هو إيه تاريخ منتخب مصر مع فرق مجموعته في كأس العالم.. ونعمل إيه عشان نصعد؟
عرفنا مجموعتنا في كأس العالم 2026 وهنكون مع بلجيكا وإيران ونيوزيلندا في المجموعة السابعة.. بس دايمًا فيه سؤال محتاجين نعرف إجابته وهو : التاريخ معاهم بيقول إيه؟
عشان كده عملنالكم ملخص واضح ومبسط لتاريخ مواجهات الفراعنة مع كل منتخب في المجموعة
نبدأ كده بالتقيل.. منتخب بلجيكا.. والمواجهات بين المنتخبين كانت قليلة نسبيًا لكن كلها تقريبًا في صالح مصر وده عامل ثقة للجمهور.. ولو رجعنا للتاريخ فعلًا هنلاقي أول فوز لمنتخب مصر كان سنة 1920 بنتيجة 4–2.
وفي سنة 1999 كسب منتخب مصر 1–0 في ماتشات استعدادًا لكأس القارات.. وفي القاهرة سنة 2005 مصر قدّمت واحدة من أقوى الماتشات وكسبت بلجيكا بنتيجة كبيرة وهي 4–0 ودي حاجة حلوة تحسب للجيل ده وقتها بس في 2018 بلجيكا ردّت علينا بفوزها بنتيجة 3–0 قبل كأس العالم 2018 اللي اتلعبت في روسيا
وآخر الماتشات اللي كانت بين مصر وبلجيكا في سنة 2022 وخلصت بفوز مصر 2–1 ووقتها الأداء خلّى الناس تقول إننا نقدر نكسب المنتخبات الكبيرة.. عادي جدًا لأن المستحيل مش صعب.. يعني كده نقدر نقول أن الإجمالي لعبنا 5 ماتشات ضد بلجيكا ومصر كسبت 4 مرات مقابل خسارة واحدة.. وده كويس جدًا لما نيجي نتكلم عن منتخب زي بلجيكا
أما بقى تاريخ المواجهات ضد منتخب إيران اللي في الأغلب بيكون موجود في كأس العالم فكانت المواجهات قليلة جدًا لكن بيكون فيها ندّية واضحة.. يعني أول ماتش سنة 1975 ودي كانت مباراة ودية دولية وكسبت إيران بنتيجة 2-1 والماتش التاني سنة 2000 الوقت الأصلي خلص تعادل 1–1 قبل أن يحسمها منتخب مصر بركلات الترجيح
وأخيرًا بقى مصر ضد نيوزيلندا إيجابي جدًا لصالح الفراعنة عشان المنتخبان لعبوا 3 مباريات قبل كدة مصر كسبت في مباراتي وتعادلت في واحدة من غير أي خسارة ودى حاجة برضه كويسة
نعمل إيه عشان نتأهل من المجموعة؟
ناس كتير بتسأل إيه السيناريوهات اللي ممكن يعملها منتخب مصر عشان يتأهل من المجموعة دي ؟ ورغم اختلاف السيناريوهات إلا إن كل مركز في دور المجموعات بيحمل تحديات وفرص مختلفة للفراعنة وبيحدد بشكل مباشر هوية المنافس في دور الـ32
مبدأيًا كده مصر هتبدأ مبارياتها في البطولة بمواجهة بلجيكا يوم 15 يونيو 2026 في سياتل بأمريكا الساعة 10 مساءً بتوقيت القاهرة وبعدها نيوزيلندا 22 يونيو في فانكوفر بكندا بس بتوقيتنا في القاهرة الساعة 4 صباحًا “الفجر يعني” وأخر ماتش في المجموعات ضد إيران هيكون في سياتل بأمريكا 27 يونيو بس الساعة 6 الصبح بتوقيت القاهرة.
ولو بصينا على نظام البطولة.. فطريق منتخب مصر في الأدوار الإقصائية هيبقى مرتبط بالمركز اللي يخلص فيه المجموعة فـ لو الفراعنة صعدوا تاني المجموعة هيلعبوا مع وصيف المجموعة الرابعة واللي موجود فيها منتخبات زي أمريكا وباراجواي وأستراليا.. ومعاهم مقعد جاي من الملحق الأوروبي بين تركيا ورومانيا وسلوفاكيا وكوسوفو
أما لو مصر قدرت تتصدر المجموعة وتطلع أول فالمواجهة في دور الـ32 هتكون أسهل شوية لأن الخصم وقتها هيبقى ثالث واحد من المجموعات: الأولى أو الخامسة أو السابعة أو الثامنة أو التاسعة وده معناه إن مستوى المنافسين هيكون متنوع وممكن يفتح الطريق قدّام المنتخب إنه يكمل لقدّام
لكن في حالة إن مصر لقدر الله يعني صعدت ثالث المجموعة.. فهنا التحدي هيكون أكبر لأن المنتخب وقتها هيلعب يا إمّا مع أول المجموعة التانية اللي فيها كندا وقطر وسويسرا ومعاهم مقعد أوروبي الأقرب له منتخب إيطاليا.. أو هيلعب مع أول المجموعة التاسعة اللي على رأسها فرنسا أحد أبرز المرشحين للقب
بكده يبقى طريق مصر في المونديال فيه تحديات مختلفة بس يفضل الأمل موجود إن الفراعنة يقدروا يكتبوا صفحة جديدة ومهمة في تاريخهم بكأس العالم.
