارير بدأت تقول إن فيه حالة إرهاق واضحة وإن النادي نفسه بيفكر في بدائل لو قرر يمشي.
هل ده نهاية طبيعية؟
اللي بيحصل ده مش سقوط.. كرة القدم طول عمرها بتشتغل بدورات زمان كان فيه جيل أرسين فينجر وأليكس فيرجسون وبعدهم جه جيل جوارديولا وكلوب ودلوقتي إحنا قدام جيل جديد بيطلع والفرق إن التغيير المرة دي أسرع.
واحدة من أهم الحاجات إن فكرة المدرب نفسها اتغيرت زمان المدرب كان صاحب القرار المطلق العقل التكتيكي والقائد لكل حاجة.. دلوقتي الأندية الكبيرة بقت مؤسسات كاملة مدير رياضي و فريق تحليل و Dataو Scouting إدارة أداء يعني المدرب مبقاش هو السلطة الوحيدة زي زمان .
كمان.. الجيل الجديد من المدربين طالع من تلاميذ الجيل القديم.. ولو بصيت حوالين جوارديولا هتلاقي إن أغلب المدربين الجداد طالعين من مدرسته ميكيل أرتيتا فينسنت كومباني وتشابي ألونسو ده معناه إن الجيل القديم مش بيختفي.. هو بيتحوّل.
وفي الوقت نفسه شكل اللعبة نفسها بيتغير أرتيتا مع أرسنال بيقدم نموذج مختلف شوية عن مدرسة جوارديولا بيعتمد أكتر على التنظيم والدقة والكرات الثابتة وده خلا ناس كتير تقول إن فيه تحول في فلسفة اللعب نفسها.
النهاية مش سقوط
اللي بيحصل مش سقوط لبيب وكلوب.. ده نهاية عصر المدرب الأيقونة وبداية عصر المنظومة زمان كنت بتبني نادي حوالين مدرب واحد دلوقتي بتبني نظام والمدرب جزء منه.
الخلاصة إن كرة القدم مش بتقف كل جيل بيعتقد إنه الأعظم.. لحد ما ييجي جيل بعده يغير كل حاجة وبعد 10 سنين الناس هتتكلم عن أرتيتا أو كومباني بنفس الطريقة اللي بنتكلم بيها عن جوارديولا وكلوب دلوقتي وساعتها هنرجع نسأل نفس السؤال من جديد هل حقبة المدربين التاريخيين انتهت؟
