في يوم التهاب المفاصل.. لو مفاصلك بتتكلم هتقول إيه

النهاردة اليوم العالمي للمفاصل و تقديرا لتعب مفاصلك معاك طول السنة عملنا الموضوع ده علشان نفكرك إن مفاصلك ليها حق عليك ومحتاجة منك اهتمام ودي شوية حاجات مفاصلك نفسها فيها وفقا لموقع bluecross و موقع Healthline

1- خليك محافظ على وزنك وبلاش تزيد علشان لما تزيد هتتقل عليا و أنا مش ناقصة وخليك عارف إن كل نص كيلو هتخسه هيخفف ما يوازي 2 كيلو من الضغط على الركبتين خاصة للي عندهم خشونة في الركبة .

2-حافظ على سكر الدم عندك علشان لما بيزيد بيعمل تصلب لأنسجتي وبيخليها تتعب من أقل حاجة وفي دراسات أمريكية بتقول إن 47%من اللي بيعانوا من مرض السكر بيعانوا برضه من التهاب المفاصل و 61% من اللي بيعانوا من التهاب المفاصل أكتر عرضة للإصابة بالسكر .

3-أتمشى لك نص ساعة في اليوم أو أعمل أي تمارين كده وقوي عضلاتك ودلعني.

4- حاول تقلل تدخين شوية علشان بيضغط على الأنسجة اللي بتحميني فالتدخين بيتعبني خصوصا إن فيه دراسات اتعملت في 2010 لقوا إن المدخنين لأكتر إصابة بإلتهاب المفاصل من الغير مدخنين.

5-احميني من القعدة الغلط على المكتب و بلاش تلوح ضهرك  وشيل الحاجات التقيلة و الحركات الشقلاباظية علشان مالتهبش أكتر لو سمحت.

6- كتر من الأكل اللي بيحتوي على Omega3 زي السمك والمكسرات علشان بيقويني وبيساعدني أواجه معاك العالم.

وخلي بالك في أكتر من 100 نوع من تعب المفاصل وكلها مؤلمة وبتطور بشكل مختلف فياريت من فضلك لو حسيت إن مفاصلك تاعباك ومش قادر تتحرك كويس يبقى لازم تروح للدكتور حالا وماتسيبهاش لأخر لحظة لحد ما الموضوع يكبر زي كل مرة.