هو الـ “Perfectionism” مقبرة الإبداع؟
كتب: محمد حاتم
عمرك بعد ما خلصت اللي في إيدك وسلمته بصتله وقولت يا خسارة لو كان فيه وقت أكتر كنت هطلعه أحسن؟ هو أكيد لو كنت اشتغلت فيه وقت أكتر كنت هتطلعه أحسن… بس خلينا نتخيل لو معاك الوقت اللي انت عاوزه مافيش حد هيستعجلك خالص.. هل هتخلصه أصلاً؟ غالبًا هتفضل تعدل وعمره ما هيخلص لحد ما يستنزفك كلك.. بس خليني أحكيلك حكاية هتخليك تبص على الموضوع من ناحية تانية
كان فيه واحد اسمه “Richard Williams” بيشتغل رسام قرأ في مرة كتاب عن مغامرات الـ “ملا نصر الدين” الفريدة فـ جاتله فكرة إنه يعمل عنه فيلم كرتون وفعلًا بدأ في الشغل مع نفسه لأنه كان صعب التمويل وكانت طريقته مكلفة وغالية لأي شركة إنتاج.
وبدأ كمان يصرف من فلوس شغله التاني وكان المتعارف عليه في مجال الرسوم المتحركة
إنه بيترسم 12 رسمة في الثانية للسرعة “فريمات الفيلم” ودي حاجة معروفة في مجال الرسوم المتحركة وتقليل تكاليف الإنتاج لكنه خلاها 24 رسمة في الثانية عشان كان عاوز يطلع أحسن طريقة ممكنة لعرضه وكان بيفضل في كل رسمة كأنها لوحة بياخد وقت في تفاصيلها أكتر من العادي بكتير
وفضل شغال عليه تقريباً 25 سنة لحد ما ديزني وافقت إنها تمول المشروع وتنتجه واشتغل عليه معاهم وفضل مكمل بنفس الطريقة حتى مع الفريق اللي تحته وكان بيضغط عليهم دايمًا وعدى الفلوس اللي كانت متخصصة ليه وكمان ماسلمهمش في الوقت المحدد زائد إنه طلع فيلم علاء الدين
اللي كان شبهه في الستايل فحط ضغط أكتر على الاستوديو فـ مكانش ليهم حل غير إنهم سحبوا منه الفيلم اللي بيشتغل عليه تقريبًا بقاله 30 سنة وأخده مخرج تاني اشتغل عليه وخلصه.
كل سنين تعب واجتهاد “ريتشارد” اختفوا والفيلم مطلعش حتى بأفكاره الأصلية اللي كان باديء بيها.
ماتبقاش زي “إيكاروس” ماتخليش الشمس تبهرك لإنه عمرك ما هتوصلها أصلاً وممكن تخسر كل حاجة في محاولتك دي زيه
في المرة الجاية حاول تتخلى عن شخصيتك الـ Perfect وخلص الشغل بأحسن طريقة ممكنة ومش لازم تضايق أوي من الـ deadline.. مين عارف ممكن من غيره عمرك ما هتخلص اللي انت شغال عليه.
