هل الكورة بقت روتينية بزيادة وخلصت على زمن التيكي تاكا؟

لفترة طويلة جدًا.. كلمة التيكي تاكا كانت معناها الكورة الصح.. استحواذ.. تمريرات قصيرة.. لعب نضيف يخليك حاسس إن الفريق كسب حتى لو النتيجة لسه صفر صفر.. برشلونة وإسبانيا عملوا حالة كروية خلت ناس كتير مقتنعة إن مفيش طريق غير ده.. بس مع الوقت ومع تغيّر شكل اللعبة السؤال بقى منطقي.. هو زمن التيكي تاكا خلص؟.. ولا الكورة بس اتطورت وكسرت سيطرتها؟

ثورة عظيمة.. بس في وقتها

التيكي تاكا ما كانتش مجرد أسلوب لعب.. دي كانت فلسفة كاملة.. تمسك الكورة.. تهدّ الخصم نفسيًا وبدنيًا.. تتحكم في الريتم.. برشلونة جوارديولا بين 2008 و2012 كان المثال المثالي.. استحواذ يوصل لـ70%.. ضغط عكسي يخنق أي حد.. ولاعيبة زي تشافي وإنييستا وميسي بيلعبوا في مساحات ضيقة كأنهم في حوش بيتهم.. وساعتها اللي كان بيمسك الكورة كان غالبًا بيكسب.. بس الكورة عمرها ما بتقف.. أي فكرة بتنجح بيتعمل لها ألف حل.

ليه تأثيرها قل؟

الفرق اتعلمت تواجهها.. الدفاع بقى أوطى.. الخطوط قريبة من بعض.. المساحات اختفت.. الخصم بقى يقولك خد الكورة كلها بس مش هتعدي.

غير كده الكورة الحديثة بقت أسرع وأقسى بدنيًا.. لاعب الوسط مطلوب منه يجري ويلتحم ويغطي نص الملعب.. فالبناء الهادي بقى أحيانًا عبء مش ميزة.. خصوصًا قدام فرق بتلعب على المرتدة.

حتى الأرقام بتأكد ده.. فرق كتير كسبت دوري أبطال أوروبا من غير استحواذ عالي.. وأحيانًا أقل من الخصم.

جوارديولا نفسه غيّر دماغه

أوضح دليل إن التيكي تاكا الكلاسيكية تراجعت إن صاحبها نفسه اتغير.. جوارديولا مع مانشستر سيتي ما بقاش بيلعب زي برشلونة زمان.. لسه استحواذ آه.. بس فيه طولية.. لعب مباشر.. كرات ثابتة.. عرضيات.. ضربات رأس.

حاجات مكانتش موجودة أصلًا في قاموس التيكي تاكا.. وده مش فشل.. ده فهم إن اللعبة اتغيرت.. وإن العناد في فكرة قديمة ممكن يوقعك.

أرسنال.. سيطرة من غير فرجة

أرسنال مع أرتيتا مثال واضح.. الفريق منظم.. مسيطر.. بيكسب.. بس الاتهام دايمًا حاضر.. اللعب ممل.

اعتماد كبير على الركنيات.. الفاولات.. التحركات المحسوبة.. مخاطرة أقل.. واقعية أكتر.. ناس كتير بتقول ده مش أرسنال اللي اتربينا عليه.. بس في نفس الوقت النتائج بتقول الأسلوب ده شغال.

المنتخبات وكشف الحساب

منتخب إسبانيا في مونديال قطر أكبر مثال.. استحواذ كتير.. تمريرات كتير.. فرص قليلة.. خروج قدام منتخب منظم وضارب في المرتدة.

نفس السيناريو اتكرر مع فرق كتير.. استحواذ من غير أنياب.. شكل حلو بس من غير خطورة حقيقية.

من غير لاعيبة استثنائيين زي تشافي وإنييستا.. التيكي تاكا بتتحول لاستحواذ عقيم.

العيب فين؟

التيكي تاكا نفسها مش غلط.. الغلط إنك تتعامل معاها كأنها وصفة سحرية.. الكورة دلوقتي محتاجة تنوّع.. ضغط عالي.. تحولات سريعة.. لعب مباشر وقت اللزوم.

الفرق اللي بتنجح هي اللي تعرف إمتى تمسك الكورة.. وإمتى تسيبها.. إمتى تهدي.. وإمتى تضرب بسرعة.. وأسلوب واحد ما بقاش كفاية.

وفي النهاية التيكي تاكا ما انتهتش.. بس نزلت من على العرش.. بقت جزء من منظومة أكبر مش الملك الوحيد.. والنسخة العملية لسه عايشة.. والكورة اتغيرت.. واللي ما يتغيرش بيتساب ورا.. مش لأن اللعب الحلو وحش.. بس لأن الفوز بقى أغلى من أي حاجة.