٩ مميزات للأشخاص العشوائيين: النظام مش دايما حلو

عموما طول عمرنا أهلنا بيعلمونا نبقى أشخاص منظمة ونحافظ على نظام البيت ونروق حاجتنا ونطبق هدومنا والتفاصيل دي كلها، لإنه من وجهة نظرهم ده الأحسن والأفضل عشان مليان مميزات طبعا، لكن برضه النظام زي ما له فوايد له عيوب زي إنه بيخلي الشخص موسوس زيادة عن اللزوم، والعشوائية اللي بنحاول نتلاشاها طول عمرنا عشان متعبة وليها أضرار كتير بس هي كمان برضه ليها مميزات وعيوب، وأكيد كل واحد مننا في فترة من حياته عدى عليه مرحلة إن يسمع محاضرات طويلة عريضة عن عيوب العشوائية والفوضى سواء في أوضته أو في دولابه أو على مكتبه.

لكن الحقيقة هي إن الفوضى والعشوائية ليها مميزات عمرنا ما سمعنا عنهم في المحاضرات دي وهما:

1- بتخلي عندك ذاكرة كويسة:

الشخص العشوائي غالبا هيبقى عارف هو شال حاجته فين، وبالرغم من الفوضى اللي بيبقى عايش فيها إلا إنه بيقدر يفتكر هو شال حاجته فين.

2- منظم سريع:

الأشخاص العشوائين دايما بيعرفوا يروقوا بسرعة خصوصا لو حد جايلهم أو داخل أوضيتهم، لإنهم اتعودوا يشيلوا الحاجة بسرعة ومش محتاجين يحنتفوا، وفي نفس الوقت زي ما قولنا إن لو حد سألهم على حاجة ذاكرتهم هتخليهم يفتكروا هما شالوها فين.

3- بيستغلوا المساحات:

الناس العشوائيين بيعرفوا يستغلوا الأماكن الفاضية اللي قدامهم، لإنهم مش هيفضلوا يصنفوا كل مساحة قدامهم في البيت أو الأوضة، كل الأماكن متاح يتحط فيها أي حاجة.

4- المشاكل التافهة مابتزعجهمش:

بالنسبة لهم الوقت اللي ممكن يتكلموا فيه عن إزاي هيحافظوا على الحاجات والأماكن اللي يتشال فيها الحاجة وتنظيم الحاجات، ممكن يستغلوه في حاجة تانية.

5- دايما عنده مفاجآت:

معنى إن الشخص بيبقى مش منظم إنه بيرمي أي حاجة في أي حته، فده معناه إن الأشخاص العشوائيين معرضين أكتر إنهم يلاقوا فلوس في الهدوم الشتوي، وفي الشنط اللي مابيلبسوهاش.

6- متفائلين:

الأشخاص المنظمين بيبقوا بيحبوا حاجتهم وبيخافوا عليها وعشان كده أغلب الوقت بيبقى عندهم رعب إن الحاجة دي تضيع أو تتكسر أو تبوظ، لكن الناس العشوائيين بيبقى مش فارق معاهم شوية لإن عندهم اعتقاد إن الحاجة الضايعة أكيد هيلاقوها هنا ولا هنا، وحتى لو ضيعوا حاجة مش هيعرفوا إلا بعدها بفترة، وده هيخفف الزعل إن الحاجة دي ضاعت.

7- مابيهتمش بكلام الناس:

واحدة من أهم النعم اللي في الدنيا إنك ماتبقاش مهتم بكلام الناس أو أحكامهم، وغالبا العشوائيين كده مابيهتموش ممكن الناس تقول عليهم إيه ودي حاجة مريحة وبتخلي الشخص واثق في نفسه.

8- بيحافظ على وقته:

مابيضعوش وقت في التفكير والكلام والمجهود في الترويق وتنظيم الدنيا، وبيخلوا وقتهم ده لحاجات تانية أهم.

9- أغلب الوقت عندهم حاجات زيادة:

لإن الأشخاص العشوائيين بيبقوا مش فاكرين هما اشتروا ايه، ده بيخليهم يجيبوا من الحاجة الواحدة عدد، فغالبا هما دول اللي هتلاقي عندهم قلم زيادة وملازم زيادة.