هو الألم آخر حاجة بتربطنا بالحدث أو الشيء أو الشخص؟
أوقات بتبقى قاعد مع نفسك وتقول “كل ده كان ليه؟” ولما بعدها تفكر في الموضوع بتلاقي إنك كل فترة بتفتكر نفس الموضوع أو عايز تفتكره.. فهل عمرك سألت نفسك ليه بتبقى عايز تفتكره؟
حسب psychcentral و verywellmind و psychologytoday و NIH
1- الألم العاطفي كذاكرة وربط بالحدث
مشاعر الحزن والألم غالبًا بتتحول لعلامة أو ربط بالحاجة اللي فقدناها.. وفي نظرية اسمها “Continuing bonds” بنلاقي إن الاحتفاظ بعلاقة مستمرة مع حاجة فقدتها مش لازم يكون حاجة مضرة.. عادي ممكن يكون تعبير صحي عن الاحتفاظ بهويتك واستمرارية المشاعر بعد ما فقدت الشيء أو زي ما بنقول “الذكريات”
2- طب هو مفيد على طول ولا ممكن يضر؟
- ساعات بيكون مفيد وده لما بيحفز المعالجة النفسية والحتة بتاع التقبل للي حصل واللي بيساعدك تتخطى وتمشي لقدام في حياتك وكمان تاخد بالك في اللي جاي فـ متقعش متلبسش نفس الخازوق تاني.. تلبس واحد جديد
- لكن لو ألم مستمر بدون تخطي وعلاج ممكن يتحول عبء نفسي وصحي كبار عليك وتقال وكمان هيبقى حمل داخلي يوقفك عند حاجات كتير متعرفش تعملها ويعطلك عن خطوات كتير ممكن تاخدها فهمنا هو مش مفيد خالص
3- الذاكرة الجسدية:
عندنا حاجة اسمها الذاكرة الجسدية “Body memories” ودي نفس الكلام بس مش حاجة معنوية هي حاجة كانت ملموسة وبتكمل معانا.. في أوقات بتفتكرها وتسترجع الشعور في نفس المكان بتاع الإصابة أو الحاجة الجسدية ودي بتحصل سواء بمزاجك أو بشكل لا واعي وليها تفاصيل كتير تانية لكن المهم إن ده بيفضل رابطنا بالحدث
4- ليه أصلا بنتمسك بالألم؟
– ممكن الألم يكون بيقدم إحساس بالأمان أو “هوية” لأنه حاجة مألوفة والاستمرار فيه بيخليك تتجنب مواجهة الجديد أو المجازفة
– فيه أحاسيس زي الاستياء أو أو الحقد بيديك مساحة تحس بالقوة والسيطرة على الموضوع ده نفسه والتحكم فيه
5- ساعات بيكون التمسك مفيد
فيه حالات كتير زي إنك فقدت شخص من الحياة عمومًا يعني مات فساعتها إنك تتمسك بالذكريات والألم وكل المشاعر بيكون ضروري لأنه كان جزء منك ومن حياتك فلازم تعمل كده
6- إزاي تسيبه لو هو مضر؟
- أول حاجة لازم تتقبل الواقع زي ماهو وتشوفه على حقيقته.. يعني المواجهة من الآخر ووصف الشيء على ماهو عليه وعلى حقيقته
- التعبير بطريقة صح وصحية من خلال بقى الحكي أو الكتابة أو أي طريقة بتحبها
- الانفتاح على الجديد بهوايات وأهداف جديدة وعلاقات جديدة وتنمية الذات وتفتح مساحة لأحداث جديدة وذكريات جديدة
في النهاية الموضوع معقد حبتين ممكن يكون صح وممكن يكون غلط فلازم تحاول تدرك شوية هو انت فين من دول؟ عشان تقدر تتصرف وتاخد القرار الصح في الموضوع
