هو ليه فيه أغاني بتفضل لازقة في دماغنا؟
عارف لما تكون قاعد في ميتنج مهم أو في لجنة الامتحان وفيه أغنية ماسكة دماغك عمالة تتعاد ومش راضية تبطل.. مع إنك ولا عايز تغني ولا عايزها في دماغك؟ مبروك انت عندك “دودة الأذن”
الموضوع ده مش عندك انت بس.. فأغلب الناس اللي بتسمع موسيقى بانتظام بيحصلها كده.. وفي دراسة فنلندية لقوا إن 90% من الناس حصلهم الموضوع ده مرة واحدة في الأسبوع على الأقل..
الباحثين لقوا إن لما ده بيحصل.. القشرة السمعية الترابطية بتشتغل أكتر ودي جزء من القشرة الدماغية مسؤولة عن فهم وتفسير الأصوات بعد استقبالها بعكس القشرة السمعية الأولية واللي بتكون مسؤولة عن المهام السمعية الأساسية.. بس برضو إيه يعني اللي بيخلي أغنية “بابا” تفضل ترن في ودني وهي شغالة؟
الموضوع ليه أسباب مختلفة منها مثلًا:
- اللحن بتاع الأغنية بيكون سهل يتحفظ.. فتلاقي نفسك سمعتها مرة واتحفظ في دماغك
- ساعات اللحن أو الأغنية بتكون ليها علاقة بموقف معين.. فمثلًا من زمان أوي كنت سمعتها وانت متوتر.. فتلاقي نفسك كل ما بتتوتر بتشتغل في دماغك تلقائي
- وطبعًا لو لسة سامع الأغنية أو اتكررت قدامك كتير.. زي ما بيحصل لما تبقى لسة طالع من فرح كده
طب نخرجها من دماغنا إزاي؟
لحد دلوقتي مفيش طريقة أكيدة 100% بس فيه باحثين بريطانيين اقترحوا إنك تاكل لبانة وده لأن إشغال عضلات الحلق ممكن د يعطل الحلقة الموسيقية المتكررة.. وناس تانية بتقول إن الحل إنك تشغل أي موسيقى تانية.. بس أوعى تشغل الأغنية عشان كده هتثبت أكتر.
