هل فعلًا القمر الكامل بيأثر علينا؟

لو فيه في حياتك حد قالك قبل كده إن أنت متعصب عشان النهاردة Fullmoon
أو المشكلة دي سببها الـ Fullmoon أو مثلا كان ده مبرره لأي سلوك غريب بيحصل حواليك.. وأنت مش فاهم أصلًا إيه الفول بالليمون ده  يبقى الموضوع ده عشانك!
وهنقولك إيه هو القمر الكامل وهل فعلًا بيأثر علينا ولا لأ وفقًا لموقع verywellmind

مبدأيًا كده أسطورة القمر الكامل بترجع لزمان أوي.. للقرن الأول تقريبًا لما افترض الفيلسوف اليوناني” أرسطو” والمؤرخ الروماني “بليني الأكبر” أن اكتمال القمر بيسبب الجنون في جميع أنحاء العالم وكل مكان بينوره القمر.. وكان مصدر الفرضية دي اعتقادهم أن الدماغ رطبة فبالتالي هتتأثر بالقمر زي ما المياه بتتأثر بيه.. وممكن تسبب نوبات جنون أو صرع للبشر.

وفي السبعينات بعض المفكرين اعتمدوا على نظريتهم القديمة من ضمنهم الدكتور “أرنولد ليبر” وافترض في كتابه أن جسم الإنسان بيتكون من 70٪ من المايه فطالما كده يبقى البشر بيحصلهم تحولات زي المد والجزر اللي بيسببه القمر بالظبط.. وقال كمان إن كتير من حالات القتل والانتحار والحوادث بتحصل أغلبها وقت اكتمال القمر.

لكن الخبراء رفضوا الموضوع ده وفي دراسة أثبتت رفضها للنظرية.. وقالت إن السبب أن قوة الجاذبية الأرضية أقوى بـ 5012 مرة من قوة جاذبية القمر.. وقالت كمان إن القمر ممكن يعمل تأثير المد والجزر لكنه مبيأثرش على كوباية مايه أو على جسم الإنسان!

ايوه يعني كده في تأثير ليه ولا لا؟.. هنقولك دلوقتي
علماء الفلك والفيزياء وعلماء النفس استنتجوا كلهم أن السلوك البشري مابيرتبطش باكتمال القمر في حاجة.. 

وفي سنة 1985 الباحثين راجعوا 37 دراسة قارنوا فيها دورات القمر بحالات الاتصال بمراكز الأزمات و الانتحار والجرائم والقضايا النفسية.. والنتيجة كانت إن مفيش علاقة بين القمر وبين الحالات دي!.. بالعكس لقوا إن حالات القتل اللي حصلت والقمر مكتمل كانت أقل من العادي.

طيب طالما طلع مالوش تفسير.. ليه في ناس لسة فاكرة إن ليه تأثير علينا؟
يمكن عشان الاعتقاد بوجود علاقة بين القمر والسلوك بقاله آلاف السنين فصعب تغير حاجة اترسخت في أجيال كتيرة.. ده غير إن في دراسات لقت إن القمر الكامل زمان بسبب شدة ضوئه كان بيخلي الناس متعرفش تنام كويس فبالتالي كانوا بيتحرموا من النوم وبيحصلهم تقلبات في المزاج بتأثر على سلوكهم!

وفي دراسات كمان دلوقتي اكتشفت وجود علاقة بين النوم وتأثره بدورة القمر.. فيمكن الحاجات دي تكون السبب في التغيرات السلوكية اللي بتحصلنا!
وفي خبراء شافوا إن المعتقدات دي سببها الارتباط الوهمي في دماغ الناس بوجود علاقة بين القمر والسلوك فبالتالي بيبقى عندهم تحيز للحاجات اللي بتدعم معتقداتهم أكتر من الحاجات المنطقية اللي مابتدعمش معتقداتهم.. فبالتالي مابيقتنعوش إن مفيش علاقة بين القمر والسلوك بل بالعكس بيربطوا أي سلوك غريب بالقمر وبيفضل متعلق في دماغهم دايمًا.

ده غير إن وفقًا لدار الإفتاء.. الأيام اللي بيكتمل فيها القمر وبيكون بدر وكامل استدارته وبياضه اسمها “الأيام البيض” وهي أيام 13 و 14 و 15 من وسط كل شهر عربي.. وبيتم فيها الصيام وفقًا للأحاديث النبوية يعني الأيام دي ليها مكانة في الإسلام..

فالمرة الجاية بقى اللي حد يقولك فيها على الـ Fullmoon عرفه المعلومات دي وقوله حاجة واحدة بس.. إن شاء الله خير