ليه بنتعلق بالمسلسلات وأبطالها ومابنحبهاش تخلص؟
فيه أيام كده بتبقى عايز تروح فيها مخصوص عشان تتفرج على المسلسل بتاعك عشان فيه حلقة جديدة هتنزل منه النهاردة أو حلقة امبارح شدتك فأنت دماغك مسحولة في المسلسل ومش قادر عايز تروح عشان تشوفه وبتنكسل بقى خروجات وقعدات مهمة وحاجات هتفرحك وتفرفسك عشان بس المسلسل ده.. ده غير إن ممكن أصلا تفكس لحاجة في الشغل وتفتحلك حلقة مسلسل كده تتابعها وأنت بتشتغل أو أنت بتتغدى في الشغل.
وفي الحالات دي لما المسلسل يخلص بتحس إحساس الوحدة وإن فضيت علينا الدار وبتبقى خلاص اتعلقت بالمسلسل وبأبطاله وبحكايته وعايزها تستمر معاك طول العمر.. بس ماتقلقش أنت مش لوحدك في الحتة دي.
ويمكن ده حصل لإننا بقينا قادرين نشوف موسم كامل مثلا من مسلسل في أيام على المنصات الإلكترونية وعلى الانترنت ده غير إن كل مسلسل له قاعدة جماهيرية كتير موجودة على السوشيال ميديا ده غير محبين الممثلين نفسهم اللي بيفضلوا يكتبوا ويحللوا دور الممثل والتخمنيات والتوقعات للحلقات الجايه في المسلسل وتلاقي بقى ناس بتحرق الحلقات وناس بحط مشاهد مسروقة من الحلقات القادمة على تيك توك وهكذا، وبالشكل ده طبعا بقت الناس تتعلق بمسلسلاتها المفضلة أكتر خصوصا بقى لو كانت أكتر من موسم.
وده طبعا كله بيخلي الناس مرتبطة عاطفيًا أكتر بالمسلسل.. وأكيد وإحنا بنتكلم على المسلسلات بشكل عام كده فيه مسلسل معين جه في دماغك وحسيت إننا بنتكلم عليه وعلى علاقتك بيه وهيبقى غالبًا عيطت مع أبطال المسلسل وضحكت معاهم ولو فيه أحداث ماكنتش عجباك أو القفلة صعبة هتلاقي نفسك عايز تضرب المؤلف أو تبعتله تقوله يغير النهاية دي.
طيب ليه بقى بنتعلق بالمسلسلات كده وبالشكل ده؟
الإجابة سهلة أوي وهي عشان بنتواصل مع الشخصيات وأوقات بنشبه نفسنا بيهم وبرنبط نفسنا وأحداثنا بيهم بشكل غير مباشر فبنحس إننا تعاطفنا معاهم أكتر.. فهتلاقي مثلا صعب حد يتعلق بالشخص الشرير اللي في المسلسل ويبقى عايزة يكمل للنهاية.
إحنا بنتواصل مع المسلسلات عشان الكتاب عندهم طريقيتهم الخفية اللي بيستخدموها في الكتابة عشان تخلي الناس مايزهقوش من المسلسل وعشان أبطال المسلسل في قصته يبانوا إنهم أشخاص حقيقية من أرض الواقع ده غير إن المسلسلات من أهم وسائل التسلية في يومنا والحاجة اللي بتفصلنا على الواقع اللي بنعيشه والتفكير في حياتنا من نص ساعة لساعة في اليوم وبتخلينا نقعد نشوف حياتنا الخيالية بقى.
فاحنا بنتعلق بحياة الشخصيات دي أوي عشان عايزين نبقى قادرين نعيش حياتهم يعني مثلا هتلاقي إن نفسك تبقى غني زي عبد الغفور البرعي وتعرف تعمل فلوس أو مثلا يبقى كل اللي حواليك بيحبوك زي جعفر العمدة ما عدا الأشرار أو يبقى عندك صحاب زي مسلسل “فريندز” أو تعيش قصة حب خيالية زي سيران وفريد في المسلسل التركي “الطائر الرفراف” وهكذا.
عشان كده بنتعلق خصوصا عشان بنشوف القصة بتتكشف قدامنا وبنحس إننا جزء من المسلسل وبنحس بالغضب لما يبقى فيه شخص شرير هيأذي الشخص اللي بنحبه في القصة أو اتنين بينفصلوا فبنعيط أو لما شخصية مهمة بنحبها بتموت بنتضايق ونبقى عايزين نعرف ماتت ليه بسرعة أو بنبقى عايزينها تعيش والسيناريو ده كله يتغير أصلا.
فلو حسيت إن فيه مسلسل عجبك كمله عادي واتعلق بيه وبأبطاله وخلصه وخليك عارف إن هيجي مسلسل بعده هتتعلق بيه تاني وهتفضل ماشي في نفس الدايرة.
