10 حاجات مايعرفهاش غير محبي الكتب

النهاردة يوم محبي الكتب.. وعشان عارفين إن محبي الكتب عندهم طقوس معينة في القراءة وفي اختيار الكتب.. وبيحسوا بمتعة مختلفة لما بيمسكوا كتاب وبيحسوا إنهم في عالم مختلف لوحدهم لدرجة إنهم ممكن يقرأوا نفس الكتاب كذا مرة من غير مايزهقوا  وماحدش فاهم إزاي بيقدروا يعملوا كدا ويتعلقوا بالكتب زي صحابهم بالظبط.. عشان كدة في الموضوع ده هنقولك حاجات مايعرفهاش غير محبي الكتب وفقا لموقع  buzzfeed وموقع Timesofindia :

1- لازم الناس اللي حواليهم يبقوا شايفينهم مدمنين كتب وبيقولولهم إنهم بيصرفوا كل فلوسهم على شراء الكتب مع إنهم ممكن ينزلوها pdf.. بس هما عارفين كويس أوي متعة القراءة من الكتاب وبيستمتعوا بيها والكلام مابيشغلهمش.

2-لو بدأوا يقروا كتاب قبل مايناموا خاصة لو كان الكتاب ده مشوق يبقى استحالة يناموا من غير ما يخلصوه ويعرفوا نهايته إيه!

3-لما بيقروا كتاب مبسوطين بيه وحاسينه حلو بيبقى حزنهم أضعاف فرحتهم لما بيخلص لإنهم بيحسوا إنهم فقدوا صديق قضوا معاه وقت طويل.

4-لما حد بيسألهم عن كتابهم المفضل بيكون صعب عليهم يجاوبوا باسم كتاب واحد لأن كل كتاب بيبقى مر معاهم برحلة مختلفة وحبوا جزء منه فبيبقى في إحساس مختلط مش عارفين يعبروا عنه ع ولو حاولوا يعبروا الناس بتفتكرهم بيتفلسفوا عليهم.

5-لما بيرشحوا لحد كتاب شايفينه مميز والحد ده مايستمتعش بيه بنفس الدرجة أو مابيفهمش الكتاب بيحسوا بالطعنة جواهم.

6-لما بيشاركوا كتبهم المفضلة مع حد مش عارفها بيبقى نفسهم يكون عارفهم عشان يتناقشوا فيها ويحللوها سوا.

7-أكتر حاجة مابيحبوهاش لما بيشوفوا رواياتهم المفضلة بتتحول لأفلام ومسلسلات لإنهم بيبقوا خالقين عالم في دماغهم وشخصيات مختلفة اتعلقوا بيها خلاص بشكل فماينفعش تبقى حاجة تانية.

8-حافظين كل أماكن المكتبات والناس اللي شغالين فيها حفظاهم.. وممكن يروحوا بس يطمنوا إن مفيش كتاب جديد فاتهم ويلقوا نظرة ويمشوا كإنهم بيطمنوا على ولادهم.

9-المكان اللي بيشيلوا فيه كتبهم بيبقى مكان له رعاية خاصة وماينفعش حد يقرب منه.

10– أخر حاجة وأهم قاعدة هي إن الكتب مابتتسلفش عشان بيخافوا عليها أكتر من حاجات كتير في حياتهم.

وفي الأخر الكتب شيء مهم عندهم زي ما في ناس عندها هوايات وتفضيلات مهمة وبيحسوا بالسعادة لما بيعملوها فالكتب بالنسبالهم كدة بالظبط فماتستغربش من حبهم ليها.