هو اللي اتكسر بيتصلح؟ إيه هو فن إحياء الجمال؟
بعد كل خلاف أو تجربة صعبة بتعدي عليك تكسرك وتعلم فيك.. بتحس إنك مش زي الأول وبتقول بضيق كده اللي اتكسر عمره مابيتصلح.. بس تفتكر هو جمال الحاجات والناس بيختفي لما بيتكسروا ولا الجمال حاجة تقدر تجددها وتحييها من جديد؟ من غير كلكعة في الكلام.. هو انت تقدر ترجع صاغ سليم وأجمل بعد ما تاخد على دماغك وتتكسر؟
إيه هو فن إحياء الجمال وظهرلنا منين وإمتى ده؟
فن إحياء الجمال ده اسمه فن “الكينتسوجي” ومن الاسم فهو فن ياباني معناه “الإصلاح بالذهب”.. الفن ده ظهر آخر القرن الـ 15 وبداية القرن الـ 16.. والحكايات بتقول إنه ظهر في حكم “أشيكاغا يوشيماسا” اللي كسر كوباية شاي صيني غالية وبيحبها.. فبعت الكوباية للصين عشان يصلحوها واللي بوظوا شكلها بشوية مشابك معدن كده.. فاضايق الحاكم وطلب من حرفيين يابانيين يطلعوا بطريقة كريتيف يصلحوا الكوباية بيها بس بشكل جميل.. ومن هنا طلع الحرفيين اليابانيين بتقنية بتعتمد على مادة مستخرجينها من شجرة الأوروشي بتتمزج بالدهب أو الفضة أو البلاتين.. واستخدموا المادة دي عشان يملوا الشقوق ويلزقوا القطع المكسورة
إيه الفلسفة أو الزتونة اللي ورا الفن ده؟
فن “الكينتسوجي” قايم على فكرتين.. الأولى هي “الوابي سابي” الكلام يبانلك كبير بس هبسطهالك.. “الوابي” يا سيدي يعني إنك تعمل الجمال من البساطة.. أما “السابي” يعني تقدير أي حاجة قديمة ومعتقة.. جمع بقى “الوابي سابي” على بعضه هيقولك من الآخر إن هدفنا مش نخفي العيوب لكن نوضح الجزء الجمالي فيها ونحولها لتحفة
أما الفكرة التانية اللي قايم عليها الفن ده هي فكرة الندم لما بنهدر في الموارد أو لما بنرمي أي قطعة فنية لما تتكسر
إزاي فن “الكينتسوجي” أثر على الفن؟
الفنانين المعاصرين بقى اتأثروا أوي بفكرة إحياء الجمال وشافوا قد إيه ده ضاف جمال لللوحات والقطع الفنية.. فبقوا بيعتمدوا على ترميم القطع المكسورة في لوحاتهم لا وكمان بقوا بيعملوا قطع فنية أصلًا معتمدة على تجميع قطع متكسرة سوا
في الآخر نحب نقولك جملة جميلة وهي “الأشياء المكسورة لا تزال جميلة”.. افتكر إن انت مش المشاكل والكسور اللي مريت بيها.. وإنك تقدر تبني نفسك من تاني بعد كل حدث صعب.. ولو زعلان عشان حاسس فقدت نفسك وإنك كنت كويس قبل اللي حصلك فنحب نقولك إنك هتبقى هتبقى أجمل وأحسن من الأول.. وطالما بتصحى كل يوم فانت عندك الفرصة إنك تبقى أحسن نسخة من نفسك
