كلنا لينا واحد صاحبنا (ده لو مكناش احنا) بيتفائل ويتشائم من حاجات مختلفة.. فهتلاقي اللي لو شاف قطة سودا يفضل متشائم واللي بيتشائم من البومة واللي بيتشائم من المرايات المكسورة.. وبغض النظر عن ده كله أي كلام.. بس هو إيه الفكرة ورا التشاؤم.

من زمان أوي

موضوع التشاؤم والتفاؤل نفسه دايمًا هتلاقيه مرتبط بخرافات قديمة.. زي إن القطة السودا هي في الأصل عفريت.. أو إن اللعب بالمقص بيجيب الفقر زي ما جدتك كانت دايمًا بتقولك.. فدايمًا هتلاقيها موروثات.

رقم 13

عندك مثلًا رقم 13 ده أغلب الثقافات بتتشائم منه وبيتقال إن ليه أسباب مختلفة دينية وثقافية.. فمثلًا

في الكتاب المقدس.. كان يهوذا “اللي خان السيد المسيح” هو الضيف رقم 13 وفي الأساطير الإسكندنافية القديمة فالشر والفوضى دخلوا العالم أول مرة لما حضر إله مخادع “لوكي” مأدبة عشاء للآلهة وكان برضو الضيف رقم 13

كمان مثلًا بيتقال إن بسبب إن رقم 12 يعتبر رقم “مثالي” زي ان اليوم متقسم لفترتين كل واحدة منهم 12 ساعة والسنة 12 شهر فبيبقى فيه احساس إن رقم 13 رقم دخيل لأنه بييجي بعد الرقم “المثالي”

أيوا ليه برضه بنتشائم؟

الموضوع دايمًا هتلاقيه متوارث وكمان ليه علاقة بالمعالجة المزدوجة.. الإنسان بيفكر بطريقتين “تفكير سريع” و”تفكير بطئ”.. التفكير السريع ده اللي بيعتمد على الحدس وبيكون زي ما باين من إسمه سريع.. والتفكير البطئ هو اللي غالبًا بيصحح الاستنتاجات الغلط اللي وصلها التفكير السريع.. بس في حالة التشاؤم بالذات احنا ساعات بنكمل في طريقة التفكير حتى واحنا عارفين إنها مش منطقية ودي بيتقال عليها “الاستسلام” للأفكار دي.

حاجة كمان مهمة أوي.. لو الواحد حط في دماغه إن اليوم مش هيبقى حلو أو هيحصل حاجة وحشة.. فدماغه هتخليه يشوف اليوم فعلًا وحش.. تعالى نعمل سيناريوهين صغيرين:

السيناريو الأول: شوفت قطة سودا على السلم وانت نازل.. ولما روحت تركب مواصلات ملحقتش أول ميكروباص وركبت اللي بعده أو القهوة فارت منك وانت بتعملها.

السيناريو التاني: صحيت من النوم عادي.. ملحقتش نفس المواصلة أو القهوة فارت.

في السيناريو التاني.. الموضوع بنسبة كبيرة هيعدي عادي.. ممكن كمان ماتخدش بالك وتعمل قهوة غيرها أو تركب المواصلة عادي.. لكن في السيناريو الأول.. هتربط فوران القهوة والمواصلات بالقطة السودا اللي شوفتها في أول يومك.. فالإنسان دايمًا بيحب يربط الحاجات ببعض ويعمل أسباب لكل حاجة بتحصل.. فتلاقي نفسك بتتشائم من قطة غلبانة معملتش ليك حاجة.

في النهاية..

التشاؤم مش هيفيد والقطة والغراب ورقم 13 كلها حاجات عادية بتشوفها في يومك.. ولو ماركزتش معاها هتلاقي اليوم عادي وولا هتاخد بالك أصلًا.. فاتبسطوا وروقوا واتفائلوا