12 علامة لو ظهروا على جوزك اعرفي إنه متجوز عليكي
انتشر الفترة اللي فاتت كلام كتير عن الزواج التاني خصوصا بعد انتشار “سكرين شوت” من أحد المسلسلات بيتكلم عن الجواز التاني، ده غير كمان انتشار أخبار بتقول إن ممكن الست تعرف إن جوزها متجوز عليها عن طريق استخراج القيد العائلي.
وبعد القانون الجديد اللي بينص على إنه الزواج التاني دون علم الزوجة الأولى بيضمن تقريبًا للزوجة الأولى الطلاق، بدأت ستات كتير تدور ورا جوزها عشان هما مش قابلين الفكرة دي على نفسهم، لكن فيه بعض الستات اللي مش فارق معاها جوزها يتجوز عليها وأهم حاجة بيتها وولادها وحتى لو اتجوز 3 كمان عليها أهم حاجة إن بيتها يكون سليم.
في الحالتين فكرة الجواز مرة تانية شئ مزعج لأسباب كتير.. فدورنا ولقينا موقع “ideapod” بيقول في واحد من مقالاته شوية علامات لو ظهرت على جوزك تعرفي منها إن فيه واحدة تانية في حياته:
1- مابيهتمش باللي أنتي بتعمليه:
الطبيعي إنه بيسألك حتى لو كل فترة إيه أخبارك، أو بيسألك عن يومك كان فيه إيه جديد أو غريب مثلا أو أي شكل تاني من السؤال عليكي، حتى لو كان الموضوع روتيني وممل بس هي علامة إنه مهتم بيكي، فلو كان جوزك فيه حد تاني في حياته هيبقى قليل جدا ما هيحب يعرف حاجة عنك، بالكتير أوي هيبقى بيسأل عن الأساسيات بتاعت البيت والحياة بينكوا.
2- هيبقى بعيد عنك جسديًا:
الطبيعي إن الرجالة مابتوصلوش جسديًا كتير زي الستات فعلا، لكن لو لاحظتي تراجع كبير وواضح زي مثلا لو كان بيرجع البيت يحضنك أو يسلم عليكي فبقى أول ما تقعدي على الكنبة يقوم من جنبك، دي علامة برضه على إنه وقع في حب واحدة تانية.
3- بيخلق خناقات عشان يسيب البيت:
ده ممكن يبقى فخ، فخلي بالك، أوقات الراجل اللي بيبقى في علاقة تانية بواحدة غير مراته بيخلق مشاكل كبيرة من المناقشات الصغيرة عن طريق إنه بيبالغ في ردود أفعاله عشان يعمل نفسه متضايق ويقضي وقت مع نفسه أكبر برا البيت بحجة إنك منكدة عليه عيشته، فخلي بالك من الخناقات الصغيرة اللي بتبقى على اللاشئ وقلب الترابيزات.. وعموما دي علامة كلاسيكية قديمة معروفة عن الخيانة.
4- مشغول دايما عنك بمقابلات كتير:
لو كان دايما مشغول عن الخروجات بتاعتكوا وخروجاتكوا مع صحابكم أو المقابلات العائلية من غير مبررات منطقية فده معناه إنه ممكن يكون مشغول بحاجات خاصة، الحاجات دي ممكن تبقى شغل فعلا أو مقابلات مع صحابه فدي مش علامة واضحة لكن هتبقى واضحة لو شغلتي إحساسك، واسمعي مبرراته واعرفي ليه مش عايز يخرج معاكي فلو منطقية كان بيها، لكن لو بتكرر كتير ومش مريحاكي في كل مرة بتطلبي منه تبقوا مع بعض فدي علامة واضحة اهيه.
5- بينسى التواريخ المهمة بينكوا:
عادة الرجالة بينسوا فعلا ومابيفتكروش أعياد الميلاد والذكرى السنوية والحاجات دي، بس لو كان بيفتكر في الأول ومرة واحدة بقى ينسى، فده معناه إن فيه أيام وتواريخ تانية هي اللي بقيت في دماغه، ولو فكرتيه هيبقى مش مهتم برضه أو هيبقى بالنسبة له يوم عادي مش مناسبة مهمة أو حاجة.
