يا ترى هو ابن أمه ولا بار بأمه.. والمفروض يتصرف إزاي صح لو محطوط بين مامته وشريكته؟
رغم اختلاف Type كل ست عن التانية بس فيه Type بتجمع عنها كل الستات إنها لازم تبعد عنها.. وهي “الراجل ابن أمه”.. اللي مامته ليها اختيارات أكتر من الزوجة في البيت.. ومايقدرش يكسر ليها كلمة عشان الجنة تحت رجليها ولازم يبرها.. بس هو كده بار بأمه ولا ابن أمه؟
صفات الراجل ابن أمه
- “اوعى حد فيكم يزعل أمي.. مع احترامي لأمك أو لعمي.. في الاتفاق الكلمة لأمي”: مابيزعلش مامته بس على حساب كل الناس المهمة ليه.. وبيدخلها في قرارات خاصة بشريكته
- “إيه يا بني انت ابن أمك كل حاجة تقولها لأمك”: بيحكي كل التفاصيل الخاصة بشريكته لمامته
- “ننوس عين مامته”: متدلع جامد منها وبيعتمد عليها في كل حاجة سواء ماديًا أو معنويًا
- في أي خناقة تحصل بينه وبين شريكته.. مامته بتاخد صفه وبتدافع عنه حتى لو غلطان.. ولو شريكته اللي متخانقة مع مامته هو كمان بياخد صف مامته
- بيقارن شريكته دايمًا بمامته وإنها أحسن منها في كل حاجة بتعملها
ليه الراجل ممكن يبقى ابن أمه؟
سيجموند فرويد قسم مراحل النمو النفسي لخمس مراحل.. كل مرحلة منهم سماها باسم عضو في الجسم.. وفي كل مرحلة ضروري يوصل للطفل رسالة نفسية مهمة من الأم والأب ولما بتوصله بيقدر يدخل للمرحلة اللي بعدها.. ولو الرسالة دي ماوصلتش الطفل بيحصل حاجة اسمها “تثبيت” بمعنى إن الطفل بيقف عند احتياجات ومتطلبات المرحلة دي حتى مهما سنه كبر وبقى قد الشحط.. فمثلًا في المرحلة الفمية اللي هي مرحلة الرضاعة ضروري يوصل للطفل من أمه رسالة مهمة جدًا وهي إنه وقت ما هيحتاجها هيلاقيها.. يعني مش لازم تبقى موجودة طول الوقت لكن ضروري تبقى موجودة بالشكل الكافي اللي الطفل محتاجه.. فلو كانت الأم مشغولة طول الوقت الطفل هتوصله رسالة إنه ماينفعش يثق في حد ومش هيلاقي حد جنبه لو احتاج مساعدة.. أما لو كانت موجودة طول الوقت حتى من غير ما يحتهاجها ومدلعاه هتوصله رسالة إنه ماينفعش يعتمد على نفسه ولا ياخد قرار من دماغه فهيكبر شخص بيعتمد على مامته في الكبيرة والصغيرة ومن هنا بيبقى “ابن أمه”
الفرق بين ابن أمه والبار بأمه
الاتنين بيحبوا أمهم بس الفرق إن البار بأمه بيسمع كلامها ويطيعها في أي حاجة تحتاجها وأي موضوع يخصه هو ومامته مش مواضيع تخص قرارات مستقبله زي الكلية اللي يدخلها أو شريكته ومشاكلهم وكل ده من غير ما يجي على نفسه أو على الأشخاص المهمين من حواليه
تعمل إيه لو اتحطيت بين مامتك وشريكتك؟
- امسك العصاية من النص: ماتخدش صف حد فيهم وقيِّم الغلط والصح في تصرفات الطرفين.
- اسمع لكل طرف فيهم لوحده وحسسه إنك مهتم بيه وبمشاعره
- خلي فيه حدود واضحة: لأن ممكن المشاكل تكون بسبب تدخل مامتك/ شريكتك في حياة التاني بلا داعي
- ماتنقلش كلامهم الوحش عن بعض لبعض: وحاول تكون وسيط ينقل صورة كويس عن كل حد فيهم ويوصل إنهم بيقولوا عن بعض كلام كويس
