نحارب الروتين ونجدد.. ولا هو مفيد لينا؟

كلنا عندنا صراع أزلي اسمه محاربة الروتين.. بندور على أي حاجة جديدة نتشعلق فيها تحسسنا إننا عايشين بعيدا عن يومنا المكرر الممل..

وفيه ناس تانية تحب اليوم يتنفذ بنفس الخطة والروتين اللي متعودين عليه ولو حصل حاجة مفاجأة يتوتروا.. فاحنا دورنا ورا الموضوع عشان نعرف..فتعالوا نقولكم على شوية من فوائد الروتين حسب موقع northernhealthcare و verywellmind و webmd و pmc

1- تقليل التوتر:

وده لأن القلق مرتبط بالشئ المجهول.. أما الروتين بيدي إحساس بالتحكم والسيطرة.. على سبيل المثال العقل هيبقى عارف ان الشخص يدخل يغسل وشه يفطر ينزل شغله يرجع يقعد على الكنبة وهكذا. ده بيدي العقل استقرار وأمان.

2- تحسين الصحة العقلية:

الروتين كمان هيخفف الضغط من على المخ.. وهيوفر مجهود عليه يفكر ويقرر من جديد.

3- زيادة الإبداع:

زي ماقولنا بما إن بنوفر مجهود للعقل للتخطيط وحل المشاكل فهيكون مساحة للتطوير والتفكير وهتزيد فرص الإبداع وإننا نعمل حاجة أحسن ونحل مشاكلنا التانية وبالتالي حياتنا هتبقى أحسن.

4- الشعور بالإنجاز:

لما يومك يكون منظم بتزيد فرصك في إنجاز المهام أو الأنشطة اليومية حتى لو صغيرة هتحس إنك بتعمل حاجة وبيمنع إحساس التوهان واللخبطة وبالتبيعة الإنجاز بيعزز ثقتك بنفسك وبيحفزك. على سبيل المثال لو انا عارف ان عندي شغل وبعده مثلا هروح الجيم وبعده هاكل حاجة معينة وبعده همسك الموبايل وفي الآخر هنام في ميعاد ثابت فده بيدينا احساس اننا عملنا اللي ورانا.

5- الإحساس بالسعادة:

أنك تدخل تنام وتصحى في نفس الوقت كل يوم المعروف بالنوم النظيف وتحديد روتين لتوقيت البعد عن الشاشات بيساعد على تحسين المزاج وإفراز هرمونات السعادة والاسترخاء وبيقلل الإرهاق.

6- التربية السوية للأطفال:

الروتين في المراحل الأولى عن الطفل ويكون مواعيد أكل ونوم ثابتة ونكون في بيت واحد وشكل معين لليوم بيساعد على  الاستقرار ويقلل الاكتئاب بعد كده حسب دراسة علمية على طلاب صينيين وجدت أن وجود روتين أسري منذ الطفولة مرتبط بزيادة القدرة على تقليل التفكير السلبي مما يقلّل من احتمالات الإصابة بالاكتئاب في مرحلة الكلية.