عبثيات: أفضل أماكن تحتفل فيها برأس السنة
في الأيام دي كلنا بنفضل ندور ونعمل خطط هنسافر فين في رأس السنة أو نحتفل ونخرج فين في القاهرة الكبرى وضواحيها الشيخ زايد ولا الكوربة ولا واتر واي وهنتصور جنب شجرة الكريسماس فين وهنلبس إيه.. وعشان حيرة كل سنة دي تعالى نقولك تحتفل وتخرج فين في رأس السنة:
في البيت يا حبايب قلبي.. وده المكان المثالي اللي تحتفل فيه ولو مش مصدق تعالى نقولك ليه حسب ما قال موقع “Bustle” وموقع “Country Living” في أحد مقالاتهم:
1- هتوفر فلوس:
الخروج ليلة رأس السنة بيبقى مكلف أوي كل حاجة أسعارها بتبقى مضروبة في 2 و 3 سواء خصوصا بقى دخول الحفلات وحتى مواصلات بتبقى غالية يومها بسبب الزحمة وساعات المطاعم بتعمل منينمام تشارج والشغل ده.. أما في البيت فتقدر تحتفل بأقل تكلفة فممكن تشتري شوية حلويات أو تعمل أكلة حلوة كده وتشغل شوية أغاني وهتبقى احتفالية روعة.
2- الراحة والدفى:
الخروج في الشتاء غالبا بيبقى متعب خصوصًا بقى لو الجو برد أو زحمة والطبيعي إن ليلة رأس السنة بتبقى برد أوي وزحمة طبعا زي ما قولنا قبل كده وكلنا عارفين ده.. فبدل ما تفضل واقف في طوابير ومتبهدل في الزحمة ليه ماتستمتعش بجو الدفى والهدوء ده في البيت؟ فممكن تلبس بيجامتك الحلوة المريحة وتحط عليك الروب التقيل وتحضر حاجة سخنة تشربها شوية سحلب كده أو حلابسة أو هوت تشوكليت وتعيش بقى.
3- هتحتفل مع أهلك وقرايبك:
في البيت تقدر تحتفل مع الناس اللي بتحبهم فعلًا بدون أي ضغط لإن الخروج أحيانًا بيبقى مليان دوشة وناس صحاب صحاب صحابك جايين مع صحابهم وماتعرفهمش ولا عمرك شوفتهم بس مضطر تقعد وتضحك وتحتفل عادي وده بالنسبة لبعض الناس جو بيسبب ضغط وبيخليهم مايقدروش يستمتعوا بوقتهم مع اللي بيحبوهم فعلا.. بس في البيت بقى هتقعد مع أهلك أو الناس اللي أنت اختارت تقضي معاهم الوقت ده فعلا وبتحبهم وبيحبوك من غير أي ضغط أو مظاهر.
4- هتقدر تتحكم في كل حاجة:
لما تحتفل في البيت كل حاجة هتبقى تحت سيطرتك تختار الأغاني اللي أنت عايزها ولو مش عايز أغاني وعايز تتفرج على فيلم هتختار الفيلم اللي أنت عايزة، ده حتى اللعب هتختار اللعب اللي عايز تلعبها.. مفيش حد هيفرض عليك أي حاجة وكل حاجة هتبقى ماشية زي ما تحب ولو ماحبتش أي حاجة من دول وعايز تقوم تقعد في السرير وتفصل من الناس دي كلها هتعمل كده.
5- هتجنب الزحمة والتوتر:
وأخيرًا وليس أخرًا وللمرة المليون حابين نأكد عليك إن ليلة رأس السنة بتبقى زحمة غير عادية في كل الشوارع هتلاقي أغلب المطاعم محجوزة بالكامل والطرق بتبقى كارثة.. فليه يعني تدخل نفسك في كل ده لما تقدر تحتفل في هدوء وراحة في البيت؟
في الأخر حابين نقولك لو أنت برضه مُصر ومٌحب للفرهدة والمرمطة اتفضل اخرج وفرهد زي ما تحب عشان شكلك كده لسه صغير وشباب وصحتك جيباك.. إنما لو أنت من محبين الأنتخة والدفى والجو الكوزي ابعت لصحابك وأهلك وأي حد عايز يخرج ويخرجك معاه الموضوع ده واقنعه تقعدوا في البيت مع بعض واغريه إنكوا هتاكلوا يوستفدني وتعمله سحلب وهوت تشوكليت وحاول تقضي الوقت ده مع اللي بتحبهم وبطريقة حلوة ولايقالك عشان ده حرفيًا الوقت اللي بتعوض كل سنة مرة .
