10 أسباب بتخليك تحس إن اليوم مافيهوش وقت كفاية

أوقات كتير بنحس إن اليوم بيخلص بسرعة ومابنلحقش نعمل فيه أي حاجة.. فا بتحس بالتقصير وإنك محتاج حاجة بس مش عارف إيه هي؟ وهل في حاجة ناقصة فعلًا أو إنت بتعمل مجهود أقل؟ ولا إنت بتعمل اللي عليك ومافيش وقت في اليوم؟ ولا حاجة تالتة خاااالص؟

خلونا نشوف 10 أسباب بتخليك تحس إن اليوم مافيهوش وقت كفاية وإزاي تحل الموضوع ده..

حسب موقع LifeHack ومجلة GreaterGood 

1- أول سبب عارفين إنه هيبقى مفأجاة طبعًا وهو إنك “مابتصحاش بدري”.. ايوا زي ما قرأت كده الصحيان متأخر هيحسسك إنك مش هتلحق تعمل حاجة وإن الوقت مش هيكون كفاية تنجز فيه حاجة طول اليوم

2- “لو مانمتش وقت كفاية” وهنا ييجي وقت “الدراسات” اللي بتقول إن اللي بيناموا وقت كفاية من 7 لـ 8 ساعات بيصحوا عندهم نشاط وكفاءة أكتر بكتير من الناس اللي بتنام وقت قليل وما بتاخدش كفايتها من النوم.. واخد بالك ياللي الـ alarm كل ما تظبطه يطلعلك ساعتين تلاتة!

3- نيجي لتالت حاجة بقى وهي “قلة النظام”.. الناس اللي يومها عشوائي وماعندهمش نظام مش بس بيضيعوا وقت يدوروا على الحاجات اللي هيعملوها لأ وكمان بيقللوا إنتاجيتهم  

4- مش حاطت ديدلاين لنفسك.. عارفين إن الديدلاين بيجيبلك بانيك أتاك بس إنك تسيب الحاجات سايحة وماتحطلهاش مدة معينة تبقى عارف إنك تقدر تخلص فيها الحاجات دي هتلاقي نفسك بتاخد ساعات في حاجة ممكن تخلص في دقايق.. أو تاخد أيام في حاجة ممكن تخلص في يوم واحد

5- تبقى شخص سهل يتشتت.. أغلبنا عنده قلة انتباه ومابيعرفش يركز كويس في الحاجة اللي بيعملها فا تلاقيه بيشتغل على حاجة ومش مركز معاها يفضل يبص في التليفون أو يتشغل مع حد تاني أو يتحجج بقى.. ده أنا ما كلتش وما شربتش لأ ده أنا محتاج أدخل الحمام ويدور على أي حاجة تشتته

6- نقطة كمان من أسباب إحساسك إن اليوم مافيهوش وقت كفاية هي إنك “ماتحددش الأولويات”.. إيه هي أهدافك الأساسية؟ إيه الشيء الأهم وإيه الشيء المهم؟ وإيه اللي ممكن يتعمل الأول وإيه اللي ممكن تأجله؟ 

طبعًا كتير مننا ما بيسألش الأسئلة دي.. بيشمر وينط في التاسكات اللي عنده وزي ماتيجي تيجي

7- لو ماعندكش روتين يومي.. الروتين مش دايمًا ممل مش لازم يومك كله يبقى روتيني بس إنك تصحى على الله وتشوف الكلام بيقول إيه وخلاص ده بيضيع وقت ويضيع اليوم منك.. طبعًا مش هنقولك إن أغلب الأشخاص الأغنياء والعباقرة عندهم روتين يومي بيمشوا عليه عشان مالناش دعوة إحنا بالكلام ده يا عبده.. بس المهم إن عدم وجود روتين يومي بيحسسك إن اليوم مافيهوش وقت وبتكون تايه

8- القلق إنك مش سريع.. تلاقي نفسك متسربع على طول وحاسس إنك متأخر فا تبدأ تتعامل بهرجلة ومافيش سلاسة ولا تفكير وبتكون متهور.. وفي الأخر النتيجة إيه؟
بتغلط مع إن الحياة مش سباق جري.. هي عاملة زي المارثون كده.. طويلة وبتاخد وقتها 

9- تكون سلبي.. تقعد تقنع نفسك إنك مش هتلحق تعمل دي ولا دي عشان وراك حاجات تانية وفي الأخر؟ لأ هتنجز دي ولا دي

10- إنك ماتقولش “لأ”.. في مفاجأة كده محوشينها للحبايب وهي إنك تقدر تقول “لأ” في أي وقت وفي أي حالة عادي تخيل؟
إنما كل ما حد يقولك على خروجة أو يطلب منك حاجة أو أي حاجة هتضيع وقتك في العموم تقوم موافق عليها يبقى مش هتخلص وهتنسى نفسك 

في الأخر طبعًا محتاجين نشوف ممكن نحل الموضوع ده إزاي.. ونعرف إزاي نحس إن اليوم كافي والوقت هيقضي نظبط الحاجات اللي محتاجة تخلص والحل هو إنك “ماتعملش الحاجات اللي قولناها فوق دي وتعمل العكس”