لو عايز تبقى مستمع جيد.. اعرف إيه هو الـ “Active Listening”

لما بيبقى عندك مشكلة أو أحداث بتحصل في حياتك مابتتكلمش فيها مع كل الناس بتتكلم فيها مع ناس أنت مختارهم عشان بتستريح في الكلام في معاهم وبيخلوك تقول كل اللي نفسك فيه وبيسمعوك كويس.. وخلي بالك من فكرة بيسمعوك دي عشان مش أي حد بيعرف يسمع أصلا مع إن أغلب الناس كانت بتبقى فاكرة إنهم بيسمعوا كويس خصوصًأ اللي بيحبوهم.

وبمناسبة يوم الاستماع العالمي قررنا نقولك إيه هي أحسن طريقة تسمع بيها اللي حواليك واللي اسمها الـ “Active Listening” خصوصا إنها تعتبر مهارة مهمة جدا عشان تخليك متواصل مع الناس كويس وتقوي علاقتك باللي حواليك سواء كان شريكك أو صحابك أو أهلك أو الناس في الشغل معاك وبتقوي علاقتك بالناس لإن الشخص اللي بيتكلم بيحس إنه متقدر وحد سامعة وبيحترمه وتعتبر المهارة دي أساس المحادثات الناجحة 

لو شايف إنك بتسمع اللي حواليك كويس أو شايف إنك مابتعرفش تسمع الناس كويس فتعالى نقولك على شوية حاجات تقدر بيهم تزود مهارة الـ “Active Listening” حسب ما قال موقع “verywellmind”:

1- خليك مركز كويس: 

أول حاجة محتاج تركز كويس في كل اللي بيتقال بكل حواسك وتدي للي بيتكلم انتباهك كويس.. وكمان محتاج تبعد عن العالم الخاص بتاعك وتحاول تبقى مكان اللي بيتكلم ودي مهارة قوية في التواصل مع مشاعر الناس.

وعشان تعمل ده محتاج تبعد عنك موبايلك وتتجاهل أي عوامل ممكن تشتتك وحاول ماتسرحش وماتتكلمش مع نفسك وتركز مع اللي بيتكلم.

2- ركز مع انفعالات واشارات الشخص الغير لفظية: 

حوالي 65% من تواصل الشخص بيكون غير معلن أو مابيتقالش بالكلام.. والاهتمام بالاشارات الغير لفظية دي بيقول كتير عن الشخص واللي بيحاول يقوله، فمثلا لو الشخص اتكلم بسرعة دي علامة عن إنه متوتر أو قلقان ولو اتكلم ببطء دي علامة عن إنه تعبان ومرهق أو بيحاول يختار كلامه.

ووقت لما بتعمل “Active Listening” مع اللي قدامك حاول تستخدم لغة جسد منفتحة ومابتهددش اللي قدامك زي إن بلاش تربع إيديك وتبتسم لما تسمع وتديله إيماءات في فواصل الكلام بتاعه إنك سامع.

3- حافظ على التواصل البصري بينكوا:

التواصل البصري ده بيقول للي قدامك إنك حاضر وبتسمع اللي بيقوله وبيوضح كمان إنك مش مشتت ومنتبه كويس.. وبلاش طبعا تستخدم تواصل بصري جامد اوي بحيث الموضوع مايبقاش مخيف أو غريب وعشان تعمل ده اتبع قاعدة إنك 50/70 وهي عبارة عن إنك تحافظ على التواصل البصري لمدة 50% لـ 70% من الوقت اللي بتقضيه في الاستماع للشخص مع الاستمرار في التواصل بالعين لمدة من 4 لـ 5 ثواني قبل ما تبص بعيد لفترة قليلة.

4- اسأل أسئلة مفتوحة:

بلاش تسأل الأسئلة اللي إجابتها أه أو لا عشان بتوصل لإجابات مسدودة وده مش مفيد عشان بيقفل الكلام وبيخلي الموضوع صعب إنك تسمع للشخص اللي قدامك لإنه صعب تستفيد من الإجابات القصيرة دي اللي مابتوصفش.

وحاول تسأل أسئلة مفنوحة عشان تبين إنك مهتم بالكلام وبالشخص والأسئلة دي زي مش عايز تقولي حاجة كمان؟ طاب إيه رأيك في ده؟ طاب أنت شايف إيه أحسن طريقة عشان تتخطى المشكلة دي؟ ومفتاح الأسئلة المفتوحة دي هو إن يبقى عندك فضول تجاه الشخص.

5- اتفاعل مع الكلام: 

بعد ما الشخص يتكلم قوله اللي سمعته تاني وعيده عشان من ضمن أهم الحاجات في الـ  “Active Listening” هو إنك تقدر تلقط أفكار وعواطف اللي قدامك كويس.. ولما الشخص بيحس إنه اتفهم صح ومفيش أي سوء فهم.

وواحدة من الطرق إنك تعكس اللي سمعته ده هو إعادة صياغة الكلام فمثلا زي إنك تقول “اللي بتقوله يعني إنك محبط” أو “يعني اللي بتقوله هو إنك محبط عشان كذا كذا” ولخص اللي سمعته وادي الشخص فرصع عشان يقول اللي فهمته، ولو كنت عايز اللي الشخص قاله بشكل أحسن اطلب إنه يوضح لكن بلاش تركز على التفاصيل اللي مش مهمة عشان ماتفوتكش الصورة الكبيرة.

6- حاول تكون صبور:

الصبر مهم أوي في الاستماع عشان بيسمح للي قدامك إنه يتكلم من غير ما تقاطعة وكمان بيديله وقت يقول اللي بيفكر فيه، فحاول ماتنهيش الجمل بالنيابة عنهم وتبقى صبور يعني ماتحاولش تملى فترات الصمت بأفكارك أو قصصك وافهم كويس ومش لازم ترد واللي قدامك بيتكلم وطبعا أكيد ماتغيرش الموضوع بشكل مفاجئ لإن ده هيوصل للقدامك إنك مليت وصبرك خلص.

7- بلاش تحكم على الشخص:

خليك محايد وبلاش تحاسب اللي قدامك في ردودك عشان الشخص يقدر يشاركك أفكاره بكل أريحية وخلي المحادثة منطقية وآمنة عشان يقدروا يثقوا إن محدش هيحكم عليهم أو ينتقدهم أو يلومهم.

وعشان ماتحكمش على اللي قدامك ممكن تعمل الحاجات دي:

• عبر عن التعاطف مع الشخص أو خالته 
• حاول تتعرف على أشخاص وثقافات أكتر 
• اتعلم ازاي تقبل الناس 
• إدرك إيه الوقت اللي بتحكم فيه على الشخص ووقف الأفكار دي

وطبعا خليك فاكر إن مهارة الـ “Active Listening” زي أي مهارة في الدنيا ماينفعش تنميها بين يوم وليلة فهي محتاجة ممارسة وإنك تركز مع نفسك في الخطوات والخاجات اللي قولنا عليها فوق دي وبالتالي مع الوقت هتعملها من غير ما تحس ومش هتاخد بالك وهيبقى ده طبعك.