6- مابقاش يقولك هيعمل إيه:
أغلب الوقت أي اتنين في علاقة بيبعتوا لبعض يومهم هيمشي إزاي وخصوصا بقى لو متجوزين بيبقوا عارفين جدول يوم شريكهم هيمشي إزاي، فلو بطل يقولك عنده إيه في يومه أو بيجي البيت وبيمشي في أوقات مش أوقاته، ومابقتيش عارفة خرج امتي ولا هيرجع امتي! ولما يبدأ يحس إن أسئلتك عن راجع امتي أو نزلت امتي مهينة بالنسبة له.. فاعتبري دي إشارة لإنها برضه مش دليل قاطع إنه متجوز عليكي.
7- متوقع منك إنك تبقى موديل:
لو بقى مابيعملش أي حاجة في حياته غير إنه بينتقد مظهرك أو وزنك اللي بيزيد أو بيقل فده معناه إنه مش مهتم بدعمك، وخلي بالك إن فيه فرق كبير بين إنه يقول رأيه في حاجة مش عجباه بتقدير ويبقى نقد بناء فعلا، وبين وإنه يسخر منك أو بينتقدك لمجرد النقد، فاعرفي إنه مش خايف تزعلى منه أو تبعدي عنه أو يحصل أي مشكلة بينكوا لإن كده كده فيه حد بيعمل اللي بتعمليه في حياته فأنتي مش مهمة.
8- بيصرف فلوسه على حاجات غريبة:
لو ملاحظة نقص جامد في فلوس البيت من غير أي مشاكل في الشغل أو مشاكل مادية هو بيمر بيها فده معناه إنه بيصرف الفلوس دي على واحدة تانية، أكيد مش على صحابه في القهوة أو البلايستيشين.
9- مابقاش يحترمك:
بغض النظر عن كل العلامات اللي فوق دي بس لما بيبقى فيه ست تانية شاغلة راجل مابيقدرش الست الأولي اللي في حياته مهما تعمله لإنه بياخد وجودها أو أي حاجة تعملها “For Granted” أو أمر مسلم بيه، ومن العدل في الحالات دي إنك تقربي منه أكتر وتفهمي إيه اللي بيحصل، وبلاش تحكمي عليه على طول.
10- بيتجنب يبصلك في عينك:
بيقولوا إن العين قادرة تكشف كل حاجة زي الحب أو الفرح أو عدم الثقة مثلا، فلو كان جوزك بيتجنب يبصلك في عينك فده معناه إن فيه حاجة غلط، ممكن يبقى بيبصلك لمدة ثانية أو ثانيتين لكن بيبعد عينه بسرعة كأنه عامل عاملة.
11- بيستريح لما تبقى مشغولة:
لما بتحب حد أكيد بتبقى عايز تقضي معاه أطول وقت ممكن بس الجواز مابيسمحش بده كتير عشان المسؤوليات والشغل، بس أكيد مفيش حد هيبقى مستريح ومبسوط طبعا إن شريكه يبقى مشغول عنه بالعقل يعني، فلو ده بيحصل ممكن تخمني بكل هدوء إن فيه واحدة تانية في حياته عادي.
12- بيتأخر في الشغل لوقت طويل:
طبعا ده أكتر تعبير قديم وكلاسيكي عن إن جوزك متجوز عليكي بس يعتبر مهم برضه فقولنا نقوله ونأكد عليه.
وطبعا لو بتشوفي أي عرض من الأعراض دي بتظهر على جوزك فده مش معناه بالضرورة إنه متجوز عليكي لكن أنتي محتاجة تبدأي توقفي التدهور اللي بيحصل في علاقتكوا ببعض، لإن دي كلها أعراض بتشير إن علاقتكوا بتنهار وطبعا لو طلع متجوز عليكي أو فيه واحدة تانية في حياته فإحنا كان قصدنا كل خير.
