10 علامات بتظهر على مريض الزهايمر.. وإزاي تعرف تتعامل معاه

الزهايمر بيعتبر واحد من أكبر أسباب إصابة كبار السن بالخرف وحسب منظمة الصحة العالمية فعدد المصابين بالزهايمر 55 مليون شخص حوالين العالم.. ومتوقع العدد ده يزيد ويوصل لـ 139 مليون في 2050

والزهايمر من الأمراض اللي أعراضه بتظهر على المريض وللأسف بيتجاهلها ويعتبرها حاجة عادية بتحصله بس بسرعة بتلاقي الحالة اتدهورت.. عشان كده لازم تخلي بالك من الأعراض دي: 

1- فقدان ذاكرة اللي بيعطل الحياة اليومية

ده من أكتر الأعراض الشائعة.. وبسببه المريض مابيبقاش قادر يفتكر الأحداث المهمة والتواريخ.. ويضطر يعتمد أكتر على وسائل تساعده في التذكر وكمان يعتمد على ناس تانية في مهام كان بينفذها لوحده عادي

2- مابيعرفش يخطط أو يحل مشاكل

لما بيبدأ يحصل تغيرات في الذاكرة المريض بيواجه صعوبة في التركيز أو التفكير بشكل منطقي لحل مشاكله أو متابعة مهام حياتهم اللي بياخدوا فيها وقت طويل مقارنة بقبل كده 

3- صعوبة في إتمام المهام المألوفة

الأشخاص اللي بيعانوا من الزهايمر بيواجهوا مشاكل في تنفيذ حاجات كانوا بيعملوها عادي وبسهولة زي السواقة مثلًا أو إنهم يشتروا احتياجاتهم اليومية من السوق

4- الارتباك مع الزمان والمكان 

اللي بيعانوا من الخرف أو الزهايمر بتلاقيهم مش قادرين يحددوا الوقت اللي هما فيه أو يعرفوا المكان اللي هما موجودين فيه وإزاي وصلوا له 

5- صعوبة في الرؤية 

بيعاني مرضى الزهايمر والخرف من تغيرات في الرؤية وده بيأدي لعدم قدرة على التوازن وتحديد المسافات وتحديد الألوان وكمان في القراءة

6- صعوبة في الكلام والكتابة

مرضى الخرف والزهايمر هتلاقيهم مش قادرين يكملوا المحادثات وممكن تلاقيهم سكتوا في نص الكلام ومش قادرين يكملوه.. كمان هتلاقيهم بينسوا المفردات والأسامي وبيسموا الحاجات بأسامي تانية غير أساميها

7- نسيان أماكن الحاجة

اللي بيعانوا من الزهايمر ممكن يحطوا الحاجات في أماكن غير أماكنها وبعدها ينسوها تمامًا والأصعب من كده إنهم هيحسوا إنها اتسرقت ويبتدوا يتهموا ناس إنهم سرقوها

8- مابيقدروش يحكموا عالأمور صح

نتيجة للإصابة بالزهايمر هتلاقي المرضى مابيقدروش ياخدوا أبسط القرارات بطريقة صح.. زي أمورهم المالية أو حتى اهتمامهم بنفسهم وبنظافتهم الشخصية

9- الانسحاب من الأنشطة الإجتماعية

نتيجة لعدم قدرة المريض على ممارسة مهامه اليومية البسيطة وكمان عدم قدرته على إجراء المحادثات هتلاقيه دايمًا بينسحب من الحياة الإجتماعية وبيقلل علاقاته وكمان مابيقدرش يكمل في شغل

10- تغيرات مزاجية وشخصية

بيعاني المصابين بالزهايمر من تغيرات مزاجية كبيرة هتلاقي مشاعره بتتغير بسرعة من قلق لخوف لإرتباك لشك لإكتئاب.. ولما بيخرجوا من الأماكن اللي متعودين عليها بيبقوا منزعجين أكتر من العادي وحاسين بعدم راحة 

كل دي علامات لو لاحظتها في نفسك أو في حد من القريبين منك لازم تبدأ في الكشف المبكر.. التشخيص المبكر للحالة بيساعد في العلاج اللي هيقلل أضرار وأعراض المرض.. 

وخليك فاكر إنك لو اكتشف إن حد قريب منك مصاب بالمرض أو ظهرت عليه أعراضه طبيعي تقلق وماتبقاش عارف تتعامل إزاي.. بس الصح إنك لو هتتكلم معاه ماتتكلمش بشكل مباشر لإن ده بيحسسه بالتهديد.. حاول توفرله كل الحاجات اللي ممكن تخليه مرتاح وهو بيتكلم أو بيحكيلك أكتر عن المشاكل اللي بتواجهه أو عن العلامات اللي لاحظتها عليه.. حتى لو هتعرض عليه تروحوا للدكتور لازم ده يكون بإسلوب هادي بدون ما تحسسه إنك بتجبره أو بتضغط عليه

وفي تعاملاتك اليومية مع الشخص ده.. خليك فاكر إنه مش بينسى بمزاجه هو بيعاني مع مشكلة ممكن يكون مش مدرك ليها أصلًا.. بلاش تلومه أو تتريق عليه أو حتى تضغط عليه عشان يفتكر.. كل ده مابيبقاش مفيد خالص بالعكس بيزود المشكلة