10 سلطات تروق بيها على نفسك في الصيف

السلطة جزء لا يتجزأ من كل بيت مصري وعربي أصيل.. هتلاقي السفرة ماتخلاش منها بكل أنواعها.. سواء سلطة الخيار والطماطم أو سلطة الطحينة أو سلطة الزبادي.. مش بس عشان فوايدها الكبيرة لا عشان فعلا بتدي الأكل طعم تاني وبتفتح نفسك..والحلو إن دلوقتي بقى في أنواع كتير من السلطات ينفع تكون وجبة لوحدها وبيتم إضافة بروتين ليهاعلى حسب ذوقك.. عشان كده في الموضوع ده هنقولك أنواع سلطات ممكن تجرب تعملها في البيت لو زهقان من السلطة التقليدية أو عامل دايت أو عايز تاكل حاجة خفيفة في الحر ده من غير مجهود كبير.


1-سلطة السيزر:
هي نوع سلطة إيطالي ومكوناتها خس وقطع صدور دجاج مشوية وعيش محمص وجبنة مبشورة.. وممكن تضيفلها ملح وفلفل وزيت زيتون لو بتحبهم.. وبالنسبة للصوص باختيارك عشان لو عامل دايت.



2-سلطة البنجر:
من أهم السلطات لأنها مفيدة للجسم والبنجر مفيد للهيموجلوبين وكمان بيساعد على الهضم.. ومكوناتها بنجر مسلوق متقطع مكعبات.. ونضيف عليه خليط (سكر-ملح-فلفل الأسود-كمون- عصير ليمون- زيت الزيتون)



3-السلطة اليونانية:
سلطة خفيفة ولذيذة ومكوناتها موجودة عندنا في البيت ومش محتاجة حوارات كتير.. لأنها عبارة عن قطع خيار وطماطم وخس وفلفل ومعاهم قطع جبنة فيتا مكعبات صغيرة..  وممكن نضيف عليها زيت زيتون وخل تفاح وشوية ملح وفلفل صغيرين.



4-سلطة التونة:
عبارة عن مكرونة مسلوقة وبيتضاف عليها قطع تونة صغيرة وزيتون أسود و ذرة وفلفل وخس وحلقات بصل وبيتعصر عليها ليمون ونرش شوية فلفل أسود وملح.. ولو مش عاملين دايت ممكن نحط صوص مايونيز عليها.



5-سلطة الفتوش:
هي سلطة شامية مشهورة.. ومكوناتها خس وقطع طماطم وخيار وبقدونس وفلفل وبصل وفجل وسماق وتوم مهروس وعصر ليمون وزيت زيتون وشوية نعناع ناشف.. وعليهم عيش لبناني محمص.

6-سلطة الشيف:
السلطة مكونة من الطماطم والخيار والذرة والخس والجزر وشرايح بيض مسلوق ولانشون أو تركي وجبنة أي نوع.. وممكن ترتجل وتحط أي حاجة عندك في التلاجة.



7-سلطة التفاح:
ودي من أكتر السلطات اللي هتنعشك في الصيف.. ومكوناتها قطع تفاح شرايح وخس وممكن نحط عليها رمان أو زبيب ومعلقة دبس رمان ونعناع.. وممكن يتضافلها علبة زبادي وجبنة بارميزان.



8-سلطة الفراولة:
وبما إن الفراولة من الفاكهة اللي بنحبها في الصيف هيكون ميكس جامد إننا نحط قطع فراولة مع جرجير وخس وممكن نضيف فيها كمان ورق سبانخ عشان تزود الفايدة.. وعليهم خل بلسميك وزيت زيتون وممكن نضيف جبنة فيتا لو حبينا.

9-سلطة الخوخ:
ودي برضو هتدلعك في الصيف هتجيب شوية خوخ تقطعهم شرايح وتشويهم ومعاهم جرجير وبصل وجبنة حلوم وتحط عليهم مسطردة وعسل أبيض وزيت زيتون وخل.



10-سلطة البطاطا الحلوة:
وهنا بنسلق البطاطا مكعبات صغيرة أو بنقطعها مكعبات بعد مانشويها..ومعاها خس وجرجير وممكن نحط ذرة أو رمان معاهم.. ولو حبينا نزود جبنة أي نوع.. وعليها من فوق خل بلسميك وعسل



وماتنساش إنك مش لازم تعمل نفس المكونات وتستخدم نفس الخضار في السلطة بتاعتك.. بالعكس ممكن ترتجل وتعمل أنت سلطة خاصة بيك من اختراعك وتضيف فيها المكونات اللي بتحبها والبروتين المفضل عندك.. ولو عملت كده ابقى قولنا عملت سلطة إيه!