10 غلطات بتقصر عمر حيوانك الأليف
حيواناتنا الأليفة بنعتبرهم زي ولادنا.. بنحبهم وبندلعهم وممكن نختار نفضل قاعدين معاهم في البيت بدل ما نخرج مع البني آدمين.
ومفيش شك إن الحيوانات الأليفة بتبقى جزء من عيلتنا.. لكن للأسف كتير مننا بيعمل غلطات في تربيتهم.. وأحيانا الغلطات دي بتسبب لهم مشاكل صحية خطيرة.. وممكن حتى تقصر عمرهم.
وحسب موقع PetLife جمعنالكوا 10 غلطات شائعة ممكن تقصر عمر حيوانك الأليف:
1- مابتختارش الأكل باهتمام وتركيز:
أيا كان نوع الأكل اللي بتقدمه لحيوانك الأليف.. لازم تهتم بالمكونات.. أول خطوة هي إنك تقرأ المكونات على العلبة كويس.. الأكل ما يكونش فيه مواد صناعية أو مكونات معدلة وراثيا.. ولو ناوي تعتمد على أكل طبيعي.. استشير دكتور بيطري الأول عشان تعرف المناسب لحيوانك.
مثال: القطط في البرية بتاكل لحمة نية.. لكن ده مش صحي للقطط اللي عايشة في البيت.
ودي شوية حاجات لازم تاخد بالك منها:
- ماتزودش كميات الأكل.. لأن دي واحدة من أكتر الأخطاء المنتشرة.. وبتسبب مشاكل صحية خطيرة زي السمنة وأمراض القلب.
- دائمًا بص على الكمية والسعرات الحرارية المكتوبة على العلبة عشان تتأكد إنك مش بتدي أكتر من اللازم.
- خلي دايما عندهم مياه نضيفة ومتجددة طول الوقت.
- قبل ما تختار أي نوع أكل.. اقرأ المكونات الأول.. وشوف مناسبة لحيوانك ولا لأ
2- مابتروحش للدكتور البيطري
ماتهملش الزيارات المنتظمة للدكتور البيطري.. حتى لو حيوانك بيكرهك بسببها.. دي الطريقة الوحيدة اللي تقدر تمنع بيها الأمراض أو تكتشف أي مشكلة قبل ما تكبر.. كمان لازم تمنع حيوانك من أي أكل بايظ.. أو شرب مياه ملوثة أو اللعب في تراب ممكن يكون فيه بكتيريا أو فيروسات أو طفيليات من حيوانات تانية.
وخليك متابع مواعيد التطعيمات واللقاحات.. لأنها بتحمي حيوانك وكمان بتحميك أنت وعيلتك.. صحيح إن تكاليف العيادة البيطرية ممكن تكون عالية.. لكنها جزء من مسؤوليتك كمربي للحيوان.
ودي شوية حاجات لازم تاخد بالك منها:
- حاول تتعلم العلامات اللي بتبين الخوف أو التوتر عند حيوانك
- ما تسيبش حيوانك يخرج برا البيت من غير إشراف
- لو الدكتور كتب مضاد حيوي لحيوانك.. لازم تكمل الكورس للآخر.. لو وقفت العلاج بدري.. البكتيريا اللي عنده ممكن تطور مناعتها ضد المضاد الحيوي وتبقى المشكلة أكبر.
3- بتسيب حيوانك يدخل ويخرج من الأبواب والشبابيك براحته
لو معندكش جنينة.. ومهتم بنضافتها.. يبقى ماينفعش تسيب حيوانك يخرج للشارع براحته.. أول حاجة فيه خطر إنه يجري ويضيع أو يتصاب.. غير كده، لو ساكن في دور عالي في عمارة.. الموضوع ممكن يكون كارثي.. خصوصًا مع القطط.
القطط بالفطرة بتنجذب للحيوانات الصغيرة.. فلو شافوا عصفور مثلًا.. ممكن من غير ما يحسوا ينطوا ورا الفريسة من الشباك.. عشان كده لازم تتأكد إن حيوانك الأليف في أمان جوا البيت.. والشبابيك والأبواب مقفولة كويس.
4- مابتراجعش طوق حيوانك الأليف:
النقطة دي ممكن تكون خاصة بالكلاب والقطط شوية.
الوقت بيجري وحيواناتنا بتكبر أسرع مما نتخيل.. وعشان كده لازم تراجع الطوق بتاعهم كل فترة وتشوف لو بقى ضيق عليهم.
بالنسبة للقطط والكلاب الصغيرة.. المفروض تقدر تدخل صباع واحد بين الطوق والجلد.. أما الكلاب والقطط المتوسطة والكبيرة.. فالمفروض يكون فيه مساحة لصباعين.
وبرضه لازم تتأكد إن الطوق مش واسع بزيادة قبل ما تنزل تتمشى مع كلبك أو قطتك عشان مايفلتوش منك ويجروا بعيد.
