10 أفلام مناسبين للأجواء الشتوية

بمناسبة الأجواء الشتوية وعودة ليالي القعدة في البيت تحت البطانية مع كوباية الشاي بالنعناع أو الهوت شوكليت أو السحلب أو أي مشروب سخن بتحبه عامة.. وكمية مش طبيعية من اليوستفندي.. فإحنا عملنالكوا تجميعة لـ 10 أفلام أجنبية ممكن تتفرج عليهم في الشتاء لو عندك وقت فاضي في يومك أو عايز تتفرج على حاجة مناسبة مع الأجواء الشتوية اللي إحنا فيها دلوقتي

1- سلسلة Harry Potter 

8 أجزاء عن سلسلة من 7 روايات بتحكي عن هاري بوتر وصحابه هيرميوني ورون في مدرسة هوجورتس للسحر.. وصراع هاري بوتر مع اللورد فولدمورت.. وما بين كل ده عن صراع الخير والشر.. والصحاب والعيلة والحب.. وحاجات تانية كتير.. محبي هاري بوتر أو الـ “بوتر هيدز” عادة بيعملوا Re-watch للسلسلة كل شتاء.. ولو أنت ماتفرجتش على السلسلة دي قبل كده فأنت فايتك كتير.. ومفيش أحسن من الشتاء عشان تتفرج على هاري بوتر لأول مرة.

2- Frozen 

لو بتحب الأنيميشن ففيلم Frozen هو الاختيار الأمثل للشتاء.. فيلم كل حاجة فيه شتوية حتى قصته اللي بتحكي عن “آنا” اللي بتتعاون مع رجل الجبل “كريستوف” في رحلة ملحمية شتوية عشان يدوروا على أختها “إلسا” اللي قواها الجليدية حبست مملكة “آريندل” في شتاء أبدي.. والفيلم كمان musical.. فأنت هتعيش في تلج وشتاء وهتسمع أغاني حلوة

3- سلسلة Twilight 

الناس اللي بتحب أفلام مصاصي الدماء والمستذئبين والعالم ده.. فسلسلة أفلام Twilight هتكون اختيار مناسب ليهم في الشتاء.. عن قصة “بيلا سوان” اللي واقعة ما بين حبها لمصاص الدماء “إدوارد” وما بين صاحبها المستذئب “جايكوب” اللي بيحبها.. وقصص بقى حب ودراما وأكشن وخيال.. وكل ده في أجواء شتوية وتلج 

4- Eternal Sunshine of the Spotless Mind 

بيكتشف “جويل” إن “كليمنتين” حب حياته، مسحته من ذاكرتها تمامًا.. مون شدة الأذى والغضب بيقرر هو كمان يعمل عملية معقدة عشان يمسحها من حياته.. لكن مع اختفاء ذكرياته الجميلة عن “كليمنتين” واحدة واحدة.. حاجة غير متوقعة بتحصل.. ودلوقتي “جويل” بقى عنده شكوك وبيفكر إنه يوقف العملية اللي مش ممكن تتعكس.. يا ترى هيحصل إيه؟

5- A Christmas Carol 

من أكتر الأفلام الكلاسيكية المرتبطة بالشتاء والكريسماس.. البخيل “إبينيزر سكروج” بيصحى في ليلة الكريسماس على أرواح بتكشف له حياته الحزينة والفرص اللي ضيعها في شبابه وقسوته الحالية والمصير السيء اللي مستنيه لو ماغيرش طريقته

6- سلسلة The Lord of the Rings 

سلسلة من 3 أجزاء أساسها الصراع بين الخير والشر في أحداث خيالية فيها أكشن وحب وسحر وقصة مناسبة جدا للأجواء الشتوية 

7- The Revenant 

الفيلم اللي فاز فيه ليوناردو دي كابريو بالأوسكار.. فيلم كله عبارة عن برد وتلج لدرجة إنك هتبقى حاسس إنك بردان وأنت بتتفرج عليه.. وبيحكي عن راجل في رحلة لتجارة الفراء في عشرينيات القرن الـ 19 بيكافح عشان يعيش بعد ما دب هاجمه وأعضاء فريق الصيد بتاعه سابوه بعد ما فقدوا الأمل إنه يعيش وافتكروه مات 

8- The Mountain Between Us

استكمالا للأجواء الشتوية والمعاناة وضيق التنفس بس المرة دي في إطار رومانسي شوية.. الفيلم بيحكي عن اتنين بعد حادث طيارة بيلاقوا نفسهم وسط جبل معزول وكله تلج وبيحاولوا الاتنين يبنوا علاقة عشان يقدروا يعيشوا في الظروف السودة دي ولما بيفقدوا الأمل في المساعدة بيقرروا يخوضوا رحلة خطيرة في البرية سوا

9- Ice Age 

ونرجع تاني لمحبي الأنيميشن.. الفيلم ده اللي اتعمل منه أجزاء كتير بس يفضل أحلى واحد فيهم هو أول واحد نسخة 2002.. اللي بيحكي عن 3 حيوانات: ماموث وكسلان ونمر.. بيخرجوا سوا في رحلة مضحكة عشان يرجّعوا طفل بشري لأبوه وسط البرد والتلج والعصر الجليدي

10- The Day after Tomorrow 

لمحبي أفلام نهاية العالم ومحاولات النجاة والناس اللي بتتجمع كلها في مكان واحد عشان يحاولوا يعيشوا.. بس المرة دي بقى محاولات النجاة من عاصفة مفاجئة بتيجي كل شوية وبتحول كل حاجة لتلج وجليد

بنتمنالكوا مشاهدة ممتعة وليالي شتوية لذيذة