هو فيه حاجة اسمها تمارين الضغط النفسي؟

انتشر شوية اليومين دول ناس بتهزر سواء من رحم المعاناة أو بيهزروا عادي بإنهم يقولوا “الحمد لله بلعب كل يوم تمارين ضغط نفسي”.. فدورنا ورا الموضوع عشان نعرف فيه تمارين للضغط النفسي فعلًا ولا ده أي كلام.. فتعالوا نشوف كده

حسب مواقع verywellmind و healthline و psychcentral

الضغط النفسي هو بكل بساطة ضغط غير طبيعي عن العادي زي إن الشغل العبء بتاعه يزيد جامد أو إنك تمر بمرحلة انتقالية تقيلة وصعبة أو مخاوف كبيرة من حاجات في حياتك اليومية

وعشان الضغط النفسي له تأثيرات كتير سواء نفسية أو جسدية وزيادتها أو إنها تتراكم على بعض ده له تأثير كبير ومؤذي ومش دايمًا هينفع معاه الهروب أو إنك تهزر عليه.. ممكن يكون ده جزء بسيط من الحل لكن مش هو الحل

فهو آه فيه حاجة اسمها “تمارين الضغط النفسي”.. يلا نعرف أكتر في نقط وعناوين مشروحة إيه هي التمارين دي؟

أول حاجة “محاكاة الموقف” وعشان نشعبولي الموضوع شوية.. ده معناه إنك تجيب الموقف اللي حاسه هيسبب أو مسبب ضغط وتبدأ تقلده بالظبط بس بعوامل كلها أنت اللي حاطتها وناس تعرفها زي أصحابك أو أهلك.. وتبدأ تتصرف كأنه الواقع وتجرب بقى هتعمل إيه في الوضع ده

وهنا ممكن نضرب مثال بحاجة زي الـ Presentation سواء في شغل أو جامعة.. حاجة زي دي لو بتجربها أول مرة أو حتى لأكتر من مرة فأنت بتحس بضغط وتوتر كبير بسبب الموضوع ده وإنك هتقف قدام ناس ومحتاج شكلك وطريقة كلامك ومعلوماتك وعوامل كتير تكون متظبطة كويس.. فهنا عادي هتستعين بصحابك أو زمايلك بإنك تقلد اللي هيحصل لما تيجي تقدم Presentation وتقعدهم قدامك وتبدأ تجرب وهنا أنت هتقلل بشكل كبير نسبة الخطأ ونسبة القلق والتوتر لأنك بالفعل جربت الموضوع خلاص

وده لما تيجي تطبقه بقى مع الضغط بتبدأ تحدد الموقف اللي مسبب ضغط وبعدها تعمله سيناريو تخيلي بكل الاتجاهات بتاعته اللي ممكن تحصل وبعدها ابدأ جربه أو قلده بالظبط مع حد من صحابك وبعدها مرة تانية مع نفسك قدام المراية مثلا كأن الموقف بيحصل فعليًا.. راقب ردود أفعالك كلها من مشاعر ولغة الجسد والتعبيرات وبعدها ابتدي لاحظ إيه فيهم محتاج تحسين واشتغل عليه وده هيخليك تقلل الشعور بإن الحاجة دي مجهولة وأنت مش عارف وراها إيه وهتزود ثقتك بنفسك وهتخليك تقدر تتعامل مع المواقف الواقعية بشكل أفضل

تاني حاجة “تدريب إعادة صياغة الأفكار” وهنا أنت لما تتعرض لضغط أو تشوفه جاي في السكة وده نفسه بيكون ضغط ساعتها في أوبشن إنك تمسك الموضوع بهداوة وممكن تطلب مساعدة من اللي حواليك برضه في ده بإنك تبص للموقف كله بشكل تاني غير العادي.. يعني تبص للجزء الإيجابي في الموضوع وماتقعدش تقول حاجات سلبية زي “هو ده وقته!” أو “أنا مش هقدر استحمل الموضوع ده” والحاجات اللي هتخليك واقف مكانك أو حتى هترجعك خطوات ورا

فحاول تبص للجانب اللإيجابي في أي موضوع لأن أي موضوع له جانب إيجابي حتى لو هيكون مجرد درس بتستفاد منه عشان ماتقعش في نفس الضغط مرة تانية أو إنك بتطور وتضنج أكتر.. وكمان تركز على الفرص اللي ممكن تستغلها في الموضوع بدل التهديدات بس اللي أنت مركز معاها وبتخليك مش شايف أي حلول ولا عارف تتصرف