5- مابتهتمش بنضافته:
زي ما إحنا بنحتاج نهتم بأسنانا.. الكلاب والقطط كمان محتاجين روتين منتظم للعناية بأسنانهم.. حاول تبدأ تهتم بيها من وهم صغيرين عشان يتعودوا.. واستخدم فرشاة ومعجون مخصصين للحيوانات.
ويفضل تعرض حيوانك على الدكتور البيطري مرة واحدة على الأقل في السنة عشان يفحص أسنانه.. خصوصًا لو ريحة بوقه مش لطيفة.
أما بالنسبة للعناية بالشعر.. فده بيعتمد على نوع الحيوان:
- الحيوانات اللي من غير شعر مش محتاجة تمشيط بس جلدها محتاج يتغسل بانتظام.
- الحيوانات بفرو قصير مش بتحتاج اهتمام كبير.
- أما اللي شعرهم طويل.. فلازم يتسرح كل يوم عشان ماتحصلهم مشاكل ويتسبب في مشاكل جلدية.
وبغض النظر عن نوع الحيوان.. كل الكلاب والقطط لازم يتقص لهم ضوافرهم بانتظام.
6- مابتهتمش باستحمامهم أو بتعمله بطريقة غلط:
الاستحمام حاجة أساسية للحيوانات الأليفة.. بس الموضوع بيختلف من حيوان للتاني.. القطط بتعرف تنظف نفسها كويس.. فمش محتاجة استحمام غير مرة أو مرتين في السنة بالكتير.. أما الكلاب فالوضع مختلف.. لازم تستحمى كل 3 شهور تقريبًا.. ولو مضطر تحميه أكتر من كده.. استخدم شامبو خفيف عشان ما يضرش جلده.
ونصيحة.. اغسل رأس الكلب في الآخر عشان ما يحسش بالبرد ويبدأ يرتعش.
ودي شوية حاجات لازم تخلي بالك منها:
- ما تخليش المياه تدخل في عين الحيوان أو ودانه.. خاصة لو ودانه طويلة.. عشان ما يحصلش التهاب.
- خليك مركز مع درجة حرارة المياه.. لا تكون سخنة قوي ولا باردة.
- اختار الشامبو المناسب لحيواناتك.. ولو عنده مشاكل جلدية اسأل الدكتور البيطري عن الشامبو العلاجي المناسب.
- أهم خطوة بعد الاستحمام هي التنشيف كويس لأن لو حيوانك فضل مبلول ممكن يحس بعدم راحة أو يجيله برد.
7- بتدي حيواناتك أكل البيت:
كل الدكاترة البيطريين متفقين إن أكل البيت مش مناسب للحيوانات الأليفة.. جهازهم الهضمي مش بيقدر يتعامل مع أغلب الأكل اللي بناكله إحنا كبشر.. عارفين إن صعب تقاوم نظرتهم البريئة اللي بيستعطفوك بيها.. بس كل مرة بتقولهم “لأ”.. افتكر إنك كده بتحافظ على صحتهم وبتعمل الصح ليهم.
8- مش بتديهم اهتمام كفاية:
حيوانك الأليف محتاج حبك واهتمامك.. صحيح إن القطط بتبان إنها مستقلة شوية.. بس ده مش معناه إنها مش محتاجة تحس بالحنان والحب والاهتمام والدلع.
أما الكلاب.. فدي حكاية تانية خالص.. بيحبوا الاهتمام بشكل كبير وده طبيعي لأنهم “أعز صديق للإنسان”.. الحيوانات الأليفة محتاجة تتفاعل اجتماعيًا عشان تتطور نفسيًا وجسديًا.. ولو ماخدوش الاهتمام الكافي ممكن يبقوا خوافين أو عدوانيين أو حتى عنيدين.
9- مش بتعقم قططك:
الموضوع ده قرار شخصي راجع لك تمامًا.. لكن أغلب الأطباء البيطريين بيوصوا بعملية التعقيم لأنها بتساعد الحيوان يعيش حياة أطول وأسعد.
الحاجة الوحيدة اللي لازم تاخد بالك منها لو عقّمت قطتك هي زيادة الوزن.. لأن بعد العملية كتير من القطط بتكسل وبتبدأ تخزن وزن زيادة.. طب والحل؟ راقب أكلها كويس وخليها تتحرك وتلعب بشكل منتظم.
10- بتحبس كلبك طول الوقت:
الكلاب مهما كان عمرها أو نوعها لازم تخرج وتتحرك وتتفاعل مع كلاب تانية وتكتشف اللي حواليها.. لو الكلب مش بياخد كفايته من الحركة والنشاط هيبدأ يزيد في الوزن وده ممكن يسببله مشاكل صحية كتير.. وكمان لو عنده طاقة مكبوتة غالبًا هتلاقيها بتتفجر في صورة تبويظ جزمتك أو الكنبة أو أي أثاث في البيت.. وبالمناسبة حتى القطط اللي عايشة جوه البيت محتاجة رياضة وتحفيز ذهني.. وهنا بييجي دور الألعاب اللي بتخليها نشيطة.
