لو ساعتك البيولوجية بايظة.. دي 9 أطعمة ومشروبات تواجه بيها الأرق وتخليك تروح في النوم

بعد كل ويك إند بتلاقي نومك متلغبط خاصة الفترة دي بعد دخول الصيف عليك والسفر والمصايف بتلاقي بعدها ساعتك البيولوجية بتبكي في الزاوية وعندك أرق ومش عارف تنام.. بس فيه دراسة انتشرت في مجلة Sleep Health بتقول إنك لو دخلت 5 كوبايات من الفواكه كل يوم في روتين يومك ده قادر إنه يحفز النوم المتواصل والكويس بالليل.. والدراسة كمان لقت فيه علاقة بين الأكل اللي بتاكله في يومك وجودة نومك بالليل في نفس اليوم.. وعشان كده هنقولك على 9 أكلات ومشروبات تحارب بيهم الأرق وتخليك تغطس في النوم 

1. اللبن الدافئ

سلاح الأم المصرية الأصيلة لمحاربة الأرق.. وده مش عشان بس الكالسيوم وفيتامين د وهرمون الاسترخاء اللي فيه لا.. ده كمان عشان فيه كمية كبيرة من حمض التريبتوفان الأميني اللي بيهدي الأعصاب ويقلل التوتر ويخليك تسترخي

2. الموز

هو مصدر كبير للمغنيسيوم والسيروتونين والميلاتونين وده الهرمون اللي بيساعد جسمك إنه ينظم دورة النوم والصحيان الطبيعية وكمان بيحسن المزاج فهتخلص من التقلبات المزاجية اللي بتجيلك

3. البابونج

بيساعدك تسترخي عشان فيه شوية فيتامينات مفيدة لصحة جهازك العصبي فبيقدر يحارب الأرق اللي عندك.. ده غير إنه فيه مركب الأبيجينين وده بينشط مستقبلات معينة عشان يجيلك نوم فبتسترخى وتنام

4. الأسماك الدهنية

ودي زي الماكريل والتونة اللي بيكون فيهم نسبة كبيرة من فيتامين د وأوميجا 3 اللي ليهم دور أساسي في تنظيم مستوى السيروتونين عشان يحافظ على دورة نوم وصحيان ثابتة 

5. الخس

ده بقى مهدئ طبيعي بيخليك تسترخى وتنام عشان فيه جزئ البيوتانول.. وكمان بيقلل الالتهابات اللي التوتر بيسببها نتيجة اضطرابات النوم 

6. الكيوي

فيه دراسة اتعملت في كلية التغذية والعلوم الصحية بجامعة “تايبيه الطبية” في تايوان بتقول إن الناس اللي بياكلوا حبتين كيوي قبل النوم بساعة لمدة 4 أسابيع بتتحسن عندهم جودة النوم ومابيخدوش وقت طويل عشان يغطسوا في النوم.. وده بقى عشان فيه مركبات بتساعد على الاسترخاء اللي منها مثلًا الميلاتونين والأنثوسيانين ومركبات الفلافونويد والبوتاسيوم

7. الريحان

ساعات الأرق بيحصل عشان عندك عسر هضم وعشان كده الريحان في الحالة دي هيساعدك تخلص منه وهيهديك فيخليك تنام

8. اللوز

فيه نسبة كبيرة من هرمون الميلاتونين اللي اتكلمنا عنه.. ده غير الكالسيوم والمغنسيوم اللي بيخلوا عضلاتك تسترخى فهتعرف تنام 

9. الفاصوليا

فيها النياسين وحمض الفوليك وفيتامين B6 اللي أصلًا بيتم استخدامه من زمان عشان يعالجوا بيه الأرق.. ده غير إنه بيخفف التوتر والقلق وبيقلل مشاكل النوم