هل فريق أرسنال بيقدم كرة مملة.. ولا بيلعب بذكاء والسهل الممتنع؟

بعد ماتش أرسنال وتشيلسي في الدوري الإنجليزي.. واللي خلّى الجانرز يكملوا في الصدارة.. الدنيا اتقلبت فجأة.. مش بسبب النتيجة.. لكن بسبب طريقة اللعب.

والأسطورة الهولندي رود خوليت خرج منفعل في الاستوديو وقال إنه قرر يبطل يتفرج على كورة.. ووصف المباراة إنها قليلة أوي.. واتهم اللاعبين إنهم بيتعمدوا يجيبوا ركنيات عشان يكسبوا.. ومن هنا بدأ السؤال الكبير.. هل أرسنال بقى فريق ممل فعلًا؟

 كرة حلوة ولا كورة حسابات؟

لو أنت بتحب الكورة السلسة.. التمريرات القصيرة.. الهجمات السريعة.. والفرص اللي تيجي من لعب مفتوح.. طبيعي تحس إن ماتش زي ده مش على مزاجك.

أرسنال كسب.. وده الأهم في جدول الدوري.. لكن كمشجع بتحب المتعة.. نفسك تشوف لعب مفتوح أكتر.. مهارة أكتر.. إبداع يخليك تقوم من على الكنبة.

الفريق بقى بيعتمد بشكل واضح على الكرات الثابتة.. خصوصًا الركنيات.. وده اللي خلّى ناس كتير تقول إن الأداء بقى محسوب زيادة عن اللزوم.

الأرقام بتتكلم

من أصل 783 هدف اتسجلوا في الدوري.. 138 هدف جايين من ركنيات.. وده أعلى رقم في تاريخ البريميرليج في موسم واحد.. وأرسنال لوحده سجل 16 هدف من ركنيات في موسم 2025–26.. رقم قياسي للنادي.. ومتعدي أرقام فرق كبيرة في مواسم سابقة.

الأرقام دي بتوضح إن الموضوع مش صدفة.. ده سلاح تكتيكي أساسي في خطة أرتيتا.. بس السؤال.. هل الاعتماد على الركنيات يخلي اللعب أقل متعة؟

أرتيتا.. من المتعة للواقعية

لما ميكيل أرتيتا مسك الفريق.. كان هدفه الأول يرجّع الاستقرار والشخصية.. وفي البداية أرسنال كان بيلعب كورة ممتعة فعلًا.. تمريرات كويسة.. سيطرة.. شكل جميل يخليك تفتكر أيام زمان.

لكن مع الوقت أرتيتا فهم إن الفرق اللي بتقفل الملعب مش هتتفتح بسهولة.. وإن اللعب المفتوح لوحده مش كفاية.

من هنا بدأ التركيز على التفاصيل الصغيرة.. الركنيات.. الضربات الحرة.. التنظيم الدفاعي.. وحتى التعاقد مع مدرب متخصص في الكرات الثابتة بقى جزء أساسي من المشروع.

الفكرة بسيطة.. ولو مش هتكسب باللعب المفتوح.. اكسب بأي طريقة قانونية تضمن لك الثلاث نقاط.

مؤيدين ومعارضين

أرتيتا نفسه قال إنه مش مهتم بكلام الناس.. لكنه اعترف إنه يتمنى يشوف أهداف أكتر من لعب مفتوح.
وباتريك فيييرا وإيمانويل بتيت شافوا إن الفوز أهم من أي حاجة.. وإن اللي بيكسب الدوري مش دايمًا هو الأمتع.. لكن الأذكى.

في المقابل.. يايا توريه قال إن الاعتماد الكبير على الركنيات محبط.. وإن المتعة قلت.. ومدربين زي فابيان هورزيلر اشتكوا من إضاعة الوقت قبل تنفيذ الركنيات.. وطالبوا بقوانين أكثر صرامة.

يعني الخلاف مش بسيط.. ده نقاش حقيقي حوالين شكل الكورة الحديثة نفسها.

ممل ولا متطور؟

أرسنال مش فريق ضعيف.. ومش بيلعب كورة سلبية.. هو بس اختار طريق مختلف.. طريق قائم على التفاصيل.. والاستفادة من كل فرصة ثابتة ممكنة.. في زمن بقى كله تحليل وأرقام.. طبيعي اللعبة تتغير.. لكن هل التغيير ده بييجي على حساب المتعة؟

الذكاء التنظيمي 

في النهاية أرسنال ممكن ما يكونش الأمتع في عيون البعض.. لكن أكيد من أكتر الفرق ذكاءً وتنظيمًا الموسم ده.. السؤال الحقيقي مش هل أرسنال ممل.. السؤال إحنا عايزين كورة ممتعة بس.. ولا كورة تكسب بطولات؟

لأن في الآخر.. اللي بيرفع الكاس محدش بيفتكر كان جايبه من لعب مفتوح.. ولا من ركنية.