٧ أكلات لما نفسك تروحلهم دليل على احتياج جسمك لعناصر معينة 

ممكن يعدي عليك يوم تلاقي نفسك قبل ما تنام عايز تاكل حاجة معينة شوكولاتة مثلا، وتنام وتصحي تلاقي نفسك برضه في حته الشوكولاتة دي، في الوقت ده غالبا أنت مابتبقاش نفسك فيها أو طفس زي ما متخيل، ده بيكون جسمك محتاج حاجة أو مادة معينة أو بتوضح حالتك النفسية زي إنك متوتر مثلا أو زعلان.

موقع Brightside قال في مقال على الحاجات اللي بتكون ناقصة أو جسمك محتاجها حسب ما أنت نفسك تاكل وهما:

1- الأكل المشطش:

الأكل الحراق بيبقى مشطشط بسبب تأثير الفلفل فيه، واللي بيحتوي على “الكابسيسين ” اللي بيساعد على تخفيف ألام المفاصل والعضلات وبيساعد كمان في التخلص من الصداع النصفي، واللي ممكن تستهلكهم من غير وعي ومابتحسش ليه أنت بقيت أحسن.

2- الشوكولاتة الغامقة:

الشوكولاتة الغامقة بيبقى فيها مادة كافيين أكتر من اللي في البيبسي، الكافيين بيخليك يقظ وعندك طاقة وبيحفز جهازك العصبي المركزي، عشان كده احتمال لما يبقى نفسك في شوكولاته غامقة تبقى عايز نايم وتعبان وهي الحاجة اللي جسمك محتاجها عشان تخليك أكتر إنتاجية.

وفيه احتمالية تانية وهي إنك تبقى محتاج ماغنسيوم، وبالرغم من كده لسه العلماء مش متأكدين من النظرية دي لإن فيه أكل تاني فيه ماغنسيوم.

3- زبدة الفول السوداني:

بشكل عام زبدة الفول السوداني غنية بالمواد الغذائية، وبتحتوي من ضمن مكوناتها على مكون بيستخدم في صنع الأدوية لخفض مستويات الكوليسترول، في الغالب لما تحس إن نفسك فيها ده هيبقى بسبب نقص التغذية، لإنها تعتبر مصدر للبروتين ومضادات الأكسدة والدهون والحديد والمغنيسيوم والكالسيوم.

4- الثلج:

غالبا الرغبة في قطم الثلج بتبقى مرتبطة بنقص الحديد، بغض النظر عن وجود فقر دم أو لا، ولكن فيه اقتراحات بتقول إن قطم الثلج بيساعد على زيادة اليقظة لو كان الشخص بيعاني من نقص الحديد أو فقر الدم، وفيه تفسير تاني للرغبة في قطم التلج لكن أقل انتشاراً وهو التوتر أو المشاكل العاطفية.

5- المعجنات:

المعجنات غنية بالكربوهيدرات عشان كده سهل جدا تحس بالرضا بعد ما تاكل حتة كيكة واحدة بس، لإن السعرات الحرارية اللي فيها هتديك طاقة بسرعة، واكتشفت الأبحاث إن الوقت اللي الشخص بيشتهي فيه كربوهيدرات بين الساعة 3:30 مساءاُ و 5 مساءاً، عشان كده خلي بالك لو ماشي على أي نظام غذائي.

لما جسمك بيبقى عايز عيش أو كيكة أو مكرونة فكده هو بيفتقر الكروم أو النيتروجين، وبعض العلماء بيربطوا الرغبة في تناول الكربوهيدرات بانخفاض الحالة المزاجية والتوتر، وتناول المعجنات المسكرة كمان بيفرز هرمون السيروتونين وهو هرمون السعادة.

6- لحمة أو برجر:

لو بدأت مرة واحدة تحس إنك عايز تاكل برجر فكر بالظبط أنت عايز تاكله إزاي، لو هيبقى باللحمة حمرا يبقى جسمك محتاج بروتين، لإن اللحوم الحمراء بتحتوي على الحديد والزنك وفيتامين ب، واقترحت دراسة من الدراسات إنك لو بتحس إنك عايز تاكل برجر كتير لازم تتبع نظام غذائي غني بالبروتين وده هيخليك تتجنب أكل الوجبات الدسمة والسريعة.

7- المشروبات الغازية:

ممكن الموضوع ده بالذات يبقى مجرد ذوق وتفضيلات للشخص إنه يحب يشرب مشروبات غازية بدل المياه العادية لما يعطش، لكن الصودا بتحتوى على حمض الفسفوريك اللي بتدخل وبيقلل الكالسيوم والمغنسيوم في العضم، فلو كنت بتشرب صودا كتير في يومك فده معناه إن أكيد جسمك هيبقى بيكافح عشان يوصل للعنصرين دول.

ولكن طبعا خلينا نقول إن مش دايما بتكون دي الأسباب عشان تبقى بتشتهي أكله معينة، وطبعا على قد ما تقدر تعوض جسمك بالفيتامينات وتخلي بالك من صحتك النفسية ولو حسيت إنك محتاج تاكل أكله هتبوظ نظامك الغذائي مرة أو مرتين في الأسبوع مافيش مشاكل، بس بلاش دايما تخلي دي أسبابك ومبرراتك عشان تخلي بالك.