هل فعلًا نضارات الشمس بتحمينا في الصيف؟

مع بداية فترة الصيف وزيادة نسبة الرطوبة والحر بنلاقي نفسنا مش قادرين نمشي في الشارع وحتى مش عارفين نفتح عينينا من شدة حرارة الشمس.. فبنلجأ إننا نلبس نضارة شمس أو كاب عشان نحمي نفسنا من الحر حتى لو شوية صغيرين.. بس هل فعلا النضارات بتقدر تحمينا.. عشان كده هنقولك في الموضوع ده الإجابة
وفقا لموقع piedmont وموقع  health.clevelandclinic


دكتور العيون “إليوت ليفين” بيقول إن صحيح نضارات الشمس مرتبطة بالأزياء وفي جزء كبير من الناس بيلبسوها عشان كده..
لكن النضارات ليها فوايد صحية مهمة ومش بتحمينا في فصل الصيف بس لا بتحمينا كمان في كل الفصول ومن أهم فوايدها:

– إنها بتحمي العين من الأشعة الفوق بنفسجية اللي ممكن تسبب أضرار شديدة وأمراض مع الوقت للعين.
-وبتحمي كمان البشرة الحساسة حوالين العين من الشيخوخة والتجاعيد وده لإن جلد الجفن هو أرق جلد في الجسم فبالتالي بيتأثر أكتر بأشعة الشمس.

وكمان ليها فوايد تانية زي:
– تقليل الصداع النصفي الناتج عن أشعة الشمس المباشرة

-تقليل إجهاد العين وحمايتها من الرياح والتراب

-بتساعد في الحماية من أمراض العين زي مرض إعتام عدسة العين والضمور البقعي اللي ليهم أسباب مختلفة.

طيب إزاي تختار نضارة شمس حمايتها كبيرة؟

-لازم تتأكد إن النضارة بتحمي 100% من أشعة الشمس البنفسجية وبتقدر تحجب الأشعة فوق البنفسجية من فئة A وB وده بيكون عنصر أهم من شكل النضارة أو لونها أو سعرها.. وبتعرف المعلومة دي لإنها بتكون مطبوعة على كارت النضارة أو بيكون من خلال الاستيكر اللي ملزوق على العدسات.

– لون العدسات مهم يكون أصفر غامق أو بني لو كان عندك مرض في عينيك زي الضمور البقعي أو مرض اعتلال الشبكية السكري اللي بيسببه مرض السكر لأن الألوان دي بتخلي تباين الألوان أحسن فالرؤية بتكون أوضح.

-ولو أنت بتسوق ممكن تلبس عدسات بني أو رمادي أو أخضر وأصفر لأن الألوان دي بتقلل تشويه الألوان.

-لو أنت شخص بتلبس نضارة نظر ممكن تختار النضارات المصنوعة من البولي كربونات وبتكون بلاستيك وخفيفة بس ليها حماية أفضل من الأشعة البنفسجية أو نوع العدسات اللي بيتغير لونها في الشمس فممكن تسأل دكتورك ويقولك أحسن نوع مناسب ليك.