هو احنا بنتخطى الحزن ولا بنتعايش معاه ؟

كتبت: ندى خالد

لما بنفقد حد عزيز علينا أو نخسر صديق كان قريب مننا أو بننهي علاقة كانت مهمة فى حياتنا أيا كانت نوع العلاقة، بنحزن فترات طويلة وبنحاول ننسى بس مبنعرفش فبنبدأ نسأل الناس اللي حوالينا المفروض نعمل ايه أو من غير ما نسأل أصلا بنلاقيهم بيقولولنا كبروا دماغكوا و موفوا اون و لما بيلاقونا بنضحك شوية بيقولولنا برافوا عليكوا تخطيتوا و كأننا هندوس على زرار ونمسح كل ذكرياتنا مع الناس اللي بنحبها هل هما مدركين إن فكرة نسيان شخص عزيز دي أصلا فكرة حزينة؟ وهل لو عملنا كده فعلا عقلنا هينسى بسهولة؟ طيب قلبنا؟

علشان كده هنقولكوا فى المقالة دي ايه الفرق بين moving on و moving forward طبقا لمدونة the ralph site

الـ Moving on: معناه الحرفي تخطي شيء أو نسيانه أو بالبلدي كده أنك ترمي ورا ضهرك وتكمل فى حياتك طيب ماذا لو كان الشخص ده فعلا مهم عندك حد من أفراد أسرتك حد كان قريب منك لسنين طويلة أو حتى فترة قصيرة بس أنت متعلق بيه أو حتى حيوان أليف  كنت مربيه من وأنت صغير

 مدرك أصلا فكرة أنك عمرك ما هتعوض الخسارة دي مهما عملت بالطرق اللي الناس بتقولها!

ومن أشهر الناس اللي اتكلموا عن الموضوع ده Nora McInerny فى Ted talk سنة 2018م وحكت فيه عن تجربتها اللي فقدت فيها 3 أشخاص عزيزة عليها ورا بعض هما ابنها وجوزها وباباها وكانت بتقول فيه اننا عمرنا ما بننسى الحزن أو نتخطاه احنا بس بنتعايش معاه talk لو حابين تشوفوها:

و Nora بتقول إن من الأفضل نتكلم عن الـ moving forward فى حياتنا بدل ما نتكلم عن الـ moving on لأنه واقعي أكتر خاصة بعد ما بيحصلنا حاجة معداش عليها وقت طويل لأننا بنفضل متعلقين بيها وبنحبها وبنفضل متوقعين إنها هترجعلنا تاني ونعمل كل الحاجات اللي كنا بنعملها قبل كده حتى لما بتيجي سيرتها بنفضل نتكلم عليها على إنها حاجة لسه موجودة وكأنها مبقتش فى الماضي.

لأن أى حاجة مرت فى حياتنا حتى لو كانت لفترة بسيطة هى بالتأكيد ساعدت فى تغيرنا و صنعت مننا شيء جديد وأضافت فى حياتنا وتشكيل شخصيتنا تجارب وذكريات منقدرش ننساها أبدا لأننا عمرنا ما هنكون نفس الشخص لو مكناش مرينا بكل تجارب الماضي فإزاي هننسى حاجة غيرت فينا!

والـ moving forward: معناه التعايش والتأقلم مع الوضع اللي حوالينا وإننا نستفاد ونتعلم منه مش مجرد أننا نعمل نفسنا نسيناه وتخطيناه وهو لسه جوانا.

احنا أكيد صعب علينا تقبل فكرة إننا هنعيش من غير حبايبنا اللي فقدناهم بس على الأقل لازم نحاول نتعايش معاها صحيح الفكرة قاسية وصعب تقبلها بس احنا معندناش خيار تاني الحياة كده كده بتستمر مهما حزنا فلازم نحاول نتعايش فيها ونقدر الحاجات اللي لسه معانا بس نعمل ده بالطرق المناسبة من غير ما نضحك على نفسنا ولا نضغط عليها.

دكتور Lois Tonkin كان بيدرس نموذج “النمو حول الحزن” لأكتر من 20 سنة وكان بيشرح فيه ازاي بنتعايش مع الخسارات اللي بنمر بيها أو نتجاوزها.

ودكتورLois فى النموذج ده بيعارض فكرة إن الوقت بيداوي كل جرح وبيخليه يختفي مع الزمن وبيقولنا إن ده كلام مش صحيح لأن اللي بيحصل إن الجرح بيفضل موجود زى ماهو احنا بس بعد ما يعدي فترة كبيرة بننمو ونتطور حواليه! 

هنتعرف على ناس جديدة ونمارس هوايات بنحبها وهنجرب نروح أماكن جديدة ونأكل أكلات جديدة وبالتالي هيكون عندنا تجارب جديدة وهنخلق لحظات سعادة جديدة حوالينا فا هتكبر دايرتنا شوية كل ما نعمل حاجات جديدة والحزن ساعتها هيفضل موجود ومش هيختفي و احتمال كمان يرجع يكبر تاني فى أوقات الحزن اللي هنمر بيها لأنها مشاعر طبيعية بتفضل موجودة فى كل وقت حتى لو حسينا أننا مبسوطين شويتين لكنه مش هيفضل هو اللي مسيطر على دايرتنا.

محتاجين نعرف إن الحزن بيمثل جزء كبير من سلامة صحتنا النفسية لأن الإنسان مينفعش يبقى سعيد على طول لازم يبقى فى توازن في حياته ومن أكتر الأفلام اللي اتكلمت عن الموضوع ده هو فيلم فيلم inside out اللي أتعمل سنة 2015م على الرغم من إنه فيلم animation لكنه ناقش الموضوع بطريقة عبقرية جدا وخلانا نعرف إننا مش محتاجين نبقى مبسوطين دايما علشان حياتنا تبقى حلوة بالعكس وجود المشاعر المختلفة هو اللي بيعمل توازن لحياتنا ومحاولة فرض السعادة على نفسنا بيخلينا أشخاص غاضبين ويائسين لأننا مش هنقدر نخلي نفسنا بنفس المشاعر طول الوقت وكمان الفيلم عرفنا إن من غير مشاعر الحزن هنفقد القدرة على التعاطف مع الأحداث اللي بتحصل حوالينا وكمان هنفقد تعاطف اللي حوالينا معانا ورغبتهم فى مساعدتنا.

فليه ما نتبسطش ونقول إننا مميزين لأننا عندنا حاجة مش عند حد تانى وهى الحزن اللي بيخلينا نحتفظ بحبنا للي فارقونا جوانا ونفتكر الذكريات دي ونتبسط بدل ما نرمي الحب ده ورانا، وفى الأخر حابين نقولكوا أننا كبشر مختلفين فى حاجات كتير لكن الحاجة الوحيدة اللي كلنا مشتركين فيها هى مشاعرنا لأن مشاعرنا واحاسيسنا هى اللي بتميزنا فلازم نقدر المشاعر دي ونحترمها ونحاول منضغطش على نفسنا ونفهمها أننا هنبقى أقوى لو بطلنا نحس أو شخصيتنا بقت مختلفة لأن حتى أقوى شخص بتقابله فى حياتك هو فى الاخر إنسان ولما بيبقى لوحده مهما تظاهر بالقوة بيفتكر أحزانه وذكرياته القديمة وبيبقى أضعف مما تتخيل.