فيه شوية أسئلة ممكن تفيدك في الموضوع ده زي “هو فيه دليل على الحاجة السلبية دي؟” طب لو فيه دليل اسأل نفسك “ممكن أعمل إيه عشان أظبط اللي جاي في المستقبل؟” وكمان “إزاي ممكن اتعامل مع الموضوع بشكل مختلف؟” وفيه جمل مش أسئلة تقولها لنفسك زي “أنا آه ماحققتش حاجة أو ماتخطيتش الضغط بس هتعلم وأقرب من الحل مع الوقت والمحاولات” وكمان “ده تحدي ممكن ياخد وقت شوية.. بس هطلع منه شخص تاني متطور وناضج” وكمان “أنا مش لازم أكون مثالي.. المهم أجتهد واعمل اللي عليا” 

تالت حاجة بشكل بسيط خالص “إيه اللي ممكن يحصل أسوأ من كده؟” وده بمود أنت عندك حاجة تخسرها؟.. وهنا أنت بتحط أسوأ سيناريو في دماغك ممكن يحصل للموضوع اللي جاي أو أسوأ سيناريو لنتيجة الحاجة اللي حصلت بالفعل وساعتها مهما كان اللي حصل أكيد قوته هتكون أقل لأنك كده كده متوقع أوحش حاجة فتمام 

رابع حاجة “ظبط الجزء البدني الرياضي” من حتة التنفس بقى وإنك تاخد نفس لمدة 4 ثواني وتطلعه على 4 ثواني زيهم وتظبط الحتة دي وقت التعرض للموقف أو وقت الاحساس بالضغط.. أو من الجانب الرياضي بإنك دايمًا تبقى بتلعب رياضة سواء في الجيم أو بتتمشى أو أيًا كان نوع الرياضة حتى لو يوجا بحيث يبقى عندك حاجة بتخرج فيها طاقة وبتقلل بيها التوتر والضغط اللي حاسس بيهم 

خامس حاجة اسمها “التعرض التدريجي” أو “Gradual Exposure” وهنا بقى لو جينا نقسم التعرض للحاجات السيئة مثلا 3 حاجات وهم “الأقل سوء.. السيء وأخيرًا الأسوأ” بتبدأ تعمل list كده بالحاجات السيئة في العموم وتصنفها حسب الحاجات دي فمثلا عندك في حياتك 9 مواقف.. هتقولي ليه مش 10 هقولك عشان نقدر نقسمهم 3 و 3 و 3 وتبقى مظبوطة لزوم الـ OCD 

قولنا عندك 9 مواقف أو 9 أجزاء بيمثلوا ضغط في حياتك فيهم 3 أقل سوء وزيهم سيئين وزيهم أسوأ حاجة.. بتبدأ تعرض نفسك باختيارك كده وبدعم من اللي حواليك لـ الـ 3 الأقل سوء وتتعامل معاهم وتشوف هتحلهم إزاي وتستفاد من إيه وتدي التجربة حقها وتخش على اللي بعده

خلصت أول 3 خش في اللي بعدهم وهم السيئين وابتدي اتعامل بنفس الشكل وشوف هتوصل لإيه منهم.. وبعدهم للمرحلة الأخيرة وهم آخر 3 وبرضه اديهم وقتهم وشوف الاستفادة وكل الجوانب بالهدواء لأنك هنا متحكم في الموضوع عادي

بعد ماتخلص كل المراحل دي أنت هنا مؤهل إنك تتعرض لأي نوع من أنواع الضغط أو المواقف الوحشة في الحياة وممكن مايحصلوش بنفس الشكل ولكن على الأقل أنت متمرن على الموضوع والضغط عمره ماهيكون بنفس الكمية اللي بتتعرضلها من غير  تمرين ولأول مرة

خليك فاكر دايمًا إن التحكم في الضغوط بيبدأ بخطوات صغيرة وإنك تقدر تتعامل معاها وكل خطوة بتاخدها بتوديك للهدوء والعقلانية والسيطرة على الوضع.. وكل التمارين دي مش بتقلل التوتر في وقتها بس بالعكس دي مهارة على المدى الطويل أهم حاجة تبقى عارف قيمتها وبتحاول تعملها بشكل مستمر لأن صحتنا النفسية والمحافظة عليها مش رفاهية.. والأكيد في النهاية ماتنساش إن لو الموضوع كبير عليك وحسيته محتاج استشارة لمتخصص إنك تعمل ده عشان تقدر تنقذ مايمكن انقاذه

قولنا بتعمل إيه من تمارين الضغط النفسي دي وأنت مش واخد بالك أو وأنت عارف إنها تمارين ضغط نفسي؟