هو ليه الواحد مننا ممكن يرتبط بنفس الناس ويكرر شكل علاقاته؟

عارف لما صاحبك يخرج من علاقة وبعد كام يوم يجي يقولك إنه ارتبط تاني وتبص على اللي ارتبط بيه تلاقيه نسخة من الإكس؟

سواء بقى الشبه ده في الشكل أو الطباع ومع الوقت تلاقيه بيشتكي من نفس التكسكة وإنه بدل قصب بقصب.. بس ليه صاحبك عمل كده؟

“فرويد” قال إن ده اسمه “التكرار القهري” والمصطلح بيوصف الناس اللي بتكرر حياتها لا إراديًا نتيجة لتجارب وصدمات عدت عليهم وعلمت جامد 

التكرار ده مش بس على المستوى العاطفي ممكن يبقى في الشكل كمان ترتبط بناس شبه بعض.. كمان هتلاقيه بيكرر روتين يومه أو المواقف اللي عاشها وأثرت فيه.. حتى هيكرر الصدمة لنفسه تاني 

فرويد قال إن الشخص ده ممكن يعمل كده لإن عنده مشاكل في التعلق.. هيتعلق بحاجات حتى لو بتأذيه.. أو مابيعرفش يتحكم في مشاعره وسلوكياته 

دايمًا هتلاقي الشخص ده مندفع وعنده هوس بالكمال عايز كل حاجة حواليه زي ما هي ومابيقدرش عالتغيير أو عانى من الارتباطات المشروطة.. ومحدش حضنه وهو صغير

في منهم كمان بيبقى مقتنع إنه لو كرر نفس العلاقة اللي فشلت ممكن تبقى فرصة إنه يصلحها حتى لو مع شخص تاني بس يكون فيه نفس المواصفات 

غير فكرة إنه يصلح اللي عاشه.. ممكن يبقى مرتاح للنوع ده يبقى هو ده الـ”Type” بتاعه سواء في العلاقات بقى أو شكل الحياة عامة.. في ناس كده بتعشق ضيق التنفس يعني 

وعشان كلنا ممكن نتعرض لحاجة شبه دي في وقت ما في حياتنا.. والحل بيكون في وعينا بنفسنا وإدراكنا لتفضيلاتنا وذاتنا والحاجات اللي بنحبها وبنكرهها.. وفي مننا اللي الموضوع بيكبر منه وبيتحول لتكرار مرضي.. هنا لازم تدخل من مختصين يساعدوه على العلاج.. ودمتم سالمين.