هي المخدة فعلا مابتشيلش اتنين حلوين ولا عادي ممكن تشيل؟
دايمًا كده تسمع جملة بتقولك “المخدة ماتشيلش اتنين حلوين” والجملة دي مثل شعبي بيتقال على طول لما أي حد يشوف اتنين مع بعض وشخص فيهم أقل جمالًا من التاني فيقولك المخدة ماتشيلش اتنين حلوين.. تفتكروا الموضوع متعلق بالجمال بس ولا فيه حاجات تانية؟ تعالوا نشوف..
1- ليه حد ممكن يختار شخص “أقل جمالًا” من وجهة نظر الآخرين؟
- فيه عندنا أول سبب وهو إن “الجمال نسبي” أو “Matching Hypothesis” وهنا حسب NIH الدراسات بتقول إن الناس في الغالب بيدخلوا علاقة مع الناس اللي شايفينهم قريبين منهم في الجمال والشكل.. لكن في الأول عشان بنفكر في أكتر من صفة تخص الشخص فبنحس إن إيه ده شبهنا جدًا “شكلًا” وهو ممكن مايكونش شبهنا ولا قريب من نسبة الجمال بس انت حطيته في الحتة دي عشان تبرر اختيارك له
- تاني حاجة “المنظور التطوري” ده حسب mdpi مش محتاج زمن طويل بيقولك إن الجمال خدّاع.. مع الوقت منظورنا للأشخاص بيختلف وبيحتاج شوية أساسات زيادة زي إنه بيفكر إزاي وبيتعامل في حياته إزاي وثقافته إيه في كل المواضيع.. يعني معاييرك بتختلف حتى لو مش هي نفس الحاجات اللي ذكرناها دى
- البُعد الاجتماعي: الموارد الشخصية.. الذكاء أو الدعم العاطفي أحيانًا كلها حاجات بتكون أهم من المظهر
2- وليه يختار شخص “أقل جمالًا” من وجهة نظر الجنسين؟
- البنات أو الستات:
في بحث اتعمل على pubmed بعنوان “Sex differences in sexual attraction for aesthetics, resources and personality” أو بالعربي يعني الاختلافات الجنسية في تحديد الأساسيات اللي شريك الحياة “راجل أو ست” بيختار الطرف التاني.. لقوا إيه بقى؟ إن الستات بتدي الموارد التاني غير الجمال أهمية أكتر وده زي “الطموح.. الوضع الاجتماعي.. التعليم وكونه شخص مصدر أمان”
- الشباب أو الرجالة:
نفس البحث بيقول إن الرجالة عادي تقدر تختار الستات على أساس المظهر أو الشكل الحلو لأن الراجل بيشوف دي علاقة طويلة الأمد فمحتاج شخص يكون حلو عشان يفضل حلو
- بشكل عام:
طبعًا ده مش معناه إن كل الرجالة بتعمل كده أو كل الستات بتعمل كده.. يعني في الأول وفي الآخر ده مش المعيار الطبيعي للكل وفيه معايير تاني
فلو ركزت حواليك شوية هتلاقي عوامل مجتمعية بتجبرك تتجوز حد أقل منك عشان ماديًا انت مش قادر لده.. أما الناحية التانية ممكن البنت تعجب بفكرة المعاناة أو فكرة إن الشخص مواصفاته الإنسانية وصفاته عاجباها فتتغاضى عن الشكل وتختار حد أقل منها جمالًا
3- المخدة بقى ممكن تشيل اتنين حلوين؟
الأكيد إن آه.. أكيد فيه حالات كتير هتلاقي فيها الشخصين أو الجنسين متقاربين في الجمال أو هما الاتنين حلوين فعلًا.. بس الفكرة برضه اللي هتحتاج ترجعلها هي إن الجمال نفسه نسبي وممكن كل واحد يشوفه بشكل تاني
الحاجة التانية إنهم ممكن يكونوا حلوين شكلًا وهما الاتنين لا مؤاخذة أوحش من بعض في الشخصية وشخصياتهم زبالة أو حد واحد مش كويس كشخص لكن شكله حلو.. فهل هنا تقدر تقول إن المخدة شايلة اتنين حلوين؟
في النهاية الموضوع مش مجرد مثل شعبي بيتقال لكن هي حاجة ممكن تكون عميقة شوية.. الجمال شيء نسبي ممكن يكون مرتبط بالشكل لوحده وممكن يكون مرتبط بالشكل والشخصية وطبعًا المثل الأوقع هو “لولا اختلاف الأذواق” لأن لو كلنا ذوقنا واحد كان اتبقى ناس كتير محدش اختارها خالص.. ولو وصلت لـ هنا قولنا انت شايف المخدة ممكن تشيل اتنين حلوين ولا لأ؟
