ليه الناس لسه بتحب مسلسل”Grey’s Anatomy”؟

مسلسل grey’s anatomy كان من أشهر المسلسلات اللي يفتكرها جيل التمانينات والتسعينات وكان بيتعرض على قناة نايل لايف والناس تفضل مستنية تعرف “ميريديث” وصحابها هيعملوا إيه النهاردة ..وشخصية دكتور “ديريك” اللي عمله “باتريك ديمبسي” كان من الأدوار الأيقونية في المسلسل وعلاقته بـ ميريدث من أكتر الحاجات اللي شدت الناس للمسلسل وكانت بتستناه.. وفي الموضوع ده هنقولك ليه الناس  حبت المسلسل

1-المسلسل بيعرض علاقات مختلفة وتطورها كل موسم مش بس علاقات الحب لا كمان علاقات الصداقة بينهم  والأزمات اللي بتحصل في حياتهم الشخصية..

2-بيركز على الحاجات اللي ممكن تحصل مع أي حد في أول كاريره زي  النجاح والفشل ورحلة التأقلم وإثبات الإنسان نفسه في مكان جديد عليه..

3-كل حالة من المرضى كان بيحصلها حاجة في حلقات المسلسل كنا بنتعاطف معاها وبنعرف تفاصيلها ونحبها ونحس إنهم صحابنا مش مجرد ضيوف شرف ومن أكتر الشخصيات اللي أثرت فينا شخصية “إيزي” و”ديني” اللي أتقدم للجواز ليها قبل ما يدخل العمليات ولكنه أتوفى بعد العملية.

4-كل شخصية من المسلسل كانت بتكافح عشان توصل لحاجة من غير ماتاخد بالها ومع الوقت بنلاقي كل شخصية بتتطور وبتعرف هى عايزة إيه في حياتها سواء ميريديث أو كريستينا أو ألكس كله لقى نفسه بشكل ما مع الوقت.

5-شخصية “ديريك” رغم إنها كانت أنانية بعض الأوقات وفيها عيوب لكنه في نفس الوقت كان شخص حقيقي بيحاول يبقى كويس أوقات و يدعم اللي حواليه ويشجعهم  بس ساعات بيغلط زي أي حد..

6-رغم إن المسلسل في أساسه بيتكلم عن دكاترة ومتدربين في مستشفى لكنك عمرك ما بتحس إنك بتتفرج على شيء معقد لأنهم بيشرحوا كل حاجة بتحصل وبيخلوك عايش اللي بيحصل معاهم كأنك من ضمن الفريق.

7- علاقة الصداقة بين ميريديث وكريستينا كانت من أجمل العلاقات ورغم اختلاف شخصياتهم لكن كانوا بيدعموا بعض فعلا ويقفوا جنب بعض في الأوقات الصعبة وبقيت ميريديث الشخص المفضل ليها.

سواء حبيت المسلسل أو ماحبتوش بس لازم نعترف إن في عدد كبير من الناس حبوه ومر معاهم بمراحل وذكريات كتير على مدار 15 سنة أتعرض فيهم  20 موسم ..فيهم اتطورت الشخصيات وحياتهم واتغيرت شخصيات وجه غيرها..وموت شخصية ديريك اللي أثر فينا لكن على الرغم من الأشياء الحزينة إلا إن ميريديث وصلت من مجرد متدربة لدكتورة كبيرة معروفة..