10 حاجات لازم تعملهم مع أولادك في فترة المراهقة
كتير من الناس مابيبقوش عارفين يتعاملوا مع ولادهم إزاي في فترة المراهقة مش عارفين يشدوا ولا يرخوا ..يصاحبوهم ولا يكونوا جادين معاهم وده بيسبب مشاكل كتير بينهم علشان كده في الموضوع ده هنقولك شوية حاجات تساعدك تقوي علاقتك بأولادك وفقا لموقع Psychcentral و مدونة Daniel wong .
1-تتناقش كتير معاهم وتسمعهم كويس بتركيز كأنكوا صحاب وتبنوا قواعد وتتشاركوا في عرض أرائكم وفهم وجهة نظر بعض.
2-تحسسهم إنك عايز تساعدهم مش عايز تتحكم فيهم عن طريق إنك تتابعهم من بعيد وتسألهم هما عايزين يعملوا إيه مش أنت عايز إيه لإن ده بيحسسهم إنهم بيتحكموا في حياتهم ومفيش حاجة مفروضة عليهم.
3-لازم تحترم مساحتهم الشخصية وماتحاولش تعرف حاجة بالعافية علشان مايفقدوش الثقة فيك ومن الأفضل تسيبهم يجولك يحكوا لوحدهم.
4-تقضوا وقت مع بعض تشاركهم فيه اهتمامتهم والحاجات اللي بيحبوها علشان تبنوا ذكريات حلوة مع بعض.
5-ماتقارنش ولادك بحد تاني وتقولهم ابن خالتك أحسن منك و ابن عمتك أشطر منك لإن المقارنة بتدمر المراهقين وعلاقتهم بيك.
6-خليك هادي وأتكلم بهدوء وماتقولهمش كلام سلبي زي أنت فاشل بس ممكن تقول كلام إيجابي حتى لو أنت متعصب من تصرفاتهم زي أنا بتضايق لما بتعمل سلوك معين علشان بحبك وخايف عليك.
7-خليك قدوة لولادك لأنهم بيتعلموا منك فمن المهم أنك تعترف بغلطك وتعتذر عنه لأن ده بيعلمهم المسئولية و إنهم مايكابروش في الغلط.
8-ركز على الحاجات اللي فعلا مهمة يعني بلاش تتخانق معاهم علشان لبسهم أو تسريحة شعرهم وفر الحاجات اللي تضايقك منهم لأخلاقهم و طريقة تعاملهم في الحياة.
9-مش لازم تخاف عليهم زيادة لدرجة إنك تمنعهم من التجربة علشان خايف يغلطوا طيب ما يغلطوا ! سيبلهم الفرصة إنهم يغلطوا ويتعلموا من أخطائهم.
10- شجعهم لما تلاقيهم بيعملوا حاجة صح وشاورلهم عليها وقولهم إنك خدت بالك وفخور بيهم علشان يستمروا فيها.
فى الأخر بنقولك إن التربية الإيجابية شيء صعب وبيحتاج مجهود كبير واحنا عارفين إنها حاجة ماكانتش موجودة زمان بس دورك تحاول تعوض ولادك عن الحاجات اللي مخدتهاش زمان وتتعلم معاهم وماتنساش إن مفيش حد كامل ولا مابيغلطش أنت كمان إنسان وعندك مشاعر فلازم تبين لولادك ده علشان يعرفوا إنك فعلا خايف عليهم وبتحبهم مش مجرد عايز تديهم أوامر وبكدا هيسمعوا كلامك ويحبوك.
