هو فيه حاجة بتحصل صدفة ولا دي علامة يا مارد؟

في الحياة كل يوم بنشوف حاجات وبتحصلنا حاجات تانية.. منها اللي بنقول عادي دي مجرد صدفة.. بس فيه حاجات تانية بنقف عندها ونسأل هو اللي بيحصل ده عادي ولا دي علامة؟

عشان كده إحنا جايين النهاردة نقولك الفرق بين الصدفة والـ مش صدفة
 وفقًا لموقع mindbodygreen و aglow lifestyle و angelicalbalance و psychologytoday   

الصدفة تعريفها في علم النفس:

شئ بيحصل بشكل عشوائي زي أنك ممكن تبص على الساعة وتلاقيها 11:11 شئ مالوش تفسير غير أنه صدفة.

لكن لو فيه صدفة بتتكرر مثلا زي أنك تشوف شخص معين في نفس المكان كل يوم.. أو تنونو في دماغك أنك ترتب كراكيبك وتلاقي صورة مع صديق قديم وتكلمه تسلم عليه ويقولك أنه بيحاول يدور على رقمك عشان يرشحك لشغلانة.. لوهلة قد تبدو ليك الحاجات دي أنها عشوائية وحصلت بالصدفة.. بس لا العلماء هنا بقى بيقولوك دي علامة يا مارد ووراها مغزى وبيوصفوها باسم ” ظاهرة التزامن” أو “synchronicity”

طب إيه هو تعريف ظاهرة التزامن دي؟

التزامن في علم النفس:  أول شخص عرفه هو كارل يونج المفكر وعالم النفس السويسري الشهير .. وعرفه بأنه مجموعة- أحداث بتحصل مع بعض بالصدفة بس بيكون وراها مغزى أكثر من كونها صدفة .. وقال: “أن ما يحدث في العالم الخارجي يعكس شيئًا ما يحدث في عالمك الداخلي”.

– التزامن في العلم الروحاني: هي رسائل إلهية دورها أنها ترشدنا لحاجة معينة أو بتأكدلنا أننا ماشيين في التراك المظبوط وده بيحتاج نظرة أعمق في اللي بيحصل.

إمتى بتحصل ظاهرة التزامن؟

-وبيوضح كارل يونج أن حدوث التزامن من عدمه بيختلف من شخص للتاني على حسب تصديق الفكرة نفسها وتأمله في كل اللي بيحصل ولا لا..
-ولازم تنتبه للرسالة اللي الكون حواليك عايز يوصلهالك..
-وعشان توصل للمرحلة دي لازم تصفي ذهنك تمامًا وتعمل تمارين تساعدك على التأمل أكتر

بعد كل ده .. فيه رأي تاني شايف أن النظرية دي مجردة خرافة
.وبنى العلماء حجتهم أنه ببساطة دي طبيعة العقل البشري أنه عايز يدور على معنى ومغزى من ربط الحاجات ببعض