هي الدماغ فيها “صرف صحي” وقت النوم ويا ترى بيشتغل إزاي؟

كلنا عارفين إن النوم حاجة مهمة وحلوة وبنحبها جدا عشان هو مش مجرد وقت بتريح فيه جسمك بس لكن كمان وقت مهم للدماغ عشان ترتب نفسها وتجدد نشاطها.. كتير بتنام مرهق وتعبان وتصحى تلاقي نفسك زي الفل وعندك طاقة كمان.. بس ده بيحصل إزاي؟

حسب موقع Nature وموقع Smithsonianmag وموقع Sciencealert

في دراسات قديمة كتير اتعملت على الفئران وحد هيقول فئران إيه إحنا بنى آدمين.. بس خلونا نقول إن فيه نظام اسمه “النظام الجليمفاوي” أو “Glymphatic System” وهو متشابه جدا في الإنسان والفئران.. الدراسة بتقول إن النظام ده اسمه “شبكة الصرف الصحي” في الدماغ وده اللي ساعد مؤخرا في أبحاث جديدة اتعملت على الإنسان عشان ترسم خريطة للشبكة الموجودة في الإنسان.. فتعالوا نعرف ببساطة كده إيه هو النظام ده وفايدته إيه

الدراسة اتعملت في جامعة كوبنهاجن وبتقول إن وأنت نايم دماغك بتعمل على تنضيف السموم وطرد النفايات العصبية اللي بتتراكم طول اليوم من قرف وتفكير وسحلة من أول ما تصحى لحد ما تيجي تنام تاني وكمان الجهاز ده “الصرف الصحي للدماغ” بيضخ سائل نخاعي عشان يشيل البروتينات الضارة زي “بيتا أميلويد” واللي مرتبطة بأمراض وحشة زي الزهايمر

كمان دماغك وأنت نايم بتبدأ تظبط توازن الخلايا العصبية وده بيحافظ على الصحة العقلية بدل ما تتجنن.. وبرضه بيقلل من التوتر ويظبط الدوبامين والسيروتونين عشان تصحى فايق ورايق ومركز عكس ما كنت نايم مرهق وتعبان

وده يوصلنا لتفسير مهم إن الأبحاث بتأكد إن “الجهاز الجليمفاوي” بيعطل لو أنت ما نمتش كويس أو ما نمتش أصلا.. وده لأنك كده بتراكم السموم في دماغك وبيأثر على صحة الدماغ على المدى البعيد 

في النهاية بعد ما عرفنا أهمية “جهاز الصرف الصحي للدماغ” عرفنا أهمية الجهاز الليمفاوي وبيشتغل إزاي ومحتاج تنام كويس عشان يعمل شغله ويخليك تصحى فايق ومركز.. مش بس كده ويحافظ على صحتك العقلية ويحافظ عليك من الأمراض العصبية.. وبكده نبقى جيبنالك سبب مهم لما تكون سهران ومستخسر تنام عشان عايز تقلب شوية في التليفون ولا تشوف حلقة من مسلسل أو تغطس في دوامة الريلز إنك تنام وترتاح عشان تصحى فايق ومركز ودماغك رايقة