10 نصايح لو عايز تلتزم في أي عادة أو روتين
الالتزام من أكتر الصفات اللي الناس بتحاول تكتسبها. الالتزام من أساسيات النجاح وبيساعدك في تحقيق أهدافك وتحسين إنتاجيتك وتغيير حياتك للأحسن، والالتزام في عاداتك أو روتينك اليومي مع الوقت ممكن يعمل تغييرات كبيرة جدا في حياتك على المستوى الشخصي أو المهني أو الاتنين.
وعشان كده جمعنالك 10 نصايح لو عايز تلتزم في أي عادة أو روتين:
1- ابدأ بحاجة صغيرة ومحددة:
بدل ما تحدد أهداف كبيرة في الأول ممكن تبقى مرهقة، قسم أهدافك لخطوات صغيرة وتقدر تديرها. يعني مثلا لو هدفك إنك تلتزم في الرياضة يوميا، فإنك تبدأ بـ 10 دقايق كل يوم، ده هيخليك تكمل وتستمر ومع الوقت الوقت هيزيد وهتلاقي بقى عندك روتين بتعمله كل يوم وقدرت تلتزم بيه.
2- خلي فيه محفز للعادة أو الروتين:
الفكرة هنا في انك تعتمد على الحاجات اللي أنت أصلا ملتزم بيها وبتحبها في إنها تحفزك وتربطها بالروتينات اللي عايز تلتزم بيها.. مثلا لو أنت بتتبسط بفنجان قهوة كل يوم الصبح، فأنت ممكن تربط عادتك الجديدة بعادتك الحالية، فمثلا لو عايز تلتزم بالقراءة، ممكن تقرأ كام صفحة مع فنجان القهوة، ومع الوقت هتلتزم بالقراءة مع القهوة لحد ما تبقى عادة أو روتين.
3- يبقى عندك شريك أو صديق للالتزام:
غالبا بيكون الالتزام بعادة أو روتين رحلة وحيدة، بس لو عرفت تشارك أهدافك والتزامك مع حد بتحبه أو صديق أو حد من عيلتك ده بيخلق نظام دعم، وممكن تلتزموا بالحاجة سوا وتشاركوا مع بعض نجاحكوا وفشلكوا وتحفزوا بعض وتدعموا بعض.
4- تابع تقدمك:
إنك تتابع تقدمك وتطورك والتزامك سواء بالكتابة أو أبلكيشن معين وتراقب عاداتك اليومية الحالية والعادات اللي عايز تلتزم بيها، ده هيبقى محفز ليك وهيخليك أقل عرضة لكسر سلسلة الالتزام.
5- اتبسط بنفسك:
احتفل بانتصاراتك الصغيرة، وشجع نفسك لو التزمت النهاردة، وهون على نفسك لو مالتزمتش امبارح، وكل ما تعدي فترة على التزامك حاول تكافيء نفسك بحاجة حلوة بتحبها عشان تحمسك تكمل وعشان الارتباط نفسه يرتبط عندك بحافز إيجابي
6- الاستمرارية
الاستمرارية هي العنصر السحري للالتزام. العادات عشان تبقى عادات لازم تكرار واستمرارية عشان تبقى روتين في حياتك. سواء كانت الظروف حلوة أو وحشة، الاستمرارية هي السر للالتزام والنجاح على المدى الطويل.
7- استفيد من الانتكاسات:
كلنا عندنا أيام بتبقى صعبة وبتحصل فيها مشاكل وأكيد لازم هنفشل في الالتزام في بعض الأوقات.. أهم حاجة إنك تهون على نفسك وتستفيد عادي من “الانتكاسة” دي وتتعلم منها وتعرف أنت محتاج إيه وترجع تلتزم إزاي، وخليك فاكر إن رحلة الالتزام رحلة مليانة UPs and DOWNs
8- تخيل نفسك ملتزم:
العقل أداة قوية جدا. خد لحظة من وقت للتاني وتخيل نفسك وأنت ملتزم وناجح وبتحقق أهدافك، وتصور الفرحة والرضا والانبساط والإنجاز اللي هتحس بيه وقت ما تلتزم بعاداتك بانتظام. التصوير الذهني ممكن يحمسك ويحفزك ويخلي عندك دافع وتمسك أكتر بالالتزام.
9- خليك مسؤول عن نفسك:
المسؤوليات الخارجية مهمة بس مفيش حد هيخليك تلتزم بعاداتك وروتينك غيرك أنت، خليك فاكر إن أنت المسؤول عن نفسك وعن التزامك ونجاحك وتحقيق أهدافك.
10 – الصبر:
ودي واحدة من أهم الحيل أو يمكن أهمهم. الالتزام بياخد وقت وتشكيل العادات بتاخد وقت فمحتاج تبقى صبور على نفسك وتفهم إن التغيير مابيحصلش في يوم وليلة، والالتزام ممكن يبقى بطيء بس ثابت أفضل ما يبقى سريع ومش مستمر.
