هل نجوم الكرة النسائية في برشلونة أغنى من اللاعيبة الرجالة في الليجا؟
في الفترة الأخيرة “بورخا إيجيليس” لاعب سيلتا فيجو عمل جدل كبير بعد تصريح قال فيه إن لاعبتين زي آيتانا بونماتي وألكسيا بوتياس ثنائي برشلونة “بيكسبوا من الكورة أكتر منه” رغم إنه لاعب في الدوري الإسباني للرجالة.
التصريح ده انتشر بسرعة على السوشيال ميديا وخلّى ناس كتير تقف وتسأل إزاي لاعبات ممكن يكسبوا أكتر من لاعبين؟.. وهل ده فعلاً حقيقي ولا فيه تفاصيل تانية ورا الصورة؟
ومن هنا بدأ النقاش يكبر مش بس عن الرواتب اللي الأندية بتدفعها لكن كمان عن حاجات تانية بقت مهمة جدًا في الكورة دلوقتي زي الإعلانات والرعايات والتأثير الإعلامي واللي في أوقات كتير بتفرق أكتر من المرتب نفسه.
اللي واضح من التصريح مش بالضرورة إن المقصود راتب النادي الرسمي بس لكن القيمة التجارية والتأثير الإعلامي اللي بتجي مع وجودك كلاعب أو لاعبة على الساحة العالمية.
مين هما دول؟
“آيتانا بونماتي” هي أعلى لاعبة أجراً في العالم سنة 2026 تقريبًا بحوالي 950 ألف يورو سنويًا في عقدها مع برشلونة وده رقم كبير في الكورة النسائية وعلى نفس السكة “ألكسيا بوتياس” بتتقاضى حوالي 667 ألف يورو سنويًا لوحدها علشان مستوياتها وتأثيرها في الملعب.
الاتنين دول مش اسمين عشوائيين دول لاعبات مستوى عالمي فازوا بالبطولات وجوائز فردية ودي عناصر بتزود القيمة التجارية بتاعتهم عند الأندية والبراندات والشركات اللي بتشتغل معاهم.
الفجوة كبيرة
لو جينا نقارن الأجر السنوي الرسمي بين أعلى لاعبات في النسائية وأعلى لاعبين في الرجالية الفرق بيبقى واضح جدًا
أعلى لاعبة النسائية في العالم ممكن تقرب من €950,000 سنويًا “آيتانا” لكن في المقابل لاعبين في البطولات الكبرى الرجالية زي البريمرليج أو الليجا بيتقاضوا ملايين يورو في السنة متوسط لاعب في البريمرليج ممكن يوصل 3 مليون جنيه إسترليني سنويًا يعني أعلى من معظم لاعبات النسائية بنحو أضعاف كثيرة.
ده يعني إن من ناحية الراتب الرسمي فقط الرجالة في المقدمة بخط كبير جدًا سواء في أعلى القمة أو حتى في لاعبين وسط الجدول.
مش بس أعلى الرواتب بتختلف لكن كمان متوسط الدخل العام.. تقرير رسمي من فيفا قال إن متوسط راتب لاعبة كرة قدم محترفة في العالم مش نجمة ولا حاجة حوالي 10,900 دولار في السنة فقط وده رقم ضئيل جدًا ويورّي قد ايه الفجوة كبيرة في القاعدة اللي بتحت النجوم.
في المقابل لاعبين حتى في بطولات متوسطة الرجالية بيتقاضوا أضعاف الرقم ده لأن اللعبة الرجالية بتولد إيرادات ضخمة من حقوق البث والتذاكر والرعايات في أغلب الدوريات الكبيرة.
القيمة التجارية وتأثير الإعلام
هنا بييجي الجزء المهم في تصريح بورخا يمكن لاعبة النسائية ما تكسبش في الراتب الرسمي زي لاعبين كبار في الرجالة لكن ممكن تعمل أكتر في القيمة التجارية بطرق تانية.
قيمة الاسم في السوق عند الشركات عند رعايات كبيرة.. بيع التيشيرتات والبضايع اللي عليها اسم اللاعبة.. ظهور إعلامي عالمي في إعلانات وحملات دعائية.. حفلات ومناسبات وشراكات مع براندات عالمية.
لما شركة زي أديداس أو نايكي تعمل صفقة مع نجمة الكورة النسائية لإنها بتشوف فيها قيمة تجارية عالية وده بيخلي اللاعبة تكسب من عقود إضافية بخلاف راتب النادي ده ممكن يخلي دخلك الكلي من الكورة (راتب + رعايات + إعلانات) أعلى من شوية لاعبين رجالة متوسطين اللي ممكن يكونوا مكسبين رواتب عالية بس من النادي ونقصان في الإعلانات.
وده اللي تفسيره منطقي لكلام بورخا لما قال إن لاعبتين دول “بيعملوا أكتر منه”.. مش عن طريق الراتب الرسمي بس لكن من الكل في الكل القيمة التجارية + التأثير + الرعايات + الشهرة.
ليه دايمًا هنلاقي فرق؟
رغم النمو الكبير اللي بتحققه كرة القدم النسائية في السنين الأخيرة الفجوة لسه ضخمة، وده ليه أسباب واضحة الدوريات الرجالية بتجذب مليارات دولار في حقوق البث والتذاكر والرعايات وده بيكبر السوق ويخلّي اللاعبين يكسبوا أعلى بفرق كبير جدًا.
حتى مع النمو المستمر متابعي مباريات الكورة الرجالية حول العالم لسه أعلى من النسائية في أغلب الأحيان وده بيأثر على قيمة سوق البث والتذاكر.
اللعبة الرجالية موجودة كمصدر دخل احترافي عالي منذ عشرات السنين بينما النسائية اتجهت للاحتراف بقوة في آخر عقد تقريبًا فقط وده خلا الفجوة التاريخية لسه واضحة في الأجر العام.
لو الحكم على الفلوس المعروضة من الرواتب فقط، لا لاعبات النسائية ما بيكسبوش أكتر من لاعبين كبار في الرجالة لكن لو شامل القيمة التجارية + الرعايات + البضائع + الحملات الإعلامية.. وممكن أحيانًا لاعبة يكون عندها صفقات تجارية وتكسب إجمالاً أكثر من لاعب متوسط في الرجالة.
يعني ممكن تشوف لاعبة زي آيتانا في عقود رعاية كبيرة مع شركات عالمية والدخل الكلي بتاعها في سنة معينة في بعض الحالات يقرب أو يتفوق على دخل لاعب متوسط من رجالة لو الأخير مش مشهور تجاريًا.
وبكده نقدر نقول إن الفجوة بين لاعيبة ولاعبات الكورة واقعية وجدّية من ناحية الأجر الرسمي لكن الدخول التجارية والإعلامية بدأت تقلّص الفرق في بعض الحالات.. وده اللي خلّى تصريح بورخا يكون جذاب للناس ويعمل ضجة كبيرة.
