10 حاجات هتخليك تشتغل بذكاء وماتضيعش وقتك
في الفترة الأخيرة انتشرت مقولة بتقول Don’t work hard, work smart والناس اختلفت في تفسيرها بسبب إنهم فهموها غلط في ناس كانت شايفة إن الشغل بجد هو الصح وناس تانية شايفة إن الشغل بذكاء هو الصح بس المقولة ماكنتش قصدها إننا نهمل الشغل أو مانهتمش بيه كفاية بالعكس المقولة المقصود منها إنك متقعدش ساعات طويلة علشان تخلص شغل معين، لا إنك تشتغل بذكاء، يعني تعمل نفس الشغل فى وقت أقل وبنفس الجودة علشان كده في الموضوع ده هنقولك ازاي تعمل كده بسهولة حسب موقع BetterUp و indeed
1-اعرف أكتر وقت بتبقى مركز فيه إمتى وخلص فيه التاسكات المهمة لأنك لو اشتغلت فى وقت ماعندكش فيه طاقة هيخليك تطلع الشغل مش مظبوط.
2- اعرف نقاط قوتك وضعفك واستخدمها لصالحك يعني مثلا لو لقيت إنك فيه حاجة مميز فيها أو صفة حاول تطورها أكتر وتخليها تخدمك في الشغل.
3-ماتشتغلش على حاجتين في نفس الوقت علشان دماغك ماتتشتتش.. الأحسن تركز على كل حاجة لوحدها علشان تخلصها بكفاءة وبسرعة.
4-حاول ماتخليش حياتك الشخصية وحالتك النفسية تأثر على شغلك و أتعلم تفصل بينهم لأن في الأخر أنت رايح شغلك ولازم تعمل اللي عليك بجودة.
5-قسم يومك ووقتك على حسب التاسكات اللي عندك وسيب لكل حاجة وقت معين تعملها فيه وماتخرجش عنه لأي سبب علشان إيقاع يومك يمشي مظبوط وشغلك يبقى منظم أكتر.
6-مهم أوي تاخد بريك بين كل تاسك والتاني علشان دماغك تفصل شوية لإن تركيزنا بيقل لما بنقعد فترة كبيرة شغالين علشان كده مهم نفصل شوية علشان نرجع طاقتنا ونشاطتنا.
7-حاول تبعد عن السوشيال ميديا و أي عوامل تشتيت و أنت شغال لحد ما تخلص اللي وراك.. وياريت كمان تقفل الإشعارات علشان تفضل مركز .
8-اعمل List بالحاجات اللي المفروض تنجزها وعلم عليها كل ماتخلص حاجة لأن ده هيديك شعور بالإنجاز ويخليك متحمس تخلص حاجات أكتر.
9-لو حد من زمايلك طلب منك مساعدة و أنت عندك شغل تاني مركز فيه عادي إنك تقوله أنك مشغول دلوقتي.. ولما تخلص هتركز معاه.
10- من المهم إنك تتواصل مع اللي حواليك وتطلب مساعدتهم لو في حاجة مش واضحة ولو في حاجة مش فاهمها مش عيب تسأل، بالعكس هتكون بتعمل شغلك أحسن بدل ما تتوتر وماتبقاش عارف تتصرف لأخر لحظة.
في الأخر بنقولك لازم تكون بتشتغل بحب وحماس علشان تقدر تعمل كل الحاجات دي، وإن عادي تغلط في الشغل، وعادي تاخد وقت على ما تتعلم وتكون بتشتغل بذكاء.. خد كل خطوة واحدة واحدة، وماتضغطش على نفسك وأكيد في يوم هتوصل.. بس لما توصل متبقاش نسخة من اللي صعبوها عليك.
