هو انت ممكن تبقى اللي معطل نفسك في الموفينج أون؟

عمرك نهيت علاقة.. شغل.. حلم.. موقف أو شعور أيا كان وبعد ماعدى عليك وقت طويل وانت مفكر إنك شبح وتخطيتها رجعت اكتشفت إنك واقف مكانك ماحصلش تخطي بربع جنيه وتبدأ تسأل نفسك أومال أنا إيه اللي وهمني بإني نسيت وتخطيت والموضوع بقى ورا ضهري رسمي!

خلينا نصارحك إنك للأسف كنت محشور في دايرة من الغرور..

في نظرية إسمها “Ego loupes” قدمتها دكتور نفسية اسمها “بريانا ديوريو” بتفسرلك بيها حالة العطلة في التخطي دي بإنك أكيد اتزنقت في حلقة من حلقات “الإيجو” تعالى نتعرف عليهم مع بعض حلقة حلقة ونكتشف انت مزنوق في إيه منهم..

• دايرة البحث عن العدالة “Justice loop”

 حاجة كده زي هيجيني عشان يراضيني هقول على عيني مانستغناش.. انت كل اللي شاغلك الطرف التاني يجيلك موجوع وندمان عشان تحس انك مرضي وفل وحقك رجعلك.. ولما مابيرجعش موجوع بتتجنن بقى أومال فين العدالة.. إزاي اللي جرحني وسابني ولا كان بيكدب عليا لسه عايش حياته عادي كده والناس مابتلعنهوش في الشارع وهو ماشي ! وإزاي ماندمش ورجع يترجاني ويطلب السماح!

 فـ لو انت هنا أرجوك فوق من الوهم وماتستناش حد يندم ولا يحاول يصحح غلطه لإنه غلط من وجهة نظرك انت بس مش أكتر

• “Replacement Loop” دايرة الاستبدال:

دي اللي بتقعد تراقب فيها فترة محترمة كده عشان تتأكد إن الطرف التاني مش قادر يعيش حياته من غيرك وإنك كنت أجمد حاجة حصلت في حياته وإن حياته اتدمرت من بعدك ياحرام.. وبعدين لما تلاقيه بيعيش حياته.. وناس جديدة دخلتها عادي الإيجو بتاعك يشت ويتجنن رسمي لدرجة توصلك تقعد تعمل مقارنة بينك وبين اللي دخل حياته من بعدك ويفضل يقنعك إنك أحسن منه لا لا ده إيه المستوى اللي عرفه بعدي ده.. وتسرح في الوهم أكتر أو حتى لو مش وهم عملية المقارنة في حد ذاتها دليل إنك واقف مكانك مش عارف تتخطاه رغم إن الإيجو بتاعك بيحاول يقولك لا ده إحنا تخطينا بس شوف ياعيني الناس اللي عرفهم بعد منك مايجوش ربعك حتى.. وهو ولا بقى فاكرك أصلا

• “Redemption Loop” دايرة الخلاص:

 دي حلقة لازم أبقى نسخة أفضل عشان اللي حصل يبقى له معنى.. وبتوصل للإكستريم بقى من ده أنا مفيش مني بالصوت والصورة والدليل.. انت بتـ glow up بس عشان تثبت للناس وللطرف التاني إنه هو اللي كان طافيك وإنكم لما بعدتوا عن بعض انت نورت تاني فتبدأ في رحلة الإزدهار والإنجاز بس من برا بس.. لإنك بتفضل رابط قيمتك بالشئ أو الشخص اللي انفصلت عنه بس كالعادة الإيجو بتاعك بيضحك عليك ويفهمك إنك نسخة أفضل من غيره فعلا ويزرع في دماغك فكرة شوفت لما انفصلت وشك نور ازاي؟

الـ3 حلقات دول هما الأشهر بينا كلنا.. بعد الإنفصال تقريبًا الكل بيمر بنفس المراحل

دكتور مريانا قدمت حلقات تانية زي

 Control Loop.. Validation Loop.. Comparison Loop
وكلهم إطارات أوسع وأشمل للحلقات اللي ذكرناهم النهاردة بس مش كل الناس بتدخل في العمق ده من عطل في عجلة الموف أون.. نتمنى ماتكونش من اللي دخلوها أو لما نكلمك عنهم المرة الجاية هنعرف انت واقف في أي حلقة بالظبط..

وفي النهاية.. الحقيقة بقت قدام عينيك ومالكش حجة إنك تفضل متعلق في أي حلقة كانت.. لو حاسس إنك كنت كتير على حد أو انت أحسن من غيرك أو مش هيعرف يعوضك فماشي ياسيدي انت قد الدنيا ماتستناش تحس بقيمتك بقى من ناحية أي حد انت شايف فيه العبر وحاسس إنك فرصة عمره.. العلاقة أو المشروع أو أيا كان الشئ اللي انت عطلان عنده انتهى.. وأي حاجة هتستناها تحصل بعد النهاية دي دليل إن الإيجو بتاعك بيشتغل ضدك ومعطلك تشوف حياتك.