هو الأكل الخالي من الجلوتين مُضر فعلًا ولا عادي؟
انتشر من فترة مصطلح “جلوتين فري”.. وإنه الأكل اللي فيه جلوتين بيزود من الوزن وبيعمل مشاكل في الهضم.
وده خلانا نشوف منتجات كتيرة في السوبر ماركت من غير جلوتين.. على اعتبار إنها كده “هيلثي”… بس هو الجلوتين مُضر فعلًا؟
من الأول كده.. هو يعني إيه جلوتين أصلًا؟
الـ”جلوتين” باختصار هو مصدر بروتينات موجودة في حبوب زي القمح والشعير.
وهو اللي بيدي القوام المتماسك للعيش أو المعجنات.. يعني هو السبب إن عجينة البيتزا بتتفرد معاك عادي.
الـ”جلوتين” نقدر نستخلصه من القمح وندخله في أكلات أو منتجات تانية كتير عشان نزود من قيمتها الغذائية ونديها طعم وقوام.
بيعمل إيه في جسمنا؟
جسمنا عنده “إنزيمات” بتقدر تكسر البروتين وتستفيد منه.. بس الجلوتين مش دايمًا بيتهضم بشكل كامل.
عند “بعض الناس ” الجلوتين بيتبقى منه جزء مش مهضوم في الأمعاء الدقيقة.. وده اللي ممكن يخلي ناس تشتكي منه وتحتاج تاكل حاجات جلوتين فري.
إمتى بيكون الجلوتين مُضر؟
الجلوتين مش مُضر عند أغلبية الناس.. لكن في حالات معينة ممكن يسبب مشاكل زي الحساسية مثلًا:
لو عندك حساسية من القمح ممكن ده يسبب لك أعراض فورية.. زي الطفح الجلدي أو ضيق التنفس.
أو في حالات زي مرض “السيلياك” وده بإختصار مرض مناعي.. الجسم بيعتبر الجلوتين عدو له وبيهاجم الأمعاء الدقيقة وده بيمنع بيمنع امتصاص الأكل كويس وبيعمل مشاكل صحية كتيرة وبيسبب أعراض زي الغثيان..الانتفاخ أو الصداع.
بس زي ما الجلوتين ممكن يكون مضر لناس معينين.. ده مايمنعش إنه له فوائد تانية.
فوائد الجلوتين إيه؟
زي إنه بيغذي “البكتيريا النافعة” اللى في جهازنا الهضمي.. ده غير إنه في دراسات بتقول إن الأشخاص اللى بياكلوا كمية كافية من حبوب القمح “بأشكالها” بيقلل عندهم نسب الإصابة بأمراض القلب والسكتة الدماغية.
في النهاية نقدر نقول إن الجلوتين مش مضر لكل الناس بس مضر لـ”شوية” منهم.
فا لو انت بتاكل عيش أو مخبوزات كتير وبتحس بعدها إنك مش مرتاح.. قلل شوية عشان صحتك